ឧកញ៉ាមួយរូប ប្រកាសផ្ដល់ទុនឲ្យយុវជនរកស៊ី មិនគិតការប្រាក់មួយរៀល
- 2018-06-19 08:15:23
- ចំនួនមតិ 0 | ចំនួនចែករំលែក 0
ឧកញ៉ាមួយរូប ប្រកាសផ្ដល់ទុនឲ្យយុវជនរកស៊ី មិនគិតការប្រាក់មួយរៀល
ចន្លោះមិនឃើញ
អ្នកវិនិយោគក្នុងស្រុកមួយរូប លោកឧកញ៉ា សៀ ឬទ្ធី ស្ថាបនិកនៃក្រុមហ៊ុន Worldbridge Group បានផ្ដើមគំនិតបង្កើតមូលនិធិអាជីកម្ម (មិនមែនធនាគារពាណិជ្ជ) ក្នុងគោលបំណងវិនិយោគជាមួយយុវជន ជាសហគ្រិនក្មេងៗ ដែលគ្មានធនធានធ្វើអាជីវកម្ម ឬចង់ពង្រីកអាជីវកម្មពីតូចទៅមធ្យម ឬធំ។
មូលនិធិអាជីវកម្មទីមួយនៅកម្ពុជាឈ្មោះថា OCCTANE ដែលបានបោះទុនដំបូងរហូតដល់ ៥លានដុល្លារអាមេរិក មានមហិច្ឆតាជួយឲ្យយុវជនមានគំនិតរកស៊ីក្លាយជាសគ្រិនវ័យឆ្លាតរបស់កម្ពុជា ឆ្ពោះទៅរកសេដ្ឋកិច្ចឌីជីថលនាពេលអនាគត។
ឧកញ៉ា សៀ ឬទ្ធី ថ្លែងថា ៖ «នៅក្នុងប្រទេសកម្ពុជា មិនសូវខ្វះទេគំនិតច្នៃប្រឌិត និងស្មារតីសហគ្រិន។មូលនិធិអាជីវកម្ម គឺជាឫសគល់នៃចក្ខុវិស័យមួយរបស់យើង ព្រោះខ្ញុំបានឃើញសហគ្រិនកម្ពុជាជំនាន់ថ្មីជាច្រើនមានគំនិតអាជីវកម្មល្អៗ តែមិនមានដើមទុន ហើយអ្នកខ្លះបានចាប់ផ្ដើមធ្វើជំនួញហើយក៏ដួលទៅវិញ ដោយសារតែខ្វះអ្នកជំនាញប្រឹក្សា និងការលើកទឹកចិត្ត»។
«យើងនឹងផ្ដល់ការវិនិយោគចន្លោះពី ៥០០០ដុល្លារ ដល់ ១ម៉ឺនដុល្លារសម្រាប់ការចាប់បើកដំណើរការក្រុមហ៊ុនដំណាក់កាលដំបូង។ សម្រាប់ក្រុមហ៊ុនដែលមានផលិតផលប្រើប្រាស់នៅក្នុងទីផ្សាររួចហើយ ក៏អាចទទួលបានមូលនិធិចាប់ពី ២៥ ០០០ដុល្លារក្នុងមួយក្រុមហ៊ុន។ ជាងនេះទៀត មូលនិធិនេះដែរ នឹងផ្ដល់ការប្រឹក្សាអាជីវកម្ម ក៏ដូចជាធនធានមនុស្សបន្ថែម ប្រសិនបើមានតម្រូវការ»។ លោកឧកញ៉ា បន្ថែម។
អ្នកជំនួញជើងចាស់រូបនេះ បញ្ជាក់ថា មូលនិធិនេះផ្ដល់ដើមទុនដល់សហគ្រិនមិនទាមទារការប្រាក់នោះទេ ប៉ុន្តែត្រូវមានលក្ខខណ្ឌតម្រូវដើម្បីទទួលប្រាក់ទុននោះ ត្រូវមានគំនិតច្នៃប្រឌិត ថាចង់ធ្វើអី្វ (មានគម្រោងអាជីវកម្មច្បាស់លាស់) អាជីវកម្មជាក្រុម ឬបុគ្គល និងមានទស្សនវិស័យផ្ដោតលើអ្វីមួយប្រាកដ។ តួយ៉ាងអាជីវកម្មអាទិភាព រួមមាន វិស័យចល័តដឹកជញ្ជូន ពាណិជ្ជកម្មអេឡិចត្រូនិច( E-commerce) បច្ចេកវិទ្យាហិរញ្ញវត្ថុ( Fintech) បច្ចេកវិទ្យាកសិកម្ម (agrotech) បច្ចេកវិទ្យាអប់រំ (edutech) សុខភាព(biotech) និងទេសចរណ៍ជាដើម។
ឧកញ៉ា សៀ ឬទ្ធី បង្ហើបថា ចំពោះភាគលាភរវាងអ្នកផ្ដល់ទុន និងម្ចាស់អាជីវកម្មនឹងត្រូវពិភាក្សាតាមក្រោយ នៅពេលណាមួយដែលក្រុមហ៊ុននោះបានដំណើរការរលូន និងមានផលកម្រៃសមរម្យ។
ឯកឧត្តម កាន ច័ន្ទមេត្តា រដ្ឋលេខាធិការ ក្រសួងប្រៃសណីយ៍ គូសបញ្ជាក់ថា ស្របតាមគោលនយោបាយអភិវឌ្ឍន៍វិស័យបច្ចេកវិទ្យាព័ត៌មាន ខ្ញុំជឿថា កម្ពុជានឹងមានសហគ្រិនបច្ចេកវិទ្យាឈានមុខមួយក្នុងវិស័យឌីជីថលនាពេលអនាគត។
យុវជនម្នាក់ ចូលរួមក្នុងសន្និសីទបើកក្រុមហ៊ុន មូលនិធិអាជីវកម្ម សូមមិនបញ្ចេញឈ្មោះបានប្រាប់ Sabay ថា៖ « ខ្ញុំរីករាយចំពោះមូលនិធិនេះ ប៉ុន្តែគម្រោងអាជីវកម្មខ្ញុំ ត្រឹម ៥០០០ដុល្លារ វាតិចតួចពេកប្រសិនបើរកស៊ីនៅភ្នំពេញគឺមិនគ្រប់គ្រាន់ទេ ប៉ុន្តែបើមូលនិធិនេះមានផ្ដល់ទីតាំងឲ្យទៀតនោះកាន់តែល្អ»។