អាថ៌កំបាំង ៥យ៉ាងខ្ទេចខ្ទី ពីក្រោយឡេលាយតាមផ្សារ មាន១គ្រោះថ្នាក់ខ្លាំង អ្នកប្រើមិនធ្លាប់ដឹង

2018-06-08 04:20:02
ចំនួនមតិ 0 | ចំនួនចែករំលែក 0

ចន្លោះមិនឃើញ

បងប្អូននារីៗច្បាស់ជាធ្លាប់ស្គាល់ហើយឡេលាយថ្លឹងគីឡូ ដាក់ធុង ដោយប្រើរូបមន្តចេះតគ្នា មានន័យថា ចេះតែម្នាក់ គឺអាចជួយបង្រៀនគ្នា លាយ ឬវៃឡេ បែកផ្សែង លក់រាប់ខែ រាប់ឆ្នាំកក្រើកតាមផ្សារ និងតាម Online។

មានរឿងរ៉ាវ ៥យ៉ាងនៅពីក្រោយឡេលាយ ដែលអ្នកប្រើមិនដែលដឹង។

អ្នកលក់ឡេ ឲ្យដឹងថា ជាការពិតឡេលាយ ដាក់ធុង ថ្លឹងគីឡូ មានអាថ៌កំបាំង ៥ចំណុច ដែលកម្រមានអ្នកទិញបានដឹង ព្រោះវាជាឆ្នាំងបាយរបរលក់ឡេ មិនងាយទម្លាយឲ្យគេដឹងផ្ដេសផ្ដាសទេ។

ប្រភពពីអ្នកធ្លាប់លាយឡេលក់ មួយរូប ក្នុងលក្ខខណ្ឌមិនបង្ហាញឈ្មោះ បានប្រាប់ Sabay ថា តាមបទពិសោធផ្ទាល់ និងការប្រឡូកក្នុងវិស័យកែសម្ផស្ស អ្នកស្រី បានបង្ហើប ចំណុច៥នេះ នៃឡេលាយ គឺមានដូចជា កាលីបតម្លៃ Brand ឬអេតចាយ រូបមន្តលាយ ផលប៉ះពាល់សុខភាព ទីតាំងលក់ និងការវេចខ្ចប់។

រូបថត ឡេលាយ (ប្រភពរូប Internet)

**១.កាលីបតម្លៃ Brand ឬអេតចាយ**

ចំណុចនេះត្រូវបានអ្នកលក់ បែងចែកជា២ធំៗ ដែលកំពុងវាយលុកទីផ្សារ មានឡេលាយតម្លៃថ្លៃ Brand និងថោកៗ ឬហៅថាអេតចាយ តាមតម្រូវការអ្នកទិញ។ ឡេលាយតម្លៃថោកៗ ចន្លោះពី ២៥ដុល្លារ ក្នុង១គីឡូក្រាម រីឯឡេលាយថ្លៃៗ តម្លៃចន្លោះពី ៥០ដុល្លារ ទៅ ១២០ ឬ១៥០ដុល្លារ ក្នុង១គីឡូក្រាម។

២. រូបមន្តលាយ

ឡេលាយBrand ការលាយក៏តាមនឹង អាចដាក់គ្រឿងផ្សំល្អគួរសម ចន្លោះពី ៤ ទៅ៦មុខ លាយបញ្ចូលគ្នា ដែលអាចរក្សាភាព ស បានរាងយូរបន្តិច។

ខុសពីឡេលាយ អេតចាយ ថោកៗ មានវត្ថុធាតុដើមស្រដៀងសម្លកកូរ មានគ្រឿងផ្សំ ចម្រុះ ដាក់តាមនឹកឃើញ ស្ទើរអីថែមនឹង ពី៨ ទៅដល់១២មុខ ហើយត្រូវការលាបច្រើនៗម្ដងៗ ឆាប់ស ខ្លាំង ឬហៅថា ស ដូចផឿក។

៣. ផលប៉ះពាល់សុខភាព

ទោះជាលក់ដាច់យ៉ាងណាក្ដី មានអ្នកលក់ឡេខ្លះ មិនទាំងប្រើខ្លួនឯងផង គឺលាយទុកលក់ ព្រោះលាយលក់មិនទាន់អ្នកទិញកុម្ម៉ង់ លាបតែ១យប់ ស ខ្ចីលឿនទាន់ចិត្ត។ អ្នកជំនាញសុខភាពធ្លាប់ព្រមានថា មានន័យឡេលាយទាំងអស់ អាចហុចផលភ្លាមៗដល់ស្បែក ព្រោះតែការលាយដាក់មេឡេខ្លាំងៗ ឲ្យ ស លឿន ទើប នាំឲ្យអ្នកលាបខ្លះ ឡែកស៊ី រមាស់ ឬឡើងខ្ទុះលើស្បែក បើធ្ងន់ធ្ងរមែនទែន អាចដល់ស្លាប់ ឬមហារីកស្បែក

រូបថត សកម្មភាពផលិតផលគ្រឿងសម្អាងខូចគុណភាព

៤. ទីតាំងលក់

ធម្មតាទេ តែរបស់ថ្លៃ គឺមាននៅតាមទីតាំងហាង និងជ្រកក្រោមម៉ាស៊ីនត្រជាក់។ ចំណែកឡេលាយតម្លៃថោកៗ គឺលក់តាមផ្សារធម្មតា ដាក់កញ្ច្រែង ឬទូកញ្ចក់ ក្ដៅហប់ ចេញញើស ឬចេញហ្គាស៍ ដូច្នេះទោះចង់លក់ថ្លៃ ក៏គ្មានអ្នកទិញដែរ។

៥. ការវេចខ្ចប់

ចំណុចនេះភាពខុសគ្នា គឺអាចនិយាយបានថា ខុសគ្នាស្រលះរវាងវត្ថុទាំង២ គឺប្រអប់វេចខ្ចប់ និងប្លាស្ទិករុំពីក្រៅ។ សំបក កំប៉ុង ឬក្លង សម្រាប់ច្រក ដែលមានតម្លៃថោកៗ ១ឡូតែ២ ឬ៣ដុលា្លរ និងមានរូបរាងមិនសូវស្អាតទេ អ្នកលក់ខ្លះ ច្រកដាក់កំប៉ុងជ័រតូចៗ ដាក់អំបិល លក់តាមតូបចានឆ្នាំងជាដើម។ ប៉ុន្តែបើរបស់ថ្លៃវិញ គឺមានប្លាស្ទិកបិទស្អាត រូបរាងស្រឡូន ឃើញហើយចង់ប្រើតែម្ដង ដែលមានតម្លៃ ១ឡូ ពី៥ ទៅ១០ដុល្លារ។

សូមបញ្ជាក់ថា តាមប្រភពពីអ្នកលក់ឡេខាងលើ បានប្រាប់ទៀតថា បទពិសោធអ្នកស្រីធ្លាប់ដឹង នៅប្រទេសថៃ ប្រសិនបើការលាយឡេត្រូវស្តង់ដារ និងបានឆ្លងកាត់មន្ទីរពិសោធ គឺនោះនឹងត្រូវបានទទួលស្គាល់ជាផ្លូវការ។ បន្ទាប់មក នឹងមានការផ្ដល់ម៉ាកសម្គាល់ច្បាស់លាស់ ដើម្បីធានាគុណភាព និងបច្ចេកទេស ចៀសវាងគ្រោះថ្នាក់ដល់អ្នកប្រើ។

នៅប្រទេសកម្ពុជា កាលពីឆ្នាំ២០១៧ កន្លងទៅ នគរបាលនាយកដ្ឋានប្រឆាំងបទល្មើសសេដ្ឋកិច្ច នៃក្រសួងមហាផ្ទៃ និងមន្ត្រីជំនាញ មន្ទីរសុខាភិបាល ខេត្តកណ្ដាល ធ្លាប់បានចុះបង្ក្រាបដល់ទីតាំង និងឃាត់ខ្លួនអ្នកលក់ឡេលាយល្បីឈ្មោះតាម Online ១រូប ក្នុងបទចោទឡេ ម្សៅ លាយពុំមានច្បាប់អនុញ្ញាត និងគ្មានគុណភាព។