ចម្ងល់រឿងគីឡូភ្លើងប្រែប្រួល អាជ្ញាធរអគ្គិសនីចេញមុខពន្យល់
- 2018-06-01 09:00:35
- ចំនួនមតិ 0 | ចំនួនចែករំលែក 0
ចម្ងល់រឿងគីឡូភ្លើងប្រែប្រួល អាជ្ញាធរអគ្គិសនីចេញមុខពន្យល់
ចន្លោះមិនឃើញ
អាជ្ញាធរអគ្គិសនីកម្ពុជាលើកឡើងថាចំនួនគីឡូអគ្គិសនីដែលប្រជាពលរដ្ឋប្រើប្រាស់សព្វថ្ងៃអាចមានការប្រែប្រួលអាស្រ័យលើរយៈពេល និងលក្ខខណ្ឌនៃការប្រើប្រាស់ឧបករណ៍ក្នុងផ្ទះបើទោះចំនួនឧបករណ៍ទាំងនោះនៅដដែលក៏ដោយ។
ទំនងជាចង់ឆ្លើយបំភ្លឺនៅនឹងប្រជាពលរដ្ឋមួយចំនួនដែលបានរអ៊ូតាមបណ្តាញសង្គមហ្វេសប៊ុកពីចំនួនគីឡូអគ្គិសនីខែថ្មីខុសគ្នាច្រើនពីខែចាស់ អាជ្ញាធរអគ្គិសនីកម្ពុជាកាលពីថ្ងៃទី២៥ ខែឧសភា បានពន្យល់ពីនីតិវិធីស្នើសុំការផ្ទៀងផ្ទាត់នាឡិកាអគ្គិសនី និងមូលហេតុនាំឲ្យចំនួនគីឡូអគ្គិសនីប្រែប្រួល។
នៅលើបណ្តាញសង្គមហ្វេសប៊ុករបស់ខ្លួន អាជ្ញាធរអគ្គិសនីសរសេរថា៖ «សូមកុំយល់ច្រឡំថា ឲ្យតែឧបករណ៍ប្រើអគ្គិសនីរបស់ខ្លួននៅដដែល គីឡូអគ្គិសនីដែលខ្លួនប្រើតាមខែត្រូវតែនៅដដែលដែរនោះ គីឡូអគ្គិសនីដែលអ្នកប្រើទោះជាឧបករណ៍ប្រើប្រាស់នៅដដែលក៏ដោយ ឬទោះជាសមាជិកគ្រួសារតិចឬច្រើនក៏ដោយ ក៏វាប្រែប្រួលទៅតាមរយៈពេល និងលក្ខខណ្ឌដែលឧបករណ៍នីមួយៗបើកប្រើ ។ ដូច្នេះ ចង់ឲ្យគីឡូចុះតិចត្រូវបើកឧបករណ៍នីមួយៗឲ្យរយៈពេលតិចជាងមុន និងត្រូវចងចាំថាឧបករណ៍ណាមួយក៏ដោយក៏អាចធ្វើឲ្យឡើងគីឡូអគ្គិសនីដែរ បើបើកវាប្រើ»។
ក្នុងករណីអ្នកប្រើប្រាស់សង្ស័យថានាឡិកាវាស់ស្ទង់ដើរមិនប្រក្រតី អាជ្ញាធរអគ្គិសនីកម្ពុជាថាប្រជាពលរដ្ឋអាចដាក់ពាក្យស្នើសុំធ្វើការផ្ទៀងផ្ទាត់បាន ដោយការងារនេះមន្ត្រីអគ្គិនីធ្វើជូនប្រជាពលរដ្ឋដោយមិនគិតកម្រៃ។
បើផ្ទៀងផ្ទាត់ហើយអ្នកប្រើប្រាស់នៅតែមិនអស់ចិត្ត អាជ្ញាធរអគ្គិសនីឲ្យដឹងថាអ្នកប្រើប្រាស់អាចរកទិញនាឡិកាស្ទង់ណាដែលខ្លួនទុកចិត្ត ហើយស្នើខាងមន្ត្រីអគ្គិសនីដាក់វាស់ទន្ទឹមគ្នាជាមួយនាឡិកាចាស់ក្នុងរយៈពេលបីខែ។ ក្នុងករណីថារកឃើញភាពខុសគ្នា អាជ្ញាធរអគ្គិនីថាខ្លួននឹងរកខុសត្រូវជូនដល់អ្នកប្រើប្រាស់។
អាជ្ញាធរអគ្គិសនីសរសេរទៀតថា៖ «ដូច្នេះបើចង់បានភាពត្រឹមត្រូវសូមធ្វើតាមនីតិវិធីខាងលើ ប៉ុន្តែបើចង់តែឃើញគីឡូតិចដោយមិនសំអាងលើជញ្ជីងអគ្គិសនីទេ យើងខ្ញុំជាអាជ្ញាកណ្តាលពិតជាមិនអាចធ្វើជូនបានទេ ពីព្រោះការទិញលក់អគ្គិសនីត្រូវតែឈរលើមូលដ្ឋាននៃជញ្ជីងវាស់អគ្គិសនី មិនអាចសំអាងលើការប្រៀបធៀបថាគីឡូខែនេះតិចឬច្រើននោះទេ»៕