អាជ្ញាធរជូនដំណឹងឲ្យពលរដ្ឋក្នុងសង្កាត់កាកាប ត្រៀមទឹកទុកប្រើប្រាស់រយៈពេលខ្លី
- 2018-06-20 06:51:30
- ចំនួនមតិ 0 | ចំនួនចែករំលែក 0
អាជ្ញាធរជូនដំណឹងឲ្យពលរដ្ឋក្នុងសង្កាត់កាកាប ត្រៀមទឹកទុកប្រើប្រាស់រយៈពេលខ្លី
ចន្លោះមិនឃើញ
រដ្ឋាករស្វយ័តក្រុងភ្នំពេញឲ្យដឹងថានៅចុងខែនេះសង្កាត់កាកាប ខណ្ឌពោធិ៍សែនជ័យនឹងត្រូវកាត់ផ្តាច់ទឹកមួយរយៈដោយថាដើម្បីកាត់ភ្ជាប់បំពង់មេនាំទឹកទំហំ៥០០មីលីម៉ែត្រ និងជូនដំណឹងឲ្យពលរដ្ឋត្រៀមបម្រុងទឹកទុកប្រើប្រាស់សម្រាប់រយៈពេលខ្លីនេះ។
ក្នុងលិខិចជូនដំណឹងទៅកាន់អភិបាលខណ្ឌពោធិ៍សែនជ័យចុះថ្ងៃទី២០ ខែមិថុនា ឆ្នាំ២០១៨ រដ្ឋាករទឹកបានបញ្ជាក់ថាខ្លួននឹងផ្អាកការផ្គត់ផ្គង់ទឹករយៈពេលប្រាំបីម៉ោងចាប់ពីម៉ោង២១យប់ថ្ងៃទី២៨ ខែមិថុនា ដល់ម៉ោង៥ភ្លឺ ថ្ងៃទី២៩ ខែមិថុនា ឆ្នាំ២០១៨។
ប្រភពខាងលើបន្តថាការផ្អាកនេះគឺរដ្ឋករទឹកគ្រោងកាត់ភ្ជាប់បំពង់មេនាំទឹកថ្មីទំហំ៥០០មីលីម៉ែត្រត្រង់មុខអាកាសយានដ្ឋានអន្តរជាតិភ្នំពេញ កែងច្រកចោលវត្តតាំងកសាង (ផ្លូវលេខ១១០ កែងនឹងផ្លូវលេខ១០៥K) ដែលមានទីតាំងក្នុងសង្កាត់កាកាប។
«ការងារកាត់ភ្ជាប់បំពង់នាំទឹកថ្មីនេះ តម្រូវឲ្យរដ្ឋាករទឹកស្វយ័តក្នុងភ្នំពេញផ្អាកការផ្គត់ផ្គង់ទឹកនៅលើផ្លួវ១១០ ចាប់ពីផ្លូវលេខ២០០៥ ដល់ផ្លូវលេខ១០៥K មួយរយៈពេលខ្លីប្រមាណជាប្រាំបីម៉ោង...និងអាចធ្វើឲ្យគុណភាពទឹកល្អក់កករក្នុងរយៈពេលខ្លីក្រោយការតភ្ជាប់បំពង់ទឹកថ្មីរួច»។ ប្រភពដដែលបន្ត។
រដ្ឋាករទឹកស្វយ័តក្រុងភ្នំពេញស្នើឲ្យអាជ្ញាធរជូនដំណឹងដល់សហគ្រាស រោងងចក្រ និងប្រជាពលរដ្ឋមានផ្ទះនៅតំបន់នោះត្រៀមទឹកបម្រុងទុកប្រើប្រាស់ក្នុងរយៈពេលនៃការកាត់ភ្ជាប់នេះ៕