សិស្សថ្នាក់ទី១២ខ្លះ នៅខេត្តកំពតសម្រុកធ្វើរឿងមួយបាត់ មិនទាន់ដល់ថ្ងៃប្រឡងបាក់ឌុបផង

2018-06-15 08:30:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈការប្រឡងបាក់ឌុបនឹងប្រព្រឹត្តទៅនៅអំឡុងខែសីហា ឆ្នាំ២០១៨ ពោលគឺមានរយៈពេលមិនតិចជាងពីរខែទៀតទេបើគិតពីថ្ងៃនេះទៅ។ ថ្វីត្បិតថ្ងៃប្រឡងនៅឆ្ងាយក៏ពិតមែន តែសិស្សថ្នាក់ទី១២ខ្លះនៅក្នុងស្រុកឈូក ខេត្តកំពត បាននាំគ្នាទៅកក់បន្ទប់ស្នាក់នៅជាស្រេច។

(បេក្ខជនប្រឡងបាក់ឌុបកំពុងផ្ទៀងផ្ទាត់ឈ្មោះមុននឹងដើរចូលបន្ទប់ប្រឡងកាលពីឆ្នាំ២០១៧)

យុវសិស្សម្នាក់រៀនថ្នាក់ទី១២E នៃវិទ្យាល័យហ៊ុន សែនឈូក ស្រុកឈូក ខេត្តកំពត ដែលមានចំងាយប្រហែលជា៥០គីឡូម៉ែត្រពីទីរួមខេត្ត បានប្រាប់Sabay ថាដោយសារតែមណ្ឌលប្រឡងនៅ ទីរួមខេត្ត ទើបខ្លួនបានទៅកក់បន្ទប់ស្នាក់នៅទុកមុន។ កក់មុនដោយថាខ្លាចជិតដល់ថ្ងៃប្រឡងពិបាករកបន្ទប់ស្នាក់នៅ និងម្យ៉ាងបារម្ភថាតម្លៃបន្ទប់អាចនឹងឡើងថ្លៃ។

យុវសិស្ស ទី ស៊ីកូស៊ីវូ បន្តថាខ្លួនបានកក់រួចហើយបន្ទប់ម៉ាស៊ីនត្រជាក់មួយមានគ្រែបីសម្រាប់គ្នាប្រាំនាក់ក្នុងតម្លៃ២៥ដុល្លារក្នុងមួយយប់។ «ក៏ព្រោះបារម្ភថា នឹងគ្មានបន្ទប់ទំនេរ បើខ្ញុំចាំដល់ថ្ងៃប្រឡង ព្រោះមានសិស្សពីគ្រប់សាលាត្រូវទៅស្នាក់នៅ មួយវិញទៀត ធ្លាប់ឭគេនិយាយថា បើដល់ថ្ងៃប្រឡងទើបជួលនោះផ្ទះសំណាក់មួយចំនួនបានតម្លើងថ្លៃ»។ ប្រភពខាងលើបញ្ជាក់។

មិនខុសពីយុវសិស្សខាងលើ កញ្ញា ណាត់ សុខណា ឲ្យដឹងថាខ្លួន និងមិត្តម្នាក់ទៀតបានកក់រួចហើយដែរបន្ទប់កង្ហារគ្រែពីរ ដោយក្នុងមួយយប់ថ្លៃ១០ដុល្លារ។ សុខណា បន្តថា «ខ្ញុំគិតថាបើទៅកក់ពីឥឡូវទៅវានៅថោក និងបើដល់ពេលហ្នឹងខ្លាចអស់បន្ទប់»។

សម្រាប់កញ្ញា ជុន ចាន់ណេត វិញ លើកឡើងថាកញ្ញា បានទៅកក់បន្ទប់តាំងពីខែមេសាមកម្លេះ ដោយកក់បន្ទប់ម៉ាស៊ីនត្រជាក់គ្រែពីរក្នុងតម្លៃ១០ដុល្លារក្នុងមួយយប់។ « គ្រាន់ចូលឆ្នាំហើយភ្លាម ខ្ញុំទៅជួលភ្លាមឲ្យបានមុនគេព្រោះខ្ញុំគិតថាទៅមុនគេជួលបានថោក»។

បើតាមការសាកសួររបស់អ្នកសារព័ត៌មាន Sabay ទៅកាន់ម្ចាស់ផ្ទះសំណាក់មួយចំនួន បានឲ្យដឹងថាម្ចាស់ផ្ទះសំណាក់ទាំងនោះបើកឲ្យមានការកក់បន្ទប់មុនយ៉ាងច្រើនត្រឹម៧០ភាគរយនៃបន្ទប់ផ្ទះសំណាក់ដែលមានតែប៉ណ្ណោះ ដោយថាទុក៣០ភាគរយសម្រាប់ភ្ញៀវផ្សេង។ ចំពោះរឿងតម្លៃវិញម្ចាស់ផ្ទះសំណាក់ខ្លះថាមិនមានថ្លៃខុសគ្នាប៉ុន្មានទេ តែសំខាន់គឺអត់មានបន្ទប់ទំនេរច្រើនពេលដល់ថ្ងៃប្រឡង។

ដោយឡែកអ្នកគ្រូ បូ សុធាវី គ្រូបង្រៀនភូមិវិទ្យា បានលើកឡើងថាតាមបទពិសោធន៍អ្នកគ្រូកាលពីឆ្នាំមុនតម្លៃបន្ទប់មិនថ្លៃជាងថ្ងៃធម្មតាប៉ុន្មាននោះទេ តែថាអ្វីដែលសំខាន់គឺអត់មានបន្ទប់សម្រាប់ជួលស្នាក់នៅ ឬក៏មានដែរតែឆ្ងាយពីទីរួមខេត្តបន្តិចបើដល់ថ្ងៃប្រឡងទើបទៅរកជួលនោះ៕

អត្ថបទដោយ៖ គីម សាយ