“Solo” ខាតបង់ដើមទុន៥០លានដុល្លារ និងក្លាយជារឿង Star Wars ដំបូងបរាជ័យសម្រាប់ Disney
- 2018-06-05 04:15:00
- ចំនួនមតិ 0 | ចំនួនចែករំលែក 0
“Solo” ខាតបង់ដើមទុន៥០លានដុល្លារ និងក្លាយជារឿង Star Wars ដំបូងបរាជ័យសម្រាប់ Disney
ចន្លោះមិនឃើញ
ភាពយន្តថ្មីរបស់ Disney, Lucas Film “Solo: A Star Wars Story” បរាជ័យយ៉ាងធ្ងន់ធ្ងរនៅតាមបណ្ដា Box Office ទូទាំងពិភពលោក ដោយត្រូវគេរំពឹងថានឹងរកចំណូលបានតែខ្ទង់ ៤០០លានដុល្លារតែប៉ុណ្ណោះ។
វាគឺជារឿងដែលគួរឲ្យភ្ញាក់ផ្អើលមួយ ដោយសារតែ "Solo” សាច់រឿងនិយាយពីតួអង្គ Han Solo រកចំណូលបានតិចជាងការរំពឹងទុក គឺបានតែខ្ទង់៨០លានដុល្លារប៉ុណ្ណោះសម្រាប់សប្ដាហ៍ដំបូង ដោយបានប៉ាន់ស្មានថាសប្ដាហ៍ដំបូងអាចរកបានខ្ទង់ជាង១០០លានដុល្លារ។ នេះគឺជាលើកទី១ហើយ ដែលភាពយន្តផលិតដោយ Disney សម្រាប់សែស្រឡាយរឿង Star Wars ខាតបង់ប្រាក់ដើមទុន។
លោក Barton Crockett អ្នកវិភាគប្រចាំ Wall Street បានឲ្យដឹងថា "Solo” អាចនឹងខាតបង់ជាង៥០លានដុល្លារ។ នេះបើគិតត្រឹមតែប្រាក់ចំណូលបានមកពីការដាក់បញ្ចាំងតែប៉ុណ្ណោះ ចំពោះការរកចំណូលបានមកពីការលក់ DVD ឬលក់តាមរយៈអ៊ីនធឺណិតនៅថ្ងៃអនាគតគឺមិនទាន់ដឹងនៅឡើយ។
គិតត្រឹមពេលនេះ ភាពយន្ត "Solo” ដឹកនាំរឿងដោយលោក Ron Howard មើលទៅមិនអាចរកចំណូលបានច្រើនជាង ៤០០លានដុល្លារនោះឡើយគិតទូទាំងពិភពលោក។ ជាមួយនឹងដើមទុនផលិត ២៥០លានដុល្លារ និងរាប់លានដុល្លារទៀតចំណាយដើម្បីផ្សព្វផ្សាយ ភាពយន្តនេះប្រាកដជាខាតច្រើន។
ដោយសារតែសែស្រឡាយរឿង Star Wars តែងតែទទួលបានជោគជ័យនៅ Box Office ដូចជា "Force Awakens” រកចំណូលបាន ២,០៦៨ប៊ីលានដុល្លារ "Rogue One: A Star Wars Story” រកចំណូលបាន ១,០៥៦ប៊ីលានដុល្លារ និង "The Last Jedi” រកចំណូលបាន ១,៣៣២ប៊ីលានដុល្លារ ដូច្នេះគ្មានអ្នកណារំពឹងទុកថា "Solo” នឹងទទួលបរាជ័យដុនដាបដល់ថ្នាក់នេះនោះទេ៕