មហិច្ឆតាខ្ពស់ៗ...សិល្បករខ្មែរប៉ុន្មានរូបនេះ សុខចិត្តបង្កើត Franchise ក្នុងស្រុក មិនខ្ចីទិញពីបរទេស!

2018-06-07 03:52:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោមឥទ្ធិពលនៃសកលភាវូបនីយកម្ម ផ្សំនឹងការកើនឡើងកម្រិតជីវភាពរបស់ប្រជាពលរដ្ឋ បាននាំដល់ទំនោរផ្សារភ្ជាប់ជីវិតបែប Modern Life របស់បងប្អូនប្រជាពលរដ្ឋខ្មែរ ពិសេសយុវវ័យ កាន់តែផុលផុស។ ទាំងនេះ ជាមូលហេតុដែលអាជីវកម្មប្លែកៗ ពេញនិយមនៅបរទេសជារួម គឺអាជីវកម្ម Franchise បរទេសជាច្រើន បានហូរចូលមកកម្ពុជាដូចទឹកបាក់ទំនប់។

យ៉ាងណាក៏ដោយ ក៏មិនមានន័យថា ទីនេះជាទីផ្សារផ្ដាច់មុខរបស់ពាណិជ្ជកម្មបរទេសនោះដែរ ស្របពេលដែលគេឃើញអាជីវកម្មបង្កើតឡើងក្នុងស្រុក ក៏មានហូរហែដែរ ដូចជា "កាហ្វេដី" "ទ្រូកាហ្វេ" "ទូកត្នោតកាហ្វេ" ជាដើម។ នៅក្នុងសង្គមសិល្បៈ ក៏ដូចគ្នា ដែលមានសិល្បករវ័យក្មេងកម្ពុជាប៉ុន្មានរូប កំពុងក្រាញននៀលជាមួយស្លាកសញ្ញា ឬពាណិជ្ជនាមបង្កើតដោយខ្លួនឯងនេះ ក្នុងមហិច្ឆតាខ្ពស់រៀងខ្លួន។

សិល្បករទាំងនោះមាន៖

១.រ៉ូណាន ចាន់ណា និងទ្រី ដារ៉ាវុធ៖ អ្នកនិពន្ធ និងដឹកនាំរឿង រ៉ូណាន ចាន់ណា បានចាប់ដៃគូជាមួយតារាសម្ដែង ទ្រី ដារ៉ាវុធ បង្កើតអាជីវកម្មលក់កាហ្វេកាលពីដើមឆ្នាំនេះ នៅទឹកដីឃុំព្រែកតាមាក់។ ដោយសារតែពួកគេជាបុគ្គលសិល្បៈ អាជីវកម្ម សហកម្មសិទ្ធិនេះ ត្រូវបានដាក់ឈ្មោះថា "Artist Coffee”។ ម្ចាស់អាជីវកម្មទាំងពីរធ្លាប់បង្ហើបថា លោកនឹងតស៊ូជាមួយអាជីវកម្មមួយនេះ នឹងមានផែនការពង្រីកឲ្យកាន់តែធំនាពេលអនាគត។

២.សុវណ្ណា ហ្គិច ឬ ប្រាក់ ហ្គិច៖ ដូចនឹងមិត្តរួមអាជីពខាងលើ តារាសម្ដែងដែលទើបត្រឡប់មកសិល្បៈវិញ ក្រោយផ្អាក២ឆ្នាំរូបនេះ កំពុងគ្រប់គ្រងអាជីវកម្មកាហ្វេ និងភេសជ្ជៈដូចគ្នាដែរ។ ហ្គិច បានដាក់ឈ្មោះអាជីវកម្មពេញនិយមសម្រាប់យុវវ័យថា "Frame Tea” មានទីតាំងនៅតំបន់បឹងកេងកង។

ម្ចាស់អាជីវកម្មវ័យក្មេងរូបនេះអះអាងថា បើទោះទើបដំណើរការមិនទាន់បាន១ឆ្នាំក្ដី ប៉ុន្តែដោយសារថា ទទួលបានការគាំទ្រ មកដល់បច្ចុប្បន្ន អាជីវកម្មបម្រើភេសជ្ជៈរបស់នាង បានពង្រីកសាខាចំនួន៣ហើយ គឺនៅរាជធានីភ្នំពេញ១កន្លែង និងនៅខេត្តសៀម២កន្លែង។ តួស្រីក្នុងរឿង "គូស្នេហ៍រុងរឿង" បញ្ជាក់ថា នាងនឹងខំពង្រីកអាជីវកម្មនេះ ព្រោះនាងក៏មានគម្រោងលក់ Franchise នេះដែរ នាពេលអនាគត។

៣.ម៉ាក សែនសូនីតា៖ ស្រីស្អាតរូបនេះហាក់លេចធ្លោជាងគេ ក្នុងចំណោមសិល្បករជាម្ចាស់អាជីវកម្ម Franchise ក្នុងស្រុកខាងលើ។បច្ចុប្បន្ន តូតា គឺជាថៅកែស្រីលើអាជីវកម្មបម្រើអាហារសមុទ្រឈ្មោះថា "ផែសមុទ្រ" ចំនួន៣សាខា។ សមិទ្ធផលនេះ គឺជាភាគហ៊ុននាង ជាមួយចាងហ្វាងផលិតកម្មអង្គរភិចឈ័រ លោក ប៉ុល វិបូ ហៅ នីត ជាសង្សារ។

តូតា ហាក់ឈានមុខមួយជំហានលើមិត្តរួមអាជីព ក្នុងអាជីវកម្មបង្កើត Franchise ខ្លួនឯងនេះ ព្រោះថា នាងបានលក់ចេញ Franchise នាងមួយរួចទៅហើយ ដែលមានតម្លៃដល់ទៅជិត១០ម៉ឺនដុល្លារអាមេរិកឯណោះ បើទោះទើបដំណើរការបានប្រមាណកន្លះឆ្នាំក្ដី។ តារាសម្ដែងល្បីឈ្មោះរូបនេះ បានប្រាប់ឲ្យដឹងថា តាមផែនការ នាងនឹងពង្រីក "ផែសមុទ្រ" ឲ្យបាន១២សាខានៅក្នុងរាជធានី។

អាជីវកម្ម Franchise ត្រូវបានគេស្គាល់ថា គឺជាគំរូអាជីវកម្មទិញលក់សិទ្ធិសម្រាប់ធ្វើអាជីវកម្មបន្ត ក្រោមការផ្ដល់នូវគំរូ ឬរូបមន្តយ៉ាងជាក់លាក់ទៅប្រតិបត្តិករអាជីវកម្មថ្មី(អ្នកទិញសិទ្ធិបន្ត)ពីម្ចាស់ដើមនៃអាជីវកម្ម។ អាជីវកម្មសម័យទំនើបមួយនេះ ត្រូវបានអ្នកជំនាញអះអាងថា មានទាំងភាពងាយស្រួល មានទាំងហានិភ័យ។

ភាពងាយស្រួល គឺថា អ្នកមិនមានបទពិសោធន៍អាជីវកម្មជ្រៅជ្រះក៏អាចរកស៊ីបានដែរ ព្រោះតែគំរូ និងរូបមន្តលើសេវាកម្ម និងយុទ្ធសាស្ត្រទីផ្សារ ត្រូវបានផ្ដល់ជាស្រេចពីម្ចាស់ដើមហៅថា Franchisor ។ ប៉ុន្តែការទិញសិទ្ធិ Franchise ពីបរទេស ត្រូវការចំណាយខ្ពស់ និងត្រូវរ៉ាប់រងការចំណាយច្រើនទៅឲ្យម្ចាស់ដើមអាជីវកម្ម និងភ្ជាប់ជាមួយលក្ខខណ្ឌច្រើនទៀត។ ការចំណាយទាំងនោះ មានរាប់ចាប់ពីដំណាក់កាលមុនអាជីវកម្មដំណើរការ ពេលកំពុងដំណើរការ រួមទាំងការប្រតិបត្តិការផង។ ទាំងនេះ រាប់ជាហានិភ័យ របស់ Franchise ទិញសិទ្ធិពីបរទេស ព្រោះប្រសិនបើការអាជីវកម្មមិនទទួលបានការគាំទ្រ ប្រឈមនឹងដួលរលំទៅវិញក្នុងរយៈពេលខ្លីបំផុត៕

អត្ថបទ៖ ទារិកា