ក្រុមជើងឯកជាតិ Dota 2 ចូលរួមប្រកួតជើងឯកកម្រិតអាស៊ី
- 2018-06-07 03:10:24
- ចំនួនមតិ 0 | ចំនួនចែករំលែក 0
ក្រុមជើងឯកជាតិ Dota 2 ចូលរួមប្រកួតជើងឯកកម្រិតអាស៊ី
ចន្លោះមិនឃើញ
សហព័ន្ធកីឡាអេឡិចត្រូនិកកម្ពុជាសហការជាមួយក្រុមហ៊ុន Westes Media Limited រៀបចំការប្រកួតកីឡាជើងឯក Dew Gaming 2018 សម្រាប់វិញ្ញាសាពេញនិយម Dota2 ដែលឧបត្ថម្ភដោយភេសជ្ជៈ Mountain Dew ដើម្បីជ្រើសរើសក្រុមខ្លាំងមួយចូលរួមប្រកួតជើងឯកកម្រិតអាស៊ី MPFL Asian Championship។
ក្នុងសន្និសីទសារព័ត៌មានប្រកាសរៀបចំការប្រកួតកាលពីរសៀលថ្ងៃពុធ ទី៦ ខែឧសភា ចូលរួមអធិបតីដោយឯកឧត្តម ជា ច័ន្ទបរិបូណ៌ អនុប្រធានសហព័ន្ធកីឡាអេឡិចត្រូនិកកម្ពុជា លោក លន់ សាមឌី អគ្គលេខាធិការសហព័ន្ធ និងតំណាងក្រុមហ៊ុន។
លោក លន់ សាមឌី បានឲ្យដឹងថា តាមពិតទៅការប្រកួតជើងឯក Dew Gaming 2018 នៅកម្ពុជាមានជម្រុះ៣ដំណាក់កាលគឺជម្រុះជុំទី១ថ្ងៃទី៥-៦ ខែឧសភាកន្លងទៅ ជម្រុះជុំទី២ពីថ្ងៃទី១៥-១៦ ខែកញ្ញា និងជុំផ្តាច់ព្រ័ត្រនៅខែវិច្ឆិកា ចុងឆ្នាំ២០១៨។ សរុបក្រុមទាំងអស់ដែលចូលរួមប្រកួតគឺ៨ក្រុម។
លោកបន្តថា បន្ទាប់ពីបញ្ចប់ការប្រកួតជម្រុះជុំទី១កាលពីថ្ងៃទី៥-៦ ខែឧសភាកន្លងទៅនេះ ក្រុមដែលទទួលបានចំណាត់ថ្នាក់លេខ១គឺ Xit Woundz ដែលជាអតីតក្រុម IQ ជាជើងឯកកីឡាអេឡិចត្រូនិកថ្នាក់ជាតិឆ្នាំ២០១៦ និង២០១៧ក្នុងវិញ្ញាសា Dota2។ សូមបញ្ជាក់ថា សមាជិក IQ ម្នាក់គឺ កីឡាករ អ៊ូ ម៉េង បានចាកចេញពីក្រុមហើយដោយត្រូវក្រុមហ៊ុនកូរ៉េខាងត្បូង KongDoo Company យកទៅដោយចុះកុងត្រារយៈពេលមួយឆ្នាំដោយផ្តល់ប្រាក់ខែជាង១០០០ដុល្លារក្នុង១ខែ មានខុនដូសម្រាប់ស្នាក់នៅ មានគ្រូបង្ហាត់ និងអាហារ សម្រាប់ការប្រកបអាជីពកីឡា E-Sport នៅទីនោះ។
ដូច្នេះក្រុម Xit Woundz ដែលធ្លាប់ទទួលបានជោគជ័យទាំងថ្នាក់ជាតិ ជើងឯកនៅឥណ្ឌា និងលទ្ធផលល្អប្រសើរជាច្រើនក្នុងតំបន់កន្លងមកត្រូវតំណាងឲ្យកម្ពុជាដើម្បីចូលរួមប្រកួតវគ្គជម្រុះជាមួយក្រុមមកពី១០ប្រទេសគឺ មីយ៉ាន់ម៉ា សិង្ហបុរី ឥណ្ឌូណេស៊ី វៀតណាម ឡាវ ម៉ាឡេស៊ី អូស្ត្រាលី ហ្វីលីពីន ឥណ្ឌា និងថៃ។ ការប្រកួតវគ្គជម្រុះនេះដើម្បីស្វែងក្រុមខ្លាំងចំនួន៣គឺ Top 3 ដើម្បីទៅប្រកួតជើងឯកអាស៊ី MPGL Asian Championship នៅប្រទេសថៃដែលជាម្ចាស់ផ្ទះនាខែកក្កដា ខាងមុខនេះដោយក្រុម១ទៀតមកពីប្រទេសចិនចូលរួម។ ដូច្នេះជើងឯក MPGL Asian Championship នេះក្រុមមកពីប្រទេសចិនរង់ចាំស្រាប់ ខណៈ៣ក្រុមផ្សេងទៀតត្រូវប្រកួតជម្រុះក្នុងចំណោម១០ប្រទេសខាងលើ។
ឯកឧត្តម ជា ចន្ទបរិបូណ៌បានលើកឡើងថា កីឡាអេឡិចត្រូនិកកំពុងរីកចម្រើនជាលំដាប់នៅក្នុងប្រទេសកម្ពុជា បន្ទាប់ពីមានសកម្មភាពជាបន្តបន្ទាប់។ កីឡា E-Sports ខុសពីកីឡាផ្សេងៗទៀតក្នុងការអនុវត្ត និងហ្វឹកហាត់។ កីឡាផ្សេងៗត្រូវអញ្ជើញគេមកប្រកួត ឬត្រូវចេញទៅក្រៅប្រទេសទើបប្រកួតគ្នាបាន ប៉ុន្តែ E-Sports ងាយស្រួលណាស់ កីឡាករក្នុងប្រទេសនីមួយប្រកួតគ្នាតាមអនឡាញ ហើយមានបទពិសោធប៉ះគ្នាច្រើន ដូច្នេះក្រុមមកពីប្រទេសនីមួយអាចដឹងពីសមត្ថភាពរបស់ក្រុមប្រទេសផ្សេងទៀត។ ឯកឧត្តមបានអរគុណដល់គ្រប់បណ្តាញសារព័ត៌មានទាំងអស់ដែលបានជួយផ្សព្វផ្សាយអំពីកីឡា E-Sports ដែលជាផ្នែកដ៏សំខាន់ផ្តល់ព័ត៌មានដល់មហាជនឲ្យបានដឹងថាអ្វីទៅជា E-Sports។
សម្រាប់ការប្រកួត Dew Gaming 2018 នៅកម្ពុជាមានប្រាក់រង្វាន់សរុប ១ ៣០០០ដុល្លារអាមេរិក ប៉ុន្តែគេមិនទាន់បែងចែកចំនួនប៉ុន្មានសម្រាប់ជើងឯក ជើងឯករង និងក្រុមចំណាត់ថ្នាក់ផ្សេងទៀតឡើយ។ ចំពោះជើងឯកអាស៊ី MPGL Asian Championship រៀបចំ និងឧបត្ថម្ភដោយក្រុមហ៊ុន Mieski របស់ប្រទេសហ្វីលីពីន។
ការប្រកួត Dota2 នៅកម្ពុជាបានរៀបចំម្តងហើយកាលពីឆ្នាំ២០១៧ដែលពេលនោះក្រុម IQ ដែលដូរឈ្មោះបច្ចុប្បន្ន Xit Woundz ៕