ផ្តើមពីការស្រលាញ់តន្ត្រី មានភ័ព្វក្លាយជាតួឯកក្នុងរឿងខ្មែរខ្នាតធំ​​

  • 2018-06-14 09:33:51
  • ចំនួនមតិ 0 | ចំនួនចែករំលែក 68

ចន្លោះមិនឃើញ

ជា ប៊ុនឡេង ហៅ អណ្តើក អាយុ ១៩ ឆ្នាំ ជាសមាជិកក្រុមបាតដៃខ្មៅ ជាអ្នកលេងហ្គីតាបាស់ ប្រចាំក្រុម «បាតដៃខ្មៅ»។ នៅក្នុងរឿងនេះ ប៊ុនឡេង ឬអណ្តើក ជាមិត្តចេះយកអាសារ ឡេះឡោះ តែងតែធ្វើឱ្យក្រុមមានស្ថានភាពរីករាយ។

តួសម្តែងម្នាក់នេះ ផ្តើមចេញពីក្រុមចម្រៀងមួយក្រុម ដែលមានឈ្មោះថា The Ocean ឈ្មោះពិត រតនៈ វ័យ ២០ ឆ្នាំ។ យុវជនរូបនេះ បានបញ្ចប់ការសិក្សារថ្នាក់វិទ្យាល័យ នៅភ្នំពេញ ហើយបានចូលរៀនខាងផ្នែកច្បាប់នៅក្នុងសាលកវិទ្យាល័យមួយដល់ឆ្នាំទី ២ តែក៏ព្យួរទុកសិន​ដោយ​សារតែរវល់នឹងការសិល្បៈសម្តែងភាពយន្តថ្មីនេះ និងចម្រៀង។

រតនៈ ប្រាប់ថា នេះជាលើកទីមួយហើយសម្រាប់ខ្លួន ដែលបានសម្តែងជាតួអង្គសំខាន់ម្នាក់ក្នុងរឿង «បាតដៃខ្មៅ» និងបានច្រៀងរួមគ្នាជាមួយសិល្បករចម្រៀង Original ផ្សេងៗទៀត ដូចជា Sai ខាន ជេន និង ម៉ានិត។ សម្រាប់ រតនៈ គឺមិនធ្លាប់គិតសោះថាអាចមានភ័ព្វ ក្លាយជាតួសម្តែងដូចសព្វថ្ងៃនេះ។ រតនៈ ត្រូវបានផលិតកម្ម Studio 4 ជ្រើសរើស ជាតួអង្គ អណ្តើតនេះ ក៏ដោយសារតែ អត្តចរិក រួសរាយ លេងសើចសប្បាយរបស់ រនតៈ ស្រាប់ ដែលសមនឹងតួអង្គម្នាក់នេះ។ ម្យ៉ាងវិញទៀត សមាជិក របស់​ក្រុម «បាតដៃខ្មៅ» ត្រូវតែចេះ ច្រៀង និងលេងឧបករណ៍តន្រ្តីទៀតផង ទើបអាចសម្តែងរឿងនេះបាន ដែលនេះជាគុណសម្បត្តិរបស់ រតនៈតែម្តង។

មុននឹងបានសម្តែងរឿង «បាតដៃខ្មៅ» រតនៈបានត្រឹមចូលរួមសម្តែងក្នុងភាពយន្តបែប Web Series ខ្លីៗ មិនទាន់មាន​ការគាំទ្រច្រើននៅឡើយ។ តែបច្ចុប្បន្នយុវជនរូបនេះ កំពុងមានការគាំទ្រជាច្រើនពីការងារសិល្បៈចម្រៀងរបស់ខ្លួន ក៏ដូចជាការថតភាពយន្ត។ ជាក់ស្តែងរឿង «បាតដៃខ្មៅ» ដែលត្រៀមចេញផ្សាយគ្រប់រោងភាពយន្ត នៅថ្ងៃទី​ ២៨ ខែ មិថុនា ខាងមុខនេះ កំពុងមានប្រិយមិត្តគាំទ្ររបស់ រនតៈជាច្រើន ត្រៀមខ្លួនចូលទស្សនាផងដែរ។

លើសពីនោះ តាមរយៈ Trailer ខ្លីរបស់រឿង «បាតដៃខ្មៅ» បានធ្វើឱ្យគ្រួសារ និងអ្នកស្គាល់ រតនៈ គិតថា រូបគេនឹងស្លាប់ក្នុង​រឿងនេះ ក៏ប៉ុន្តែយ៉ាងណានោះ រតនៈមិនអាចបញ្ជាក់បានទេ។ តារាសម្តែងជើងថ្មី វ័យក្មេងម្នាក់នេះ ក៏សូមអញ្ជើញប្រិយមិត្ត​អ្នកគាំទ្រភាពយន្តខ្មែរទាំងអស់ ឈាងចូលទស្សនាភាពយន្ត «បាតដៃខ្មៅ» នេះទាំងអស់គ្នា ដើម្បីស្វែងយល់ពី​គុណភាពរឿងខ្មែរនេះផង និងរីករាយទស្សនា សាច់រឿងដ៏ល្អ មានស្តង់ដារ មានការផលិតដោយយកចិត្តទុកដាក់ត្រឹមត្រូវ៕

តោះស្តាប់តារាថ្មីរបស់ បាតដៃខ្មៅនិយាយអ្វីខ្លះខាងក្រោម៖


អត្ថបទ៖ Sunny

រូបភាពផ្តល់សិទ្ធិដោយ STUDIO 4