មកស្រង់បទពិសោធន៍ CEO ប្រុសស្រីវ័យក្មេង៤រូប កំពុងជោគជ័យខ្លាំង

2018-05-30 02:50:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ការតស៊ូព្យាយាមមិនបោះបង់ ហ៊ានប្រថុយទទួលយកហានិភ័យរាប់មិនអស់ រហូតក្លាយជាសហគ្រិនវ័យជោគជ័យមួយរូប គឺមិនមែនជារឿងងាយនោះឡើយ។ ខាងក្រោមនេះជាការចែករំលែកនូវបទពិសោធន៍ ល្អៗជាច្រើនពីនាយកប្រតិបត្តិវ័យក្មេងមួយចំនួននៅរាជធានីភ្នំពេញ។

១. ឃន ឈុនដារ៉ា

លោក ឃន ឈុនដារ៉ា ជានាយកប្រតិបត្តិនៃក្រុមហ៊ុន Karanak Capital KOI បច្ចុប្បន្ន លោកជាសហគ្រិនវ័យក្មេងកំពុងជោគជ័យខ្លាំងបំផុត ក្នុងមុខជំនួញ។ មិនត្រឹមតែ ជាសហគ្រិន វ័យក្មេងប៉ុណ្ណោះទេ តែលោកថែមទាំងមានចិត្តល្អ ចែករំលែកនូវគន្លឹះសំខាន់ៗដើម្បីក្លាយជាសហគ្រិនជោគជ័យមួយរូបទៀតផង។ នាយកប្រតិបត្តិ KOI រូបនេះ បានប្រាប់ពីគន្លឹះសំខាន់ៗ មួយចំនួន ដើម្បីក្លាយជាសហគ្រិនវ័យក្មេងដូចជា៖ ភាពក្លាហានក្នុងការទទួលយកហានិភ័យ ទំនុកចិត្តខ្ពស់ទៅលើខ្លួនឯង ត្រូវមានបណ្ដាញទំនាក់ទំនងច្រើន យល់ដឹងពីសមាសភាពខ្លួនឯងឱ្យបានច្បាស់លាស់ មានចក្ខុវិស័យច្បាស់លាស់ ចេះស្រាវជ្រាវ ហ៊ានអារកាត់ និងវិនិច្ឆ័យ មិនបោះបង់ការព្យាយាម។

២. លោក គង់ សុលីយ៉ា

លោក គង់ សុលីយ៉ា ជាប្រធាននាយកប្រតិបត្តិក្រុមហ៊ុនដឹកជញ្ជូន "Joonaak Delievery” ។ រូបលោក ត្រូវបានមនុស្សជាច្រើនកត់សម្គាល់ថា ជានាយកប្រតិបត្តិមួយរូប មានចរិតស្លូតបូត សុភាពរាបសាគួរឱ្យគោរពស្រឡាញ់។ មិនត្រឹមតែប៉ុណ្ណោះ កន្លងមក លោកធ្លាបើចែករំលែក បទពិសោធន៍ ដើម្បីជោគជ័យក្នុងមុខជំនួញទៀតផង។

CEO វ័យក្មេងរូបនេះ អះអាងថា បើចង់រកស៊ីជោគជ័យ ត្រូវចាប់ឱកាសឲ្យបាន នោះភាគរយមានខ្ពស់។ ទោះយ៉ាងណា លោក សុលីយ៉ា បានបន្ថែមថា បន្ទាប់ពីចាប់ឱកាសបានហើយ ត្រូវពុះពារឲ្យខ្លាំង ព្រោះភាពជោគជ័យមិនមែនកើតឡើងដោយចៃដន្យទេ។ អ្នកជំនួញវ័យក្មេងបានបង្ហើរពាក្យមួយឃ្លាថា "ហ៊ានចាប់ផ្ដើម ទើបដឹងថាជោគជ័យឬអត់"។

៣. អ្នកស្រី ឈឿន ម៉ានីន

បានរំដោះខ្លួនចេញជីវិតជាស្ត្រីមេផ្ទះ ងាកមកប្រឡូកក្នុងវិថីជំនួញលើកដំបូង ដោយការចាប់ផ្ដើមអាជីវកម្មបើកហាងកាហ្វេកូនខ្មែរមានស្ដង់ដាមិនឲ្យចាញ់បរទេសឡើយ។ មានដើមកំណើតជាអ្នកបាត់ដំបង សហគ្រិនស្ត្រីកម្ពុជាវ័យ ២៥ឆ្នាំ អ្នកនាង ម៉ានីន បានលើកឡើងថា ហាងកាហ្វេមានស្តង់ដាក្នុងស្រុកពុំមានច្រើននោះទេ។ នេះជាដើមចមមួយ ដែលអ្នកនិយមញ៉ាំកាហ្វេរូបនេះ ហ៊ានបោះទុនជាមួយដៃគូប្រមាណជាង១៣ម៉ឺនដុល្លារ បើកហាងកាហ្វេឈ្មោះថា P.Plus Coffee ស្ថិតតាមផ្លូវឧកញ៉ា ទ្រី ហេង។

សហគ្រិនស្ត្រីរូបនេះ បង្ហាញគំនិតសុទិដ្ឋិនិយមចំពោះស្រី្តមេផ្ទះសម័យថ្មីនេះ គួរកុំធ្វើជាបន្ទុកគ្រួសារ និងសម្លឹងរកអ្វីដែលខ្លួនស្រឡាញ់ រៀនធ្វើ និងទុកចិត្តលើខ្លួនឯង ហើយបង្កើតក្ដីស្រមៃនិងពុះពារធ្វើវាឲ្យក្លាយជាការពិត ហើយគ្រប់ៗពេលដែលអ្នកដួល ចូរប្រាប់ខ្លួនឯងថា វាគ្រាន់តែជាមេរៀន ងើបឡើង ធ្វើតទៀត។

៤. អ្នកស្រី ឃីន ស្រីនាថ

ក្រោយឆ្អិននឹងការងាររយៈពេល៥ឆ្នាំ អ្នកស្រី ឃីន ស្រីនាថ បានសម្រេចបោះបង់ការងារមានប្រាក់ខែច្រើនក្នុងស្ថាប័នឯកជនមួយដើម្បីមកបើកក្រុមហ៊ុនដោយខ្លួនឯង ឈ្មោះថា VIRGO Cambodia។ ក្រុមហ៊ុននេះជាភ្នាក់ងាររើសបុគ្គលិក សម្រាប់បំពេញការងារឲ្យក្រុមហ៊ុនផ្សេងទៅតាមតម្រូវការ។

អ្នកស្រី ឃីត ស្រីនាថ ជាអតីបុគ្គលិកផ្នែកធនធានមនុស្សនៅក្រុមហ៊ុនឯកជនមួយ មុននឹងអ្នកស្រីបើកក្រុមហ៊ុនផ្ទាល់ខ្លួល។ ដោយសារតែធ្វើការលើផ្នែកធនធានមនុស្សប្រាំឆ្នាំ បានធ្វើឲ្យអ្នកស្រីមានជំនាញច្បាស់លាស់ក្នុងការជ្រើសរើសបុគ្គលិកឲ្យត្រូវទៅតាមជំនាញ និងតម្រូវការរបស់ក្រុមហ៊ុននីមួយៗ៕ ចុចអានបន្ត

អត្ថបទ៖ វឌ្ឍនៈ