ក្រុម៤លើកពាន World Cup ដោយមិនស្គាល់ពាក្យថាចាញ់

2018-06-19 07:41:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួត World Cup ជិតឈានដល់សប្ដាហ៍ទីពីរហើយគិតត្រឹមថ្ងៃអង្គារនេះក្រោយចំណាយប្រកួតបាន៥ថ្ងៃកន្លងមក។

គិតទាំងលើកនេះផងព្រឹត្តិការណ៍បាល់ទាត់ដ៏ធំជាងគេលើពិភពលោកមួយនេះធ្លាប់ប្រារព្ធបាន២១លើកមកហើយ។ ងាកទៅរម្លឹកអតីតកាលក្រុមឈ្នះជើងឯកទាំង២០កន្លងត្រូវប្រកួតយ៉ាងស្វិតស្វាញទម្រាំលើកពាន។

១៦ក្រុមបានលើកពានដោយមានឈ្នះចាញ់ ហើយមានតែ៤ក្រុមប៉ុណ្ណោះដែលលើកពានទាំងប្រកួតមិនចាញ់សោះ។ ក្រុមទាំង៤នោះមានក្រុមណាខ្លះយើងទៅមើលខាងក្រោមទាំងអស់គ្នា។

១. អ៊ុយរូហ្គាយ (ឆ្នាំ១៩៣០)

ពាន World Cup លើកដំបូងបង្កើតឡើងក្នុងឆ្នាំ១៩៣០ដោយអ៊ុយរូហ្គាយផ្ទាល់ធ្វើជាម្ចាស់ផ្ទះ។ ក្នុងឆ្នាំនោះមានតែ១២ប្រទេសប៉ុណ្ណោះបានចូលរួមហើយ អាមេរិក, យូហ្គោស្លាវី, អាហ្សង់ទីន បានឡើងទៅវគ្គពាក់កណ្ដាលផ្ដាច់ព្រ័ត្រ។

អ៊ុយរូហ្គាយបានយកឈ្នះ យូហ្គោស្លាវី ៦-១ ដើម្បីឡើងទៅប៉ះអាហ្សង់ទីននៅវគ្គផ្ដាច់ព្រ័ត្រ ហើយបានបន្តបំបាក់ក្រុមខ្លាំងអាហ្សង់ទីនដោយលទ្ធផល៤ទល់នឹង២។

២. អ៊ីតាលី (ឆ្នាំ១៩៣៨)

ឆ្នាំ១៩៣៨គឺជាព្រឹត្តិការណ៍ World Cup លើកទី៣ដោយបារាំងធ្វើជាម្ចាស់ផ្ទះ។ គ្រានោះអ៊ីតាលីបានក្លាយជាជើងឯកដោយមិនស្គាល់ពាក្យថាចាញ់សោះក្រោយយកឈ្នះហុងគ្រីនៅវគ្គផ្ដាច់ព្រ័ត្រក្នុងលទ្ធផល ៤-២។ ជ័យជម្នះរបស់អ៊ីតាលីក៏ធ្វើឲ្យពួកគេក្លាយជាក្រុមដំបូង ដែលអាចការពារតំណែងជើងឯក World Cup បានសម្រេចបន្ទាប់ពីពួកគេឈ្នះលើកទីមួយក្នុងឆ្នាំ១៩៣៤នៅក្នុងប្រទេសអ៊ីតាលីផ្ទាល់។

៣. ប្រេស៊ីល (ឆ្នាំ១៩៧០)

ក្រុមជោគជ័យបំផុតនៅ World Cup ប្រេស៊ីលបានក្លាយជាជើងឯកលើកទី៣នៅឆ្នាំ១៩៧០ ដែលមានប្រទេសម៉ិកស៊ីកូធ្វើជាម្ចាស់ផ្ទះ។ ប្រេស៊ីលដែលប្រជុំដោយកីឡាករខ្លាំងៗមានដូចជា Pele, Gerson, Jairzinho, Tostao និង Rivellino បានយកឈ្នះអាល្លឺម៉ង់ ៤ទល់នឹង១ ក្លាយជាជើងឯកដោយមិនចាញ់១ប្រកួតសោះ។

៤. ប្រេស៊ីល (ឆ្នាំ២០០២)

មុនខុសពីប្រេស៊ីលឆ្នាំ ១៩៧០ ក្រុមប្រេស៊ីលឆ្នាំ២០០២បានសាងប្រវត្តិសាស្ត្រជាថ្មីនៅ World Cup កូរ៉េខាងត្បូង និងជប៉ុន ដោយឈ្នះជើងឯកដោយមិនស្គាល់បរាជ័យ។ នៅវគ្គផ្ដាច់ព្រ័ត្រក្រុមរហស្សនាមថាសាំបាបានផ្ដួលអាល្លឺម៉ង់ដោយលទ្ធផល ២ទល់នឹង០ ស៊ុតបញ្ចូលទីដោយ Ronaldo Nazario ទាំង២គ្រាប់៕