របាយការណ៍ថ្មីៗ! ចំនួនសេដ្ឋីនៅស្រុកខ្មែរ២ឆ្នាំចុងក្រោយ កើនឡើងប៉ុន្មាននាក់ហើយ?

2018-06-14 03:13:57
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមរបាយការណ៍សង្ខេបស្ដីពីសមិទ្ធផលសំខាន់ៗ របស់រាជរដ្ឋាភិបាលនៃព្រះរាជាណាចក្រកម្ពុជាឆ្នាំ ២០១៣-២០១៧ ចំនួនឧកញ៉ាដែលត្រូវបានព្រះមហាក្សត្រ ជីវិតតម្កល់លើត្បូង ប្រោសប្រទានគោរមងារ ដោយគិតត្រឹមពីឆ្នាំ២០១៣ រហូតដល់ឆ្នាំ២០១៧ មានចំនួន ៣៣៤នាក់។ ដោយឡែកបើយោងតាមរបាយការណ៍របស់របស់រាជរដ្ឋាភិបាលប្រទេសកម្ពុជា ឆ្នាំ ២០១២-២០១៦ ចំនួនឧកញ៉ា ដែលត្រូវបានព្រះមហាក្សត្រប្រោសប្រទានគោរមងារ គិតត្រឹមពីឆ្នាំ ២០១២ ដល់ឆ្នាំ ២០១៥មានចំនួន ៣០៥នាក់ប៉ុណ្ណោះ។ ដូច្នេះមានន័យថា ចំនួនឧកញ៉ាក្នុងប្រទេសកម្ពុជាកើនឡើង ២៩នាក់គិតត្រឹមឆ្នាំ២០១៧។

ឧកញ៉ា សៀ ឫទ្ធី ស្ថាបនិកក្រុមហ៊ុន WorldBridge ដ៏ធំមួយក្នុងប្រទេសកម្ពុជា

គោរមងារជាឧកញ៉ា ត្រូវទទួលការប្រោសព្រះរាជទានតាមព្រះរាជក្រឹត្យដែលឡាយព្រះហស្តលេខាដោយព្រះមហាក្សត្រ តាមសំណើរបស់នាយករដ្ឋមន្ត្រី ឬប្រធានព្រឹទ្ធសភា។

ឧកញ៉ា គួច ម៉េងលី ជាស្ថាបនិក និងជានាយកក្រុមហ៊ុន Mengly J. Quach Holding

យោងតាមអនុក្រឹត្យចុះថ្ងៃទី២០ ខែមីនា ឆ្នាំ២០១៧ ដែលចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ស្ដីពីការសម្រួលចំណុចទី១ នៃអនុក្រឹត្យលេខ១៥ អនក្រ ចុះថ្ងៃទី០៥ មេសា ឆ្នាំ១៩៩៤ ត្រូវធ្វើការកែសម្រួលដូចតទៅ៖

១ថ្មី. សប្បុរសជនដែលធ្វើអំណោយជូនរដ្ឋជាថវិកា ឬសម្ភារៈ ដែលមានតម្លៃលើសពី១០ម៉ឺនដុល្លារសហរដ្ឋអាមេរិកឡើងទៅ ត្រូវបានជូនមេដាយស្ថាបនាថ្នាក់ជាតិលេខ១។ សប្បុរសជនដែលធ្វើអំណោយជូនរដ្ឋជាថវិកា ឬសម្ភារៈ ដែលមានតម្លៃលើសពី៥០ម៉ឺនដុល្លារអាមេរិកឡើងទៅ នឹងត្រូវបានរាជរដ្ឋាភិបាលស្នើសុំ ព្រះរាជយោបល់ដ៏ខ្ពង់ខ្ពស់ នៃព្រះករុណាជាអម្ចាស់ជីវិតតម្កល់លើត្បូង ដើម្បីទ្រង់ព្រះរាជទានគោរមងារជា «ឧកញ៉ា»។

អ្នកឧកញ៉ា ម៉ុង ឫទ្ធី មហាសេដ្ឋីដ៏ល្បីល្បាញផ្នែកកសិឧស្សាហកម្មនៅកម្ពុជា

នៅក្នុងអនុក្រឹត្យបានបញ្ជាក់ថា បទបញ្ញត្តិទាំងឡាយណា ដែលផ្ទុយនឹងអនុក្រឹត្យនេះ ត្រូវទុកជានិរាករណ៍។ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីគ្រប់ក្រសួង និងប្រធានគ្រប់ស្ថាប័នដែលពាក់ព័ន្ធ ត្រូវទទួលបន្ទុកអនុវត្តអនុក្រឹត្យនេះ តាមភារកិច្ច ចាប់ពីថ្ងៃចុះហត្ថលេខាឡើងទៅ៕

អត្ថបទ៖ វឌ្ឍនៈ