រឿងសំខាន់ត្រូវដឹង! ចង់ធ្វើលិខិតឆ្លងដែនត្រូវការឯកសារ និងបំពេញបែបបទអ្វីខ្លះ?

2018-06-14 05:07:25
ចំនួនមតិ 0 | ចំនួនចែករំលែក 0

ចន្លោះមិនឃើញ

លិខិតឆ្លងដែនធម្មតានៃព្រះរាជាណាចក្រកម្ពុជា គឺជាឯកសារបញ្ជាក់ថាជនដែលកាន់លិខិតឆ្លងដែននោះ ជាពលរដ្ឋខ្មែរ ដែលមានសិទ្ធិសុំទិដ្ឋាការឆ្លងដែនបាន។ លិខិតឆ្លងដែនធម្មតានៃព្រះរាជាណាចក្រកម្ពុជា គឺជាឯកសារផ្លូវច្បាប់តែមួយគត់ដែលអនុញ្ញាតឲ្យពលរដ្ឋ ខ្មែរប្រើប្រាស់សម្រាប់ធ្វើដំណើរឆ្លងដែនទៅក្រៅព្រះរាជាណាចក្រកម្ពុជា។

យោងតាមអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ ឲ្យដឹងថា ចំពោះនីតិវិធី និងការបំពេញបែបបទដើម្បីអាចធ្វើលិខិតឆ្លងដែនត្រូវធ្វើដូចខាងក្រោមនេះ៖

ពលរដ្ឋដែលមានអាយុចាប់ពី ១៥ ឆ្នាំឡើង ត្រូវមានអត្តសញ្ញាណប័ណ្ណសញ្ជាតិខ្មែរ ឬ សំបុត្រកំណើត ដែលបញ្ជាក់ថាសញ្ជាតិខ្មែរ និង ឯកសារសម្គាល់គ្រួសារ ឬ ឯកសារផ្សេងទៀតដែលបញ្ជាក់អំពីអត្តសញ្ញាណ សញ្ជាតិ និង ទីលំនៅដែលចេញដោយអាជ្ញាធរមានសមត្ថកិច្ច ។
កុមារដែលមានអាយុក្រោម ១៥ ឆ្នាំ ត្រូវមានសំណើសុំ ឬ ការអនុញ្ញាតិជាលាយលក្ខណ៍អក្សរពីឪពុកម្ដាយ ឬ អាណាព្យាបាល ដោយមានភ្ជាប់មកជាមួយនូវឯកសារសម្គាល់គ្រួសារ និងសំបុត្រកំណើត ។
បំពេញពាក្យសុំផ្តល់លិខិតឆ្លងដែនមួយច្បាប់ ផ្តិតស្នាមម្រាមដៃ ថតរូប យកភិនភាគស្លាកស្នាម និងសំភាសន៍ ផ្ទាល់នៅនាយកដ្ឋានលិខិតឆ្លងដែន ឬ
លិខិតឆ្លងដែនធម្មតាត្រូវបានផ្តល់ជូនពលរដ្ឋ ក្នុងរយៈពេលយ៉ាងយូរ ២០ថ្ងៃ នៃថ្ងៃធ្វើការ ដោយគិតចាប់ពីថ្ងៃដែលសាមីជនបានបំពេញបែបបទត្រឹមត្រូវ គ្រប់គ្រាន់ និងបង់អាករលិខិតឆ្លងដែន នៅបញ្ជរបង់ប្រាក់នៃនាយកដ្ឋាន លិខិតឆ្លងដែន ឬ សាខាលិខិតឆ្លងដែនប្រចាំតំបន់។
មនុស្សម្នាក់មិនត្រូវអនុញ្ញាតិឲ្យផ្តល់ ឬប្រើប្រាស់លិខិតឆ្លងដែនធម្មតាលើសពីមួយឡើយ។

ចំពោះទីតាំងដែលបងប្អូនប្រជាពលរដ្ឋខ្មែរអាចធ្វើលិខិតឆ្លងដែនបានមានដូចខាងក្រោមនេះ៖

នាយកដ្ឋានលិខិតឆ្លងដែន មានទីតាំងនៅភូមិតាង៉ូវ សង្កាត់នោរោធន៍ ខណ្ឌច្បារអំពៅ រាជធានីភ្នំពេញ។
សាខាប្រចាំខេត្តបាត់ដំបង មានទីតាំងនៅផ្ទះលេខ ១៤១ ភូមិរំចេក ៤ សង្កាត់ រតនៈ ក្រុងបាត់ដំបង ខេត្តបាត់ដំបង។
សាខាប្រចាំខេត្តបន្ទាយមានជ័យ មានទីតាំងនៅបូរីសាហូ ផ្ទះលេខ ៥២-៥៤ A ភូមិគីឡូម៉ែតលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
សាខាប្រចាំខេត្តកោះកុង មានទីតាំងភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង ។

ចំពោះតម្លៃ និងពេលពេលវេលាត្រូវបានកំណត់ដូចខាងក្រោមនេះ៖

សម្រាប់មនុស្សចាស់

១. សេវារយៈពេល ១៥ថ្ងៃ តម្លៃ ០១ក្បាល ១០០ដុល្លារអាមេរិក

២. សេវារយៈពេល ៧ថ្ងៃ តម្លៃ ០១ក្បាល ១៥០ដុល្លារអាមេរិក

៣. សេវារយៈពេល ១ថ្ងៃ តម្លៃ ០១ក្បាល ២០០ដុល្លារអាមេរិក

សម្រាប់កូនក្មេង

១. សេវារយៈពេល ១៥ថ្ងៃ តម្លៃ ០១ក្បាល ៨០ដុល្លារអាមេរិក

២. សេវារយៈពេល ៧ថ្ងៃ តម្លៃ ០១ក្បាល ១២០ដុល្លារអាមេរិក

៣. សេវារយៈពេល ១ថ្ងៃ តម្លៃ ០១ក្បាល ១៦០ដុល្លារអាមេរិក

អត្ថបទ៖ វឌ្ឍនៈ