ប្រើលាបឡេលាយ បកស្បែក ស ខ្ចី លឿន ប្រឈមជំងឺទាំងនេះ គ្រោះថ្នាក់ជីវិត
- 2018-06-15 08:36:25
- ចំនួនមតិ 0 | ចំនួនចែករំលែក 0
ប្រើលាបឡេលាយ បកស្បែក ស ខ្ចី លឿន ប្រឈមជំងឺទាំងនេះ គ្រោះថ្នាក់ជីវិត
ចន្លោះមិនឃើញ
ស្បែក ស ខ្ចី ជាទំនោរថ្មី១ របស់មនុស្សសម័យទំនើប ស៊ីវិល័យ ភាគច្រើនជាយុវវ័យ និងស្ត្រីខ្លះ ឬហៅថាតាមគេតាមឯង។ ដោយសារតែចង់ស្អាតតាមគ្នា ទើបអ្នកលាបខ្លះ មិនសូវចាប់អារម្មណ៍ពីផលប៉ះពាល់ដែលបង្កដោយគ្រឿងសម្អាងទាំងនោះ។
ដោយហេតុនេះ ទើបគេសង្កេតឃើញថា ស្ត្រីមួយចំនួន បានជ្រើសរើសផលិតផលឡេលាយ បកស្បែក ដែលមានតម្លៃថោកៗ ប៉ុន្តែមានប្រសិទ្ធភាពឲ្យសលឿនទាន់ចិត្ត។
វេជ្ជបណ្ឌិតឯកទេសព្យាបាលជំងឺសើស្បែក បានរកឃើញថា រឿងតម្លៃ និងតម្រូវការ ស លឿន ជាហេតុផលជំរុញឲ្យនៅតែមានអ្នកប្រើឡេលាយ បកស្បែក គ្មានគុណភាពត្រឹមត្រូវ។
លោកសាស្ត្រាចារ្យ វេជ្ជបណ្ឌិត ម៉ី ស៊ីថាច នាយផ្នែកជំងឺសើស្បែក នៃមន្ទីរពេទ្យព្រះកុសុមៈបានពន្យល់ថា ការប្រើឡេលាយជាផ្នែក១ នៃផលិតផលគ្រឿងសម្អាងខុសបច្ចេកទេស ដែលលាយផ្សំគ្មានរូបមន្តត្រឹមត្រូវ មានន័យថា ចេះលាយតគ្នា លក់ចែកចាយ និងគ្មានស្តង់ដារ ផ្លូវការ។
ផលប៉ះពាល់នៃការប្រើឡេលាយ បកស្បែក មាន២ គឺ រយៈពេលខ្លី ភ្លាមៗ និងរយៈវែង។
១. បញ្ហាប្រឈមភ្លាមៗ
ឡេលាយអាចឲ្យធ្វើស្បែក ស លឿន ខុសប្រក្រតី មានចន្លោះតែពី ២ ទៅ ៣ម៉ោង ឬយ៉ាងយូរ១សប្ដាហ៍តែប៉ុណ្ណោះ។ ភាពស ទាន់ចិត្តបានធ្វើឲ្យអ្នកប្រើសប្បាយចិត្តខ្លាំង។ ប៉ុន្តែវិធីនេះ ក៏ធ្លាប់ហុចជាផលអវិជ្ជមាន ដែលវេជ្ជបណ្ឌិតឯកទេសជំងឺសើស្បែក ធ្លាប់ជួបករណីអ្នកជំងឺខ្លះ ឡើងរមាស់ស្បែកផ្ដើមពីតិចតួច រហូតដល់ធ្ងន់ធ្ងរ ហើមមាត់ស្ពុល រោលស្បែកប្រតាក ឬឡើងបន្ទាលត្រអាកចូលក្នុងស្បែកជ្រៅ។
ចំណុចនេះ អាចបង្កជាបញ្ហាផ្សេងទៀតដូចជា អាចធ្វើឲ្យរាកមួល មានសំបោរ ពិបាកដកដង្ហើម ចុកពោះខ្លាំង ដែលមើលទៅមានអាការៈស្រដៀងនឹងអ្នកជំងឺរាកមួល តែតាមការពិត គឺមកពីការប្រើគ្រឿងសម្អាង លាយផ្សំសារធាតុខុសបច្ចេកទេស។
២. ផលប៉ះពាល់រយៈពេលយូរ
លោកវេជ្ជបណ្ឌិត ម៉ី ស៊ីថាច បានបញ្ជាក់ថា ករណីនេះ អាចជះឥទ្ធិពលអាក្រក់ទៅថ្ងៃក្រោយ និងមានរយៈពេលយូរ។ អ្នកប្រើឡេលាយ បកស្បែក ឲ្យ ស លឿនជ្រុល ប្រឈមនឹង ការបង្កទៅជាជំងឺដូចជាស្បែក ប្រតិកម្មជាមួយកម្ដៅថ្ងៃ មានន័យថា មិនអាចស្ថិតនៅក្រោមពន្លឺថ្ងៃបាន អាចបង្កជាកកខ្ទុះ១ចំហៀងមុខ។
ម្យ៉ាងវិញទៀត ឡេលាយ បកស្បែក តាមរូបមន្តចេះតគ្នា ក៏អាចនាំគ្រោះថ្នាក់ខ្លាំង ដោយសារវាមានសារធាតុច្របល់គ្នា គ្មានស្តង់ដារ ដែលអាចជ្រាបចូលក្នុងរាងកាយ ស្មើនឹងការលេបថ្នាំប្រភេទម្យ៉ាង ដែលអាចបំផ្លាញតម្រងនោម និងនាំឲ្យមានអាការៈអស់កម្លាំងរ៉ាំរ៉ៃ ឬមានបញ្ហាផ្លូវដង្ហើម។
លោកវេជ្ជបណ្ឌិត បន្ថែមថា ករណីធ្ងន់ធ្ងរខ្លាំង គឺអ្នកជំងឺប្រឈមនឹងជំងឺមហារីកស្បែក គ្មានថ្នាំព្យាបាល ដែលនាំគ្រោះថ្នាក់ដល់ជីវិត។
ទាក់ទងនឹងបញ្ហានេះដែរ អាជ្ញាធរគណៈកម្មាធិការប្រយុទ្ធប្រឆាំងផលិតផលក្លែងក្លាយ ធ្លាប់បានចុះបង្ក្រាប និងកិនកម្ទេចចោល ផលិតផលគ្រឿងសម្អាងក្លែងក្លាយ និងសារធាតុគីមី សរុប ១១០ តោន កាលពីខែមេសា ឆ្នាំ២០១៨។