បង្ហាញរូបរាង និងប្រវត្តិធនាគារជាតិតាំងពីសម័យសម្ដេចតា ព្រមទាំងអនាគតដ៏អស្ចារ្យ

2018-06-13 02:05:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆាប់ៗខាងមុខធនាគារជាតិនៃកម្ពុជា នឹងធ្វើការប្ដូររូបរាងថ្មី ឲ្យស្របទៅការរីកចម្រើនរបស់ប្រទេសជាតិ និងស្របតាមភាពជឿនលឿននៃបច្ចេកវិទ្យា។ ថ្ងៃនេះសូមបងប្អូនប្រជាពលរដ្ឋត្រឡប់ទៅកាន់អតីតកាលបន្តិច ថាតើធនាគារជាតិមានការវិវត្តិបែបណាខ្លះ? តាមគេហទំទ័រផ្លូវការរបស់ធនាគារជាតិ បានឲ្យដឹងថា ធនាគារជាតិនៃកម្ពុជាមានប្រវត្តិយូរអង្វែង ដែលអាច បែងចែកជាបួនដំណាក់កាលដូចខាងក្រោម៖

១. ធនាគារជាតិកម្ពុជាក្នុងឆ្នាំ១៩៥៤ ដល់ឆ្នាំ១៩៦៤

ប្រទេសកម្ពុជាបានទទួលបានឯករាជ្យពីអាណានិគមនិយមបារាំងក្នុងឆ្នាំ១៩៥៤ ហើយធនាគារជាតិនៃកម្ពុជាក៏ត្រូវបានបង្កើតឡើង ។ ធនាគារជាតិនៃកម្ពុជាទទួលភារៈផ្ដាច់មុខជាអ្នកបោះពុម្ពប្រាក់រៀល ដែលជារូបិយវត្ថុជាតិ និងគ្រប់គ្រងប្រព័ន្ធធនាគារនៅកម្ពុជា។

២. ឆ្នាំ១៩៧៥ ដល់ឆ្នាំ១៩៧៩

ធនាគារជាតិនៃកម្ពុជាត្រូវបានបិទដោយសាររបបកម្ពុជាប្រជាធិបតេយ្យ (ខ្មែរក្រហម) ។ អគារស្នាក់ការត្រូវបានកម្ទេច រូបិយវត្ថុជាតិត្រូវបានឈប់ប្រើប្រាស់ ហើយប្រព័ន្ធធនាគារត្រូវបានលុបបំបាត់ចោលទាំងស្រុង ។

៣. ឆ្នាំ១៩៧៩ ដល់ឆ្នាំ១៩៩៣

ធនាគារជាតិនៃកម្ពុជាត្រូវបានកសាងឡើងវិញពីចំណុចសូន្យ ។ ទន្ទឹមនេះ រូបិយវត្ថុជាតិក៏ត្រូវបានបោះផ្សាយឡើងវិញ។ កម្ពុជាបានប្តូរពីសេដ្ឋកិច្ចផែនការទៅជាសេដ្ឋកិច្ចទីផ្សារសេរី ។

រូបភាព៖ ថតក្នុងឆ្នាំ១៩៩០ (ប្រភព៖ ធនាគារជាតិនៃកម្ពុជា)

៤. ឆ្នាំ១៩៩៣ ដល់បច្ចុប្បន្ន

ប្រព័ន្ធធនាគារត្រូវបានពង្រឹងនិងធ្វើទំនើបភាវូបនីយកម្មជាលំដាប់ ហើយកម្ពុជាបានក្លាយជាប្រទេសមួយក្នុងចំណោមប្រទេសដែលមានកំណើនសេដ្ឋកិច្ចខ្លាំងជាងគេនៅលើពិភពលោក ។

រូបថតក្នុងឆ្នាំ២០០៣ (ប្រភព៖ ធនាគារជាតិនៃកម្ពុជា)

រូបរាងបច្ចុប្បន្ន (ប្រភព៖ ធនាគាជាតិនៃកម្ពុជា

៥. ប្លង់ធនាគារជាតិថ្មីសាងសង់លើទីតាំងចាស់យករចនាបថតាមប្រាសាទភ្នំ

កាលពីថ្ងៃទី១២ ខែមិថុនា ឆ្នាំ២០១៨ ម្សិលមិញនេះ ធនាគារជាតិនៃកម្ពុជា បានបញ្ចេញរូបរាងអគារថ្មីរបស់ខ្លួន ដែលគ្រោងនឹងសាងសង់ក្នុងពេលឆាប់ៗនេះនៅលើទីតាំងបច្ចុប្បន្ន ខណៈការិយាល័យធ្វើការ បានផ្លាស់ប្ដូរទៅទីតាំងបណ្ដោះអាសន្ននៅតាមផ្លូវហាណូយ សង្កាត់ភ្នំពេញថ្មី។

ធនាគារជាតិនៃកម្ពុជា បានបញ្ជាក់ថា "អាគារស្នាក់ការថ្មីនេះ ត្រូវបានរចនាឡើង តាមលំនាំប្រាសាទភ្នំ ដែលបង្ហាញពីវប្បធម៌ខ្មែរយើង ហើយបង្ហាញពីភាពរឹងមាំ ទំនើប និងការរីកចម្រើនវិស័យធនាគារ នាពេលបច្ចុប្បន្ន"។

ជុំវិញផែនការសាងសង់អគារថ្មីនេះ ធនាគារជាតិនៃកម្ពុជា មិនបានឲ្យដឹងថា កញ្ចប់ថវិកាប៉ុន្មាននឹងត្រូវចំណាយលើការសាងសង់ ក្រៅពីនេះ ការសាងសង់ចំណាយពេលប៉ុន្មាន ឬបញ្ចប់នៅពេលណា ក៏ទេដែរ៕

អត្ថបទ៖ វឌ្ឍនៈ