នៅក្មេងទេ តែចេះរកលុយពីរបរងាយៗដើម្បីបានប្រាក់រៀនសូត្រ
- 2018-06-19 02:48:11
- ចំនួនមតិ 0 | ចំនួនចែករំលែក 0
នៅក្មេងទេ តែចេះរកលុយពីរបរងាយៗដើម្បីបានប្រាក់រៀនសូត្រ
ចន្លោះមិនឃើញ
ឆ្លៀតពេលទំនេរពីការសិក្សា កុមារាពីរនាក់មិនចំណាយពេលដើរលេងឥតប្រយោជន៍នោះឡើយ តែអ្នកទាំងពីរបាននាំគ្នាដើរតាមព្រៃក្នុងបរិវេណឧទ្យានអង្គរដើម្បីចាប់មេអំបៅគ្រប់ប្រភេទសម្រាប់លក់យកប្រាក់ផ្គត់ផ្គង់ការសិក្សារបស់ខ្លួន។
កុមារា ហាន់ និង ម៉ី ប្រាប់Sabay ថា ដើម្បីបានថវិកាខ្លះផ្គត់ផ្គង់ការសិក្សា ខ្លួនបានដើរចាប់សត្វមេអំបៅរយៈពេលជិតបីខែមកហើយដើម្បីយកទៅលក់នៅហាងអាហារមួយកន្លែងក្នុងក្រុងសៀមរាប។
កុមារា ហាន់ ឲ្យដឹងទៀតថា អ្នកទាំងពីរដើរចាប់មេអំបៅនៅពេលព្រឹក និងទៅរៀននៅពេលរសៀល ហើយថាការដើរចាប់មេអំបៅបានត្រូវចំណាយពេលពីរព្រឹកទើបអាចយកទៅលក់បានម្តង ដោយម្តងមានមេអំបៅចន្លោះពី២០ទៅ៤០ក្បាល និងថាបានប្រាក់ជាមធ្យម១៥ ០០០រៀល។
អ្នកទាំងពីរឲ្យដឹងថា៖ « ដំបូងឡើយពួកខ្ញុំអត់ដឹងថាមានគេទិញមេអំបៅទេ តែបានបងប្រុសគាត់ធ្លាប់ដើរចាប់មេអំបៅប្រាប់ថា ឲ្យតែចាប់បានគឺមានហាងនៅម្ដុំព្រះអង្គចេកព្រះអង្គចមចាំទទួលទិញហើយ។ ចំពោះមេអំបៅដែលហាងទទួលទិញគឺដើម្បីដាក់តាំងឲ្យភ្ញៀវបានទស្សនា»។
កុមារា ហាន់ ឲ្យដឹងថា ដើម្បីអាចចាប់មេអំបៅបាន គឺត្រូវមានឧបករណ៍ឃ្លុបដងវែង និងកន្ដ្រកសម្រាប់ដាក់មេអំបៅ។ អ្នកទាំងពីរថាខ្លួនបានដើរចាប់មេអំបៅតាមតំបន់ឧទ្យានអង្គរដែលមានផ្កាព្រៃច្រើន។
ក្នុងមួយខែ កុមារា ហាន់ និងម៉ី ថាអាចរកចំណូលពីការដើរចាប់មេអំបៅបានចន្លោះពី ២០ ទៅ២៥ម៉ឺនរៀល។ ប្រាក់ដែលអ្នទាំងពីរទទួលបានគឺជូនទៅម្ដាយសម្រាប់ទិញម្ហូបខ្លះៗ និងសម្រាប់ចំណាយលើការសិក្សាខ្លះ៕