ប្រមុខការទូតធំៗប្រចាំUN នាំគ្នាស្លៀកអាវជម្រើសជាតិខ្លួន ដើម្បីអបអរ World Cup (មានវីដេអូ)
- 2018-06-15 12:22:47
- ចំនួនមតិ 0 | ចំនួនចែករំលែក 0
ប្រមុខការទូតធំៗប្រចាំUN នាំគ្នាស្លៀកអាវជម្រើសជាតិខ្លួន ដើម្បីអបអរ World Cup (មានវីដេអូ)
ចន្លោះមិនឃើញ
នៅ New York សហរដ្ឋអាមេរិក នាទីស្នាក់អង្គការសហប្រជាជាតិ អគ្គរាជទូត អគ្គរដ្ឋទូត ព្រមទាំងអ្នកការទូតធំៗជាច្រើនទៀតនៃបណ្ដាប្រទេសដែលស្ថិតក្នុងក្រុមប្រឹក្សាសន្តិសុខសុទ្ធតែត្រូវបានប្រទះឃើញក្នុងសំលៀកបំពាក់អាវក្រុមជម្រើសជាតិខ្លួន ក្នុងកិច្ចប្រជុំកាលពីម្សិលមិញ មុនពេលរុស្ស៊ីប្រកួតបើកឆាក World Cup ២០១៨ ជាមួយអារ៉ាប៊ីសាអ៊ូឌីត។
ស្ថិតក្នុងអាវក្រុមជម្រើសជាតិ អគ្គរដ្ឋទូតរុស្ស៊ីប្រចាំអង្គការសហប្រជាជាតិលោក Vassily Nebenzia ហាក់មានភាពសកម្មជាងគេ ក្នុងការអបអរព្រឹត្តិការណ៍ប្រកួតបាល់ទាត់ពិភពលោកលើកនេះ។ លោកត្រូវបានប្រទះឃើញថា បានស៊ុត ទាត់បាល់ទៅវិញទៅមកជាច្រើនលើក ព្រមទាំងបង្កលក្ខណៈនៃការលេងប៉ះបាល់ជាមួយអ្នកការទូតផ្សេងទៀតដែលមានវត្តមាននៅទីនោះ។ បន្តបន្ទាប់ទៀត បណ្ដាប្រមុខការទូតរបស់បណ្ដាប្រទេសស្ថិតក្នុងក្រុមប្រឹក្សាសន្តិសុខនៃអង្គការសហប្រជាជាតិក៏បានរៀបចំខ្លួនក្នុងសំលៀកបំពាក់ក្រុមជម្រើសជាតិរៀងៗខ្លួនផងដែរ។ ប្រភព៖ Goal
ប្លែកខុសគេ ចំពោះអគ្គលេខាធិការអង្គការសហប្រជាជាតិ លោក Antonio Guterres ដោយលោកមិនបានស្លៀកអាវជម្រើសជាតិព័រទុយហ្គាល់ដែលជាប្រទេសកំណើតរបស់ខ្លួនឡើយ។ ផ្ទុយទៅវិញ លោកបានជ្រើសយកសំលៀកបំពាក់អាជ្ញាកណ្ដាលដើម្បីចូលរួមអបអរព្រឹត្តិការណ៍ World Cup នៅរុស្ស៊ី។
ប្រមុខការទូតធំៗទាំងនោះ បានជួបជជែកសំណេះសំណាលពិភាក្សាគ្នា រួចក៏បាននាំគ្នាថតរូបទុកជាអនុស្សាវរីយ៍ មុនពេលចូលទៅកន្លែងតុប្រជុំរៀងៗខ្លួន។
សូមបញ្ជាក់ផងដែរ ក្រុមប្រឹក្សាសន្តិសុខនៃអង្គការសហប្រជាជាតិ គឺជាស្ថាប័នអន្តរជាតិដ៏សំខាន់ និងមានឥទ្ធិពល ក្នុងតួនាទីថែរក្សា "សន្តិភាព" និង "សន្តិសុខ" ពិភពលោក។ ស្ថាប័ននេះ មានសមាជិក មកពី ១៥ ប្រទេស ក្នុងនោះ ៥ គឺជាសមាជិកអចិន្ត្រៃយ៍ ខណៈ ១០ គឺជាសមាជិកមិនអចិន្ត្រៃយ៍ដែលតែងតែប្ដូររៀងរាល់ ២ ឆ្នាំម្ដង។
បច្ចុប្បន្ន ប្រទេសជាសមាជិកក្រុមប្រឹក្សាសន្តិសុខ រួមមាន៖ ចិន បារាំង រុស្ស៊ី អង់គ្លេស សហរដ្ឋអាមេរិក បូលីវី កូឌីវ័រ ហ្គីណេ អេត្យូពី កាហ្សាក់ស្ថាន គុយវ៉ែត ហុល្លង់ ប៉េរូ ប៉ូឡូញ និងស៊ុយអែត។
សូមទស្សនាវីដេអូខាងក្រោម អំពីទិដ្ឋភាពដែលប្រមុខទូតនៃបណ្ដាប្រទេសក្នុងក្រុមប្រឹក្សាសន្តិសុខនៃអង្គការសហប្រជាជាតិបានស្ថិតក្នុងសម្លៀកបំពាក់ក្រុមជម្រើសជាតិ៖៕