បោះទុនរកស៊ីរួមគ្នារាប់ម៉ឺនពិតមែន បូព្រឹក្ស និង ដេវីដ សុំធ្វើត្រឹមសង្សារសិន មិនខ្វល់រឿងរៀបការ

2018-06-03 06:36:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីជាកញ្ញា ទេព បូព្រឹក្ស និងតារាច្រៀងរ៉េប លោក ងួន ចាន់ដេវីត បានប្រកាសពីទំនាក់ទំនងស្នេហាជាសាធារណៈ ហើយថែមទាំងបានបោះទុនរកស៊ីរួមគ្នារហូតដល់១៤ម៉ឺនដុល្លារ កាលពីពេលថ្មីៗនេះក៏ពិតមែន ប៉ុន្តែគូស្នេហ៍១គូនេះនៅ មិនទាន់មានគម្រោងភ្ជាប់ពាក្យ ឬរៀបការបំពេញមុខមាត់ចាស់ទុំនៅឡើយទេ គឺ សុំត្រឹមតែធ្វើជាសង្សារគ្នាសិនប៉ុណ្ណោះ។

(រូបភាពពីហ្វេសប៊ុក ទេព បូព្រឹក្ស)

ជិត១ឆ្នាំហើយ ដែលកញ្ញា ទេព បូព្រឹក្ស និងតារាច្រៀងរ៉េប លោក ងួន ចាន់ដេវីត បានប្រកាសពីទំនាក់ទំនងស្នេហាជាសាធារណៈ ពោលគឺចាប់តាំងពីពួកគេបានចាប់ដៃច្រៀងជាមួយគ្នាជាបន្តបន្ទាប់។ រយៈពេលនេះ អ្នកទាំងពីរបានធ្វើរឿងផ្អែមល្ហែមជាច្រើនឲ្យមហាជនក៏ដូចជា Fans របស់ពួកគេចាប់អារម្មណ៍ដូចជា ការទិញវត្ថុអនុស្សាវរីយ៍ឲ្យគ្នាទៅវិញទៅមក ការថត Pre-Wedding ហើយថ្មីៗនេះបានបោះទុនរកស៊ីហាង Cosmestic រហូតដល់ទៅ១៤ម៉ឺនដុល្លារថែមទៀតផង។

ដេវីត បានឲ្យដឹងថា ចាប់តាំងពីពួកខ្លួនមានទំនាក់ទំនងស្នេហាជាមួយគ្នាមក មានទាំងរឿងសប្បាយចិត្ត មានទាំងរឿងអន់ចិត្តក្នុងនោះលោកថា បូព្រឹក្ស ជាអ្នកដែលប្រច័ណ្ឌនឹងលោកច្រើន។ ជុំវិញការលើកឡើងនេះវិញ បូព្រឹក្ស និយាយថា មិនមែនប្រច័ណ្ឌតែនាងម្នាក់ទេ ដេវីត ក៏ធ្លាប់ប្រច័ណ្ឌខ្លួនដូចគ្នា តែបែបនេះក្ដីនាងថា ធម្មតាអ្នកមានស្នេហាតែប៉ុណ្ណឹង ការប្រច័ណ្ឌហួងហែង អត់ចិត្តគ្នាជារឿងធម្មតា សំខាន់ចេះសម្របគ្នាវិញទៅ គឺអូខេហើយ។

ដេវីត ក៏ដូចជា បូព្រឹក្ស បានលើកឡើងថា ពួកខ្លួនមិនទាន់មានគម្រោងភ្ជាប់ពាក្យ ឬចង់រៀបការនៅឡើយទេ គឺសុំត្រឹមជាសង្សារសិន រង់ចាំការធ្វើជំនួញរួមគ្នាជោគជ័យសិន ត្បិតអីដូចបានលើកឡើងខាងលើ អ្នកទាំងពីរទើបតែបោះទុនរកស៊ីរួមគ្នា អីចឹងចង់ឲ្យការរកស៊ីដំណើរបានល្អសិន។

ការមិនទាន់សម្រេចចិត្តភ្ជាប់ពាក្យ ដើម្បីឲ្យចាស់ទុំដឹងឮនេះ បូប្រឹក្ស ក៏ដូចជា ដេវីដ មិនខ្វល់ពីមតិមហាជន រិះគន់លើទំនាក់ទំនងស្នេហាខ្លួនឡើយ ហើយប្រសិនបើទៅថ្ងៃខាងមុខ ពួកគេមិនអាចបន្តទៅមុខ ក៏អ្នកទាំងពីរមិនស្ដាយក្រោយឡើយ។"សុំត្រឹមសង្សារសិន ចាំយើងរឹងដៃរឹងជើងសិន តែបើថ្ងៃក្រោយ មិនអាចបន្តជាមួយគ្នា ក៏តាមហ្នឹងទៅ " បូព្រឹក្ស លើកឡើង។

ក្រៅពីបោះទុករកស៊ីរួមគ្នា គូស្នេហ៍១គូនេះក៏គ្រោងចេញបទចម្រៀងរួមគ្នាជាបន្តបន្ទាប់ផងដែរ ប៉ុន្តែមិនទាន់បញ្ចេញភ្លាមៗឡើយរង់ចាំពេលវេលាហុចឲ្យសិន ហើយកន្លងមកអ្នកទាំង២ធ្លាប់បានចេញបទចម្រៀងរួមគ្នាបានចំនួន៥បទរួចមកហើយដែរ៕

អត្ថបទៈ ស៊ុនហួត