រង្វង់មូលច្រកទ្វារព្រំដែនអន្តរជាតិប៉ោយប៉ែតថ្មី ស្អាតខ្លាំង បង្កប់អត្ថន័យអស្ចារ្យបំផុត
- 2018-06-02 02:18:01
- ចំនួនមតិ 0 | ចំនួនចែករំលែក 0
រង្វង់មូលច្រកទ្វារព្រំដែនអន្តរជាតិប៉ោយប៉ែតថ្មី ស្អាតខ្លាំង បង្កប់អត្ថន័យអស្ចារ្យបំផុត
ចន្លោះមិនឃើញ
គម្រោងសាងសង់រង្វង់មូលថ្មីក្រុងប៉ោយប៉ែត ទើបតែបើកការដ្ឋានកាលពីខែកុម្ភៈ ឆ្នាំ២០១៨នេះ មិនត្រឹមតែមានរចនាបថដ៏ស្រស់ស្អាតបែបលក្ខណៈខ្មែរសុទ្ធសាធប៉ុណ្ណោះទេ តែថែមទាំងបង្កប់អត្ថន័យដ៏អស្ចារ្យទៀតផង។ នៅលើរង្វង់មូលតែមួយ តែបានរំលេចនូវប្រាង្គប្រាសាទដ៏អច្ឆរិយរបស់កម្ពុជា ដូចជា៖ ប្រាសាទអង្គរវត្ត ប្រាសាទព្រះវិហារ ប្រាសាទបន្ទាយស្រី ព្រមទាំងមានឈ្មោះរាជធានី នៃខេត្តទាំង២៥របស់ខ្មែរ។ ជាពិសេសនោះ ក៏មានរំលេចឲ្យឃើញពីដើមត្នោត ដែលជាតំណាងឲ្យទឹកដីកម្ពុជាដ៏សម្បូររុងរឿង។
ការសាងសង់រង្វង់មូលធ្វើឡើង ដោយរំកិលប្រាសាទកំពូលបីពីក្លោងទ្វារមុខទីស្នាក់ការត្រួតពិនិត្យច្រកទ្វារព្រំដែនអន្តរជាតិចាស់ យកមកតម្កល់ ដោយរៀបចំគម្រោងប្លង់ទម្រប្រាសាទខាងលើបន្ថែមរចនាបទជាប្រាង្គប្រាសាទចំនួន ៥ថ្នាក់ ដោយថ្នាក់នីមួយៗតម្កល់រូបបដិមាផ្សេងៗ ទុកជាទីសក្ការតាមទំនៀមទម្លាប់ សាសនា និងរចនាបថស្ថាបត្យកម្មតាមប្រពៃណីខ្មែរយើង។ នេះបើតាមប្រសាសន៍របស់លោក សាន ស៊ានហូ អភិបាលក្រុងប៉ោយប៉ែត ធ្លាប់បានឲ្យដឹងកន្លងមក។
រង្វង់មូលនេះមានជើងក្រោមទំហំរហូតដល់ទៅ ៤០ម៉ែត្រ និងមានកម្ពស់ប្រមាណជា ២៣ម៉ែត្រ។ ការស្ថាបនាត្រូវចំណាយរយៈពេល៦ខែ ដោយធ្វើទាំងថ្ងៃទាំងយប់ និងប៉ាន់ប្រមាណក្នុងការចំណាយអស់ថវិកាប្រមាណ ៥០ម៉ឺនដុល្លារអាមេរិក។
ច្រកទ្វារអន្តរជាតិក្រុងប៉ោយប៉ែត ដែលមានទីតាំងជាប់នឹងស្រុកអារញ្ញប្រាថេតរបស់ប្រទេសថៃ គឺជាច្រកដ៏សំខាន់មួយរបស់កម្ពុជា។ បច្ចុប្បន្នភាព ក្រៅពីការដោះដូរទំនិញ ច្រកមួយនេះបានដើរតួនាទីដ៏សំខាន់សម្រាប់ការចេញចូលរបស់អ្នកទេសចរអន្តរជាតិ៕