WC 2018 កើតពិន័យ១១ម៉ែត្រ៧លើកដែលចុងក្រោយនេះជួយ ស៊ុយអែត ឈ្នះ កូរ៉េខាងត្បូង
- 2018-06-18 14:00:14
- ចំនួនមតិ 0 | ចំនួនចែករំលែក 0
WC 2018 កើតពិន័យ១១ម៉ែត្រ៧លើកដែលចុងក្រោយនេះជួយ ស៊ុយអែត ឈ្នះ កូរ៉េខាងត្បូង
ចន្លោះមិនឃើញ
ព្រឹត្តិការណ៍ប្រកួត World Cup 2018 បានកើតមានការពិន័យប៉េណាល់ទី១១ម៉ែត្រចំនួន៧លើកហើយ គិតចាប់តាំងពីបើកការប្រកួតចាប់ផ្តើមមក។ លើកទី៧នេះបានផ្តល់ឲ្យជម្រើសជាតិស៊ុយអែតយកឈ្នះកូរ៉េខាងត្បូងដោយលទ្ធផល ១-០ ដើម្បីទទួលបាន៣ពិន្ទុនៅពូល F។
ការប្រកួតនៅវគ្គទី១ ស៊ុយអែតបានព្យាយាមវាយសម្រុកយ៉ាងខ្លាំង និងមានឱកាសបញ្ជូនបាល់ចូលតំបន់គ្រោះថ្នាក់ ព្រមទាំងស៊ុតជាច្រើនលើក ប៉ុន្តែត្រូវបានអ្នកចាំទីរបស់កូរ៉េខាងត្បូងជួយសង្គ្រោះបាន។ ចំណែកកូរ៉េខាងត្បួងវិញ ក្រៅពីប្រើប្រព័ន្ធការពារខ្លាំង ក៏បានព្យាយាមវាយបកម្តងម្កាលដែរ។ យ៉ាងណា ការវាយបកនេះត្រូវបានខ្សែការពារស៊ុយអែតរារាំងបានល្អ។
៤៥នាទីវគ្គទី២បានចាប់ផ្តើមឡើងដោយក្រុមកូរ៉េខាងត្បូងបានបង្កើនការគ្រប់គ្រងបាល់ និងព្យាយាមសម្រុកវិញម្តង ប៉ុន្តែគ្មានប្រសិទ្ធភាព។ ផ្ទុយទៅវិញការសម្រុករបស់ស៊ុយអែតនៅតំបន់គ្រោះថ្នាក់បណ្តាលឲ្យខ្សែការពារកូរ៉េខាងត្បូងបង្កកំហុស ហើយអាជ្ញាកណ្តាលផ្តល់ពិន័យ១១ម៉ែត្រ បន្ទាប់ពីពិនិត្យមើលវីដេអូជំនួយអាជ្ញាកណ្តាល។ ភារកិច្ចពិន័យ១១ម៉ែត្រនេះ Granqvist ស៊ុតចូលបានសម្រេចនៅនាទីទី៦៥ដើម្បីជួយឲ្យស៊ុយអែតនាំមុខ ១-០។
ការផ្តល់ពិន័យ១១ម៉ែត្រក្នុងព្រឹត្តិការណ៍ World Cup 2018 គិតត្រឹមការប្រកួតរវាងស៊ុយអែត និងកូរ៉េខាងត្បូងនេះកើតមាន៧ដងហើយ។ ការសម្រេចចិត្តផ្តល់ពិន័យ១១ម៉ែត្រគឺពឹងផ្អែកលើ វីដេអូជំនួយអាជ្ញាកណ្តាល (VAR) ដែលជាប្រព័ន្ធកាត់សេចក្តីតាមបច្ចេកវិទ្យាសម័យទំនើប។ រហូតដល់ពេលនេះការទាត់ប៉េណាល់ទី៧ដងគឺសម្រេចទីបាន៥ដង និងមិនចូលទី២ដង។
បន្ទាប់ពីស៊ុយអែតនាំមុខ កូរ៉េខាងត្បូងក៏បានប្រឹងសម្រុកដើម្បីរកឱកាសទម្លាយសំណាញ់ទីតាមស្មើ ប៉ុន្តែហាក់មិនសូវមានប្រសិទ្ធភាពឡើយដោយរបាំងការពាររបស់ស៊ុយអែតរឹងមាំខ្លាំង។ លទ្ធផលនេះរក្សារហូតចប់ការប្រកួត។
នៅពេលនេះ ក្រុមជម្រើសជាតិស៊ុយអែតមាន៣ពិន្ទុ ឈរលេខ២ក្នុងពូល F ដែលស្មើនឹងក្រុមជម្រើសជាតិម៉ិកស៊ីកូដែលមាន៣ពិន្ទុ ឈរលើកំពូលតារាង។ ចំណែកអាល្លឺម៉ង់ស្ថិតនៅលេខ៣ និងកូរ៉េខាងត្បូង ស្ថិតនៅបាតតារាងដោយមិនទាន់មានពិន្ទុដូចគ្នា៕