Salah ជាប់ឈ្មោះអង្គុយលើបង់ក្នុងប្រកួតយប់នេះ

2018-06-15 11:22:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែស្លាប Mohamad Salah បានជាប់ឈ្មោះក្នុងចំណោមកីឡាករអេហ្ស៊ីបដែលអង្គុយលើបង់ ក្នុងប្រកួត World Cup ប៉ះជាមួយក្រុមជម្រើសជាតិអ៊ុយរុយហ្គាយដែលនឹងធ្វើឡើងនៅប្រមាណមួយម៉ោងខាងមុខនេះ។

អេហ្ស៊ីបកាលពីពេលជិតមួយម៉ោងមុននេះ បានបង្ហាញពីជម្រើស ១១ នាក់នៃក្រុមជម្រើសជាតិខ្លួន។ ខ្សែស្លាបឆ្នើម Salah ត្រូវបានប្រកាសថាស្ថិតក្នុងចំណោមកីឡាករបម្រុងក្នុងការប្រកួត។

កីឡាករបានរងរបួសស្មាធ្ងន់ធ្ងរក្នុងអំឡុងប្រកួត Champions League វគ្គផ្ដាច់ព្រ័ត្រពេលប៉ះជាមួយ Real Madrid កាលពីចុងខែឧសភា កន្លងទៅ។

គ្រូជម្រើសជាតិអេហ្ស៊ីបលោក Hector Cuper

នេះគឺជាការវិវត្តន៍ល្អមួយសម្រាប់ក្រុមជម្រើសជាតិអាហ្វ្រិកមួយនេះ។ កាលពីម្សិលមិញ គ្រូជម្រើសជាតិអេហ្ស៊ីបលោក Hector Cuper បានបញ្ជាក់យ៉ាងច្បាស់ថា កីឡាករ Salah នឹងមានចំណែកក្នុងប្រកួតថ្ងៃនេះ បើមុខរបួសគ្មានអ្វីវិវត្តន៍ទៅជាអវិជ្ជមានធំដុំនោះទេ។

Salah ត្រូវបានចាត់ទុកជាកីឡាករមួយរូបដ៏សំខាន់សម្រាប់ក្រុមជម្រើសជាតិ បន្ទាប់ពីខ្សែស្លាបបានបង្ហាញទម្រង់លេងយ៉ាងល្អ ក្នុងរដូវកាល ២០១៧/១៨ ជាមួយក្លឹប Liverpool។ កីឡាករស៊ុតចូលជាង ៤០ គ្រាប់ និងបញ្ជូនបាល់ឲ្យមិត្តរួមក្រុមជិត ២០ លើក។ ម៉្យាងទៀត ខ្សែស្លាប Salah បានរួមចំណែកយ៉ាងសំខាន់ក្នុងការជួយអេហ្ស៊ីបឲ្យបានឡើងលេង World Cup ជាលើកដំបូងក្នុងរយៈពេល ២៨ឆ្នាំ។

បកទៅនិយាយពីអ៊ុយរុយហ្គាយវិញ ក្រុមជម្រើសជាតិមួយនេះក្នុងអំឡុងពេលដូចគ្នា ក៏បានចេញនូវឈ្មោះជម្រើសទាំង ១១ នាក់របស់ខ្លួនផងដែរ ដែលនឹងត្រូវប៉ះជាមួយអេហ្ស៊ីប។ កីឡាករល្បីៗដូចជា ខ្សែប្រយុទ្ធ Luis Suarez និង Edinson Cavani សុទ្ធតែស្ថិតក្នុងចំណោមឈ្មោះទាំងនោះ។

ខាងក្រោមជាជម្រើសទាំង ១១នាក់របស់អេហ្ស៊ីប៖

El Shenawy; Fathy, Gabr, Hegazy, Abdel Shafi; Hamed, Elneny, Trezeguet, Said; Warda; Mohsen

ខាងក្រោមជាជម្រើសទាំង ១១នាក់របស់អ៊ុយរុយហ្គាយ៖

Muslera, Varela, Godin, Gimenez, Caceres; Nandez, Betancur, Vecino, Arrascaeta, Suarez, Cavani៕

ប្រភព៖ Goal ប្រែសម្រួល៖ ហ៊ីម រស្មី