ទម្លាយប្រវត្តិពិត រិទ្ធ អូមេហ្គា ក្រោយរងព័ត៌មានអាស្រូវបង្ខូចកេរ្តិ៍ឈ្មោះស្អុយរងំ

2018-06-14 03:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកដឹកនាំសម្ដែងនៅផលិតកម្មថោន រិទ្ធ អូមេហ្គា ត្រូវបានហ្វេសប៊ុកមួយគ្មានអត្តសញ្ញាណពិតប្រាកដមកបង្ខូចកេរ្តិ៍ឈ្មោះលោកថា ស្ទើរតែគ្រប់តារាសម្ដែងស្រីថ្មីៗទើបចូលប្រឡូកសិល្បៈមុនដំបូង លោក តែងតែសុំគេងជាមួយប្រសិនចង់បានភាពល្បីល្បាញក្នុង MV បទចម្រៀង។

ការលើកឡើងខាងលើបានធ្វើឲ្យ រិទ្ធ អូមេហ្គា ក្ដៅស្លឹកត្រចៀកឆេវតែម្ដងដល់ថ្នាក់លោក បង្ហោះពាក្យពេចន៍មួយចំនួននៅលើហ្វេសប៊ុក ដោយលើកយកផ្លូវច្បាប់មកនិយាយដើម្បី ដាក់ពាក្យប្ដឹង ប្រសិនបើបុគ្គលនោះនៅតែបន្តដើរបង្ខូចកេរ្តិ៍ឈ្មោះ ខ្លួនខុសពីការពិត។

ដូច្នេះថ្ងៃនេះ Sabay សូមលើកយករឿងរ៉ាវខ្លះៗ ទាក់ទង រិទ្ធ អូមេហ្គា ដែលប្រិយមិត្តមិនធ្លាប់ដឹងកន្លងមក។

អ្នកដឹកនាំសម្ដែង រិទ្ធ អូមេហ្គា កើតនៅថ្ងៃទី២៧ ខែឧសភា ឆ្នាំ១៩៩០ រាជធានីភ្នំពេញ លោកជាកូនទោលក្នុងគ្រួសារ មានឪពុកម្ដាយធ្វើការជាមន្ត្រី រាជការ។ ចូលប្រឡូកសិល្បៈមុនដំបូងនៅផលិតកម្មសាន់ដេ ក្នុងឆ្នាំ ២០១៣ តែមិនមែនជាបុគ្គលិកពេញសិទ្ធទេ។

នៅផលិតកម្មសាន់ដេបាន ១ឆ្នាំលោកក៏បានផ្លាស់មកទ្រនំថោន ក្នុងឆ្នាំ២០១៤ រហូតមកដល់បច្ចុប្បន្ន ដោយមានការបណ្ដុះបណ្ដាល និងចង្អុលបង្ហាញពីរៀមច្បងសិល្បៈមួយចំនួនដូចជាលោក សុខ ជំនោរ វ៉ាត់ លីម៉េង ប៊ុន រតនា អ៊ិន រិទ្ធិចិត្រ និង យឹម តាស្រង់ ទើបធ្វើឲ្យលោកមានថ្ងៃនេះ។

បទចម្រៀងដំបូងដឹកនាំសម្ដែងដោយ រិទ្ធ អូមេហ្គា ហើយទទួលបានការចាប់អារម្មណ៍ពីមហាជនទាំងក្នុង និងក្រៅសិល្បៈមានដូចជា "ប្រុសក្រញាញ់ខូចចិត្ត" ច្រៀងដោយENO និងបទ "ឲ្យគេញ៉ែលឿនម្ល៉េះ" ច្រៀងដោយ ខេម។

ក្រៅពីការងារសិល្បៈ រិទ្ធ អូមេហ្គា ក៏បានសិក្សារៀនសូត្របានយ៉ាងជ្រៅជ្រះទៀតផង។ លោក បានបញ្ចប់បរិញ្ញាបត្រផ្នែកគ្រប់គ្រង នៅសាកលវិទ្យាល័យជាតិគ្រប់គ្រង ក្នុងឆ្នាំ២០១២ និងបញ្ចប់ថ្នាក់អនុបណ្ឌិតផ្នែក គ្រប់គ្រងហិរញ្ញវត្ថុ នៅសាកលវិទ្យាល័យដដែលក្នុងឆ្នាំ ២០១៥។

ចំណែកឯជីវិតស្នេហាវិញ រិទ្ធ អូមេហ្គា រៀបការបញ្ចប់ភាពនៅលីវជាមួយនារីម្នាក់ឈ្មោះ វ៉ាន់ សិលា នៅខេត្តបាត់ដំបង កាលពីថ្ងៃទី៦ ខែធ្នូ ឆ្នាំ ២០១៧ ព្រមទាំងមានការអញ្ជើញចូលរួមពីភ្ញៀវសិល្បៈយ៉ាងច្រើនកុះករទៀតផង៕

អត្ថបទ៖ ឆុង ស៊ីណាន