ស្អាត និងសមគ្នាយ៉ាងនេះ ដឹងថា ពេជ្រ សូលីកា ទុក នីកូ ជាអ្វីទេ?

2018-05-30 02:38:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបែកគ្នាជាច្រើនឆ្នាំ ពេលនេះ ពេជ្រ សូលីកា ដែលបាត់មុខយូរនេះ ពេលនេះបានមកជួបជុំគ្នាជាមួយនឹង នីកូ ជាថ្មី។ ពួកគេបានចូលរួមជាមួយគ្នាក្នុងកម្មវិធី Meet and Greet with NIKA(Nico+Solika) ដ៏កក្រើកថ្មីៗនេះ ក្នុងលក្ខណៈមិនបើកចំហ។

វត្តមានរបស់ពួកគេទាំងពីរនាក់ក្នុងវេលានោះ ទទួលបានការសាទរហ៊ោកញ្ជ្រៀវ កងរំពង។ អ្នកគាំទ្រជាច្រើនបានពោលសរសើរថាពួកគេពិតជាស្រស់ស្អាតខ្លាំង។ ពិសេសបំផុត អ្នកគាំទ្រខ្លះបានលើកឡើងថា ពួកគេទាំងពីរនាក់ពិតជាស័ក្ដិសមនឹងគ្នាខ្លាំងណាស់។

មិនឆ្លើយតបនឹងការផ្គូផ្គងរបស់អ្នកគាំទ្រ ប៉ុន្តែភាគីខាងស្រី បានសរសេរនៅលើរូបថតមួយផ្សេង ដែលនាងបានជូនពរចំពោះនីកូ ក្នុងឱកាសខួបកំណើតរបស់ដៃគូប្រុសរូបនេះថ្មីៗ ដែលបញ្ជាក់ថា នាង និង នីកូ មិនមានអ្វីលើសពីមិត្តឡើយ។ នាងសរសេរថា "រីករាយថ្ងៃកំណើត idol របស់ខ្ញុំ អ្នកគឺជាដៃគូ និងជាបងប្រុសដ៏ល្អបំផុតរបស់ខ្ញុំ"។

ពេជ្រ សូលីកា បានបាត់មុខច្រើនឆ្នាំពីសិល្បៈ ក្រោយមានដំណឹងទាក់ទងស្នេហ៍ជាមួយមន្ត្រីធំមួយរូប។ ប៉ុន្តែកាលពីឆ្នាំ ២០១៧ ធ្លាប់មានដំណឹងថា នាងចង់វិលមកសិល្បៈវិញ ដែលពេលនោះល្បីថា នាងអាចចូលទៅសាន់ដេ ជាមួយ នីកូ។ ប៉ុន្តែដំណឹងនេះបានស្ងាត់ទៅវិញ រហូតមកដល់ពេលនាងលេចមុខជាថ្មីៗនៅពេលនេះ។

វត្តមានរបស់ សូលីកា នាពេលនេះ នាងបានចូលរួមសម្ដែងក្នុងបទ "លាក់បាំង" និងបទរបស់នីកូក្រៅផលិតកម្មជាច្រើនទៀត។ ពួកគេទាំងពីរ គឺជាដៃគូសម្ដែងដែលទទួលបានការគាំទ្រខ្លាំងអំឡុងឆ្នាំ ២០១៤ តាមរយៈបទ "ឱបបងនឹកគេ" និងបទជាច្រើនទៀត៕