បណ្ដាំរបស់ Evra៖ បើ Ronaldo ហៅអ្នកទៅផ្ទះរបស់គេហូបបាយថ្ងៃត្រង់ ចូរកុំទៅឲ្យសោះ!!!

2018-06-19 11:29:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារស្លាប Patrice Evra ក្នុងថ្ងៃនេះ បានផ្ដាំមនុស្សគ្រប់គ្នាថា បើខ្សែប្រយុទ្ធ Cristiano Ronaldo ហៅទៅទទួលទានបាយថ្ងៃជាមួយ ចូរកុំទៅឲ្យសោះ។ មូលហេតុដែលកីឡាករបារាំងនិយាយបែបនេះ ព្រោះ Ronaldo ជាមនុស្សដែល "ហ្វឹកហាត់មិនឈប់ឈរសោះ"។

Evra បានថ្លែងប្រាប់សារព័ត៌មាន ITV ថា៖ "ខ្ញុំចង់ផ្ដាំផ្ញើទៅអ្នកទាំងអស់គ្នាថា បើ Cristiano Ronaldo បបួលអ្នកទៅទទួលទានអាហារថ្ងៃត្រង់ជាមួយ ចូរនិយាយ 'ទេ' ទៅគេភ្លាម"។

កីឡាករបារាំងបានលើកឡើងថា មានពេលមួយ ក្រោយហ្វឹកហាត់បាល់រួច (កាលលេងនៅ Manchester United ជាមួយគ្នា) ខ្លួនធ្លាប់ត្រូវបាន Ronaldo អញ្ជើញទៅផ្ទះរបស់គេ ដើម្បីធ្វើការស្រុះស្រូបអាហារថ្ងៃត្រង់ជាមួយគ្នា។ កាលនោះ នៅលើតុ Evra មិនឃើញអ្វីក្រៅពីសាឡាត់ និងសាច់មាន់សុទ្ធ រួមជាមួយទឹកសុទ្ធឡើយ។ សូម្បីទឹកផ្លែឈើក៏មិនមានផង។

នៅពេលនោះ ខ្សែការពារបារាំង រំពឹងថានឹងមានម្ហូបសាច់ជាច្រើនទៀត នឹងដាក់ជាបន្តបន្ទាប់ដើម្បីទទួលខ្លួនក្នុងឋានៈជាភ្ញៀវ។ ទោះជាយ៉ាងណា ចុងក្រោយ ទើប Evra ដឹងខ្លួនថា មិនមានម្ហូបផ្សេងនោះទេក្រៅពីបណ្ដាមុខម្ហូបបែបសុខភាពរៀបរាប់ខាងលើ។

ទទួលទានមិនទាន់រួចផង ស្រាប់តែ Ronaldo ងើបឈរឡើង រួចបបួល Evra លេងប៉ះបាល់ជាមួយគ្នា។ បន្ទាប់មកខ្សែប្រយុទ្ធព័រទុយហ្គាល់ បានបបួលកីឡាករបារាំងទៅ ធ្វើការត្រាំក្នុងទឹកក្ដៅ រួចទៅស្ទីមខ្លួនបន្ត។ ដូច្នេះហើយទើប Evra ដឹងថា Ronaldo ហៅខ្លួនមកផ្ទះរបស់គេ មិនមែនគ្រាន់តែ "ទទួលបាយថ្ងៃត្រង់" នោះទេ តែគឺ "មកបន្តហ្វឹកហាត់បន្ថែម" ដើម្បីត្រៀមក្នុងការប្រកួតខាងមុខ។ ប្រការនេះហើយ ទើប Evra ផ្ដាំក្នុងន័យកំប្លែងទៅមនុស្សគ្រប់គ្នា ឲ្យបដិសេធនឹងការអញ្ជើញបាយថ្ងៃត្រង់របស់ Ronaldo ព្រោះខ្សែប្រយុទ្ធព័រទុយហ្គាល់ "ហ្វឹកហាត់មិនឈប់ឈរសោះ"។

សូមបញ្ជាក់ផងដែរថា Evra បានលេងជាមួយ Ronaldo ពីឆ្នាំ ២០០៦ ដល់ឆ្នាំ ២០០៩ នៅក្លឹបបិសាចក្រហម។

ខ្សែប្រយុទ្ធ Ronaldo កន្លងមកត្រូវបានសារព័ត៌មានជាច្រើនរាយការណ៍ថា ស្ថិតក្នុងចំណោមកីឡាករដែលមានកាយសម្បទារឹងមាំបំផុត ដោយសារតែការហ្វឹកហាត់យ៉ាងខ្ជាប់ខ្ជួន និងការទទួលទានអាហារសុខភាពជាប្រចាំ៕

ប្រភព៖ Marca ប្រែសម្រួល៖ ហ៊ីម រស្មី