៧សន្លឹក ពីផ្លូវជាតិថ្មីចែសឆ្លងកាត់៣ខេត្តរបស់កម្ពុជា ស្អាតខ្លាំងមិនចាញ់ស្រុកគេ
- 2018-06-12 03:49:00
- ចំនួនមតិ 0 | ចំនួនចែករំលែក 0
៧សន្លឹក ពីផ្លូវជាតិថ្មីចែសឆ្លងកាត់៣ខេត្តរបស់កម្ពុជា ស្អាតខ្លាំងមិនចាញ់ស្រុកគេ
ចន្លោះមិនឃើញ
ផ្លូវជាតិលេខ៦ ឆ្លងកាត់ខេត្តកំពង់ចាម កំពង់ធំ និងខេត្តសៀមរាប ត្រូវបានសម្ពោធដាក់ឲ្យប្រើប្រាស់ ជាផ្លូវការកាលពីថ្ងៃទី ១១ ខែមិថុនា ក្រោមអធិបតីភាពសម្ដេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អមដំណើរដោយឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។
គម្រោងសាងសង់ឡើងវិញកំណាត់ផ្លូវជាតិលេខ៦នេះមានប្រវែងសរុប ២៤៨,៥៣ គីឡូម៉ែត្រ ចាប់ពីថ្នល់កែងខេត្តកំពង់ចាម ដល់អង្គ្រង ខេត្តសៀមរាប ក្រាលបេតុង កៅស៊ូ AC ដោយចំណាយថវិកាសរុបប្រមាណ ២៥៥,០២លានដុល្លារអាមេរិក ជាហិរញ្ញប្បទានសម្បទានពីសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា។ ការសាងសង់ត្រូវប្រើរយៈពេលចំនួន ៥០ខែ ចាប់ផ្ដើមពីខែឧសភា ឆ្នាំ២០១៣ និងបញ្ចប់នៅខែកក្កដាឆ្នាំ២០១៧។
កំណាត់ផ្លូវជាតិលេខ៦នេះគឺជាខ្សែផ្លូវដ៏មានសក្តានុពល តភ្ជាប់ទំនាក់ទំនងរូបវ័ន្ត ស្ថាប័ន និងប្រជាជន រវាងខេត្តកំពង់ចាម ខេត្តកំពង់ធំ និងខេត្តសៀមរាប និងជាមួយរាជធានី-ខេត្តផ្សេងៗទៀត តាមរយៈបណ្ដាញហេដ្ឋារចនាសម្ព័ន្ធដឹកជញ្ជូនប្រទាក់ក្រឡា តភ្ជាប់ពីតំបន់មួយ ទៅតំបន់មួយដែលបានស្តារ និងសាងសង់ដោយរាជរដ្ឋាភិបាលកម្ពុជា។
កំណាត់ផ្លូវនេះអាចធ្វើដំណើរ និងដឹកជញ្ជូនផលិតផល ដំណាំកសិផល និងកសិ-ឧស្សហកម្ម របស់បងប្អូនប្រជាពលរដ្ឋ និងក្រុមហ៊ុនធុរកិច្ចទៅកាន់ទីផ្សារក្នុងស្រុក និងទីផ្សារអន្តរជាតិ កាន់តែមានប្រសិទ្ធភាពខ្ពស់ ឆាប់រហ័ស និងចំណាយតិច ដែលជាផ្នែកមួយយ៉ាងសំខាន់ រួមចំណែកធ្វើឱ្យប្រសើរឡើងនូវប្រព័ន្ធភស្តុភារកម្ម របស់កម្ពុជាសំដៅទាញយកអត្ថប្រយោជន៍ឱ្យបានច្រើនលើសលប់ពីសមាហរណកម្មសេដ្ឋកិច្ចអាស៊ាន តំបន់ និងពិភពលោក។
ជាមួយគ្នានេះដែរ កំណាត់ផ្លូវនេះជួយជំរុញកំណើនអត្រានៃភ្ញៀវ ទេសចរជាតិ និងអន្តរជាតិឱ្យមកទស្សនានៅបណ្ដាខេត្តស្ថិតតាមបណ្តាយខ្សែផ្លូវ ជាពិសេស ខេត្តកំពង់ធំ ខេត្តសៀមរាប និងខេត្តជិតខាងដូចជាខេត្តព្រះវិហារ ដែលជាខេត្តសំបូរទៅដោយប្រាង្គប្រាសាទប្រវត្តិសាស្រ្ត ត្រូវបានដាក់បញ្ចូលជាសម្បត្តិបេតិកភណ្ឌពិភពលោក រួមជាមួយរមណីយដ្ឋានធម្មជាតិដ៏ស្រស់ស្អាតជាច្រើនកន្លែងផ្សេងទៀត។ ក្រៅពីភាពងាយស្រួល និងប្រសិទ្ធភាពក្នុងការធ្វើដំណើរនិងដឹកជញ្ជូន បងប្អូនប្រជាពលរដ្ឋ ដែលរស់នៅតាមដងផ្លូវ នឹងទទួលបានការងារ មុខរបរ ចំណេះដឹងជំនាញថ្មីៗ និងអត្ថប្រយោជន៍ផ្សេងៗជាច្រើនទៀត តាមរយៈកំណើននៃការអភិវឌ្ឍវិនិយោគ និងទេសចរ នៅតាមសហគមន៍នីមួយៗ ដែលនឹងជួយធ្វើឱ្យជីវភាពរបស់ពួកគាត់កាន់តែល្អប្រសើរឡើងជាងមុន៕
សូមទស្សនាទិដ្ឋភាពបន្ថែមនៃផ្លូវជាតិថ្មីនេះដូចខាងក្រោម៖