Canon ឈប់លក់កាមេរ៉ាប្រើហ្វីលជាផ្លូវការ

2018-05-31 03:25:15
ចំនួនមតិ 0 | ចំនួនចែករំលែក 0

ចន្លោះមិនឃើញ

Canon បានបញ្ឈប់ការលក់កាមេរ៉ាប្រើហ្វីលម៉ូដែល EOS-1V ជាផ្លូវការ ជាសញ្ញាដែលបញ្ជាក់ថាក្រុមហ៊ុននេះបានសម្រេចបញ្ចប់ជំនួញផលិតកាមេរ៉ាប្រើហ្វីល ក្រោយប្រឡូកក្នុងជំនួញនេះបានប្រមាណ ៨០ ឆ្នាំ។

Canon បានឈានចូលក្នុងជំនួញនេះនៅឆ្នាំ ១៩៣៧ ដោយដំបងក្រុមហ៊ុននេះមានឈ្មោះថា Precision Optical Instruments Laboratory ដែលបានផលិតកាមេរ៉ាម៉ូដែល The Kwanon។ ប៉ុន្តែក្រោយផលិតបានកាមេរ៉ាឌីជីថលដំបូងនៅឆ្នាំ ១៩៨៤ ក្រុមហ៊ុនជប៉ុននេះក៏បានប្ដូរទិសដៅមករកទីផ្សារកាមេរ៉ាឌីជីថលច្រើនជាងកាមេរ៉ាប្រើហ្វីល។

ទោះបីកាមេរ៉ាហ្វីលត្រូវបាន Canon បញ្ឈប់ការផលិតបន្តិចម្ដងៗ ប៉ុន្តែក្រុមហ៊ុននៅតែបន្តជីវិតកាមេរ៉ាហ្វីលម៉ូដែល EOS-1V សម្រាប់អ្នកថតរូបអាជីព រហូតមកទល់សព្វថ្ងៃនេះ។ ការផលិត EOS-1V បានបញ្ឈប់នៅឆ្នាំ ២០១០ ប៉ុន្តែ Canon នៅតែបន្តបញ្ចេញលក់កាមេរ៉ាដែលមានសេសសល់ក្នុងស្តុក។

ត្បិតថាពេលនេះ Canon បានបញ្ចប់ការលក់ EOS-1V ពិតមែន ប៉ុន្តែក្រុមហ៊ុននៅតែផ្ដល់ជូនសេវាជួសជុលកាមេរ៉ានេះរហូតដល់ថ្ងៃទី ៣១ ខែតុលា ឆ្នាំ ២០២៥។ ដោយឡែក Nikon ដែលជាគូប្រជែងរបស់ Canon នៅបន្តលក់កាមេរ៉ាប្រើហ្វីលដែលបច្ចុប្បន្នមានពីរម៉ូដែលគឺ Nikon F6 និង Nikon FM10៕

ប្រភព៖ petapixel ប្រែសម្រួល៖ សុខហេង