ពូកែច្នៃប្រឌិតមែន! ឌុច លីដា ប្រើគ្រឿងសម្អាងគូរគំនូរដំបូងរបស់ខ្លួន

2018-06-07 01:54:48
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបគំនូរមួយផ្ទាំងដែលកញ្ញា ឌុច លីដា បង្ហោះលើបណ្ដាញសង្គមពិតជាធ្វើឲ្យអ្នកគាំទ្រកោតសរសើរនិងមិនដែលដឹងថា តារាសម្ដែងរូបនេះមានទេពកោសល្យលើផ្នែកនេះពីមុនមកទេ។

រូបមនុស្សស្រីស្លៀករ៉ូបវែងអូសដី បញ្ចេញសាច់ខ្នង ជាផ្ទាំងគំនូរដែលតារាសម្ដែងពោរពេញដោយប្រជាប្រិយភាពរូបនេះ ចំណាយពេលត្រឹម១០នាទី ដោយប្រើគ្រឿងសម្អាងដូចជាក្រែម គូល័រផាត់ភ្នែក ថ្នាំលាបក្រចកព្រមទាំងខ្មៅដៃគូសចិញ្ចើមគូរចេញជារូបគំនូរ ពេញដោយភាពច្នៃប្រឌិត។

មហាជនជាច្រើនគិតថា លីដា ប្រហែលធ្លាប់ហាត់រៀនគូរគំនូរពីមុនមកហើយ ទើបបានជាគូបានស្អាតមិនចាញ់អ្នកជំនាញដូច្នេះ។ តួឯកក្នុងរឿង "សមុទ្រទឹកភ្នែក" ប្រាប់ថា មិនធ្លាប់បានរៀនអ្វីពាក់ព័ន្ធនឹងផ្នែកនេះពីមុនមកទេ គឺជាគំនូរគ្មានគ្រូ គ្រាន់តែពេលទំនេរ លីដា មើលគេគូតាម FB និងYoutube ប៉ុណ្ណោះ។

ម្យ៉ាងទៀត លីដា ឧស្សាហ៍មើលគំនូរ ដែលបណ្ឌិត ឯម រៀម បានជូនក្នុងថ្ងៃខួបកំណើត ទើបចេះតែបណ្ដាលចិត្តឲ្យចង់គូរគំនូរ ប៉ុន្តែមិនមានឱកាស។ ឆ្លៀតពេលទំនេរនៅផ្ទះ កញ្ញា ក៏សាកល្បងគូររូបនិងបង្ហោះលេងតែម្ដងទៅ។

“រូបហ្នឹងខ្ញុំគូលេង ហើយគិតថាខ្លួនឯងគូមិនស្អាតនោះទេ។ ពេលមើលរូបបង ឯម រៀម ឃើញគាត់គូរូបស្អាត ធ្វើឲ្យខ្ញុំមានចិត្តចង់គូរដែរ"។ ស្រីស្អាត ឌុច លីដា បញ្ជាក់។

តារាសម្ដែងកំពុងលេចធ្លោរូបនេះប្រាប់ថា នាងស្រលាញ់ការគូរគំនូរ ប៉ុន្តែពុំមានបំណងក្លាយជាជាងគំនូរនៅថ្ងៃអនាគតនោះទេ ព្រោះយល់ថាសមត្ថភាពលើផ្នែកនេះនៅមានកម្រិត៕