សាឡាត់ ស្រីឡាង ញ័រខ្លួនដូចកូនសត្វប៉ះឈុតថើបមាត់ជាមួយ លឹម ជាឡាយ

2018-06-21 05:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ល្ងាចមិញនេះផលិតកម្ម LD បានធ្វើពិធីសម្ពោធខ្សែភាពយន្តភាគថ្មីរបស់ខ្លួនរឿង"គូស្នេហ៍បម្រុង" បន្ទាប់ពីដាក់បញ្ចាំងនៅទូរទស្សន៍CTN បានមួយសប្ដាហ៍កន្លងទៅ។ ដោយឡែក សាឡាត់ ស្រីឡាង ជាតួឯកស្រីបានលើកឡើងថា ក្នុងរឿងថ្មីនេះនាង មានផលលំបាកខ្លះៗពេលសម្ដែងពិសេសត្រង់ឈុតឆាកថើបមាត់ជាមួយ លឹម ជាឡាយ។

ស្រីឡាង ថា៖" តាំងពីខ្ញុំសម្ដែងមកឈុតមាត់ទល់នឹងមាត់មានម្ដង តែក្នុងរឿង"គូស្នេហ៍បម្រុង" មានមួយទៀតជាមួយបង ឡាយ។ ត្រង់ឈុតហ្នឹងខ្ញុំអៀនហើយភ័យឡើងញ័រខ្លួនអត់ហ៊ាននិយាយរកគាត់ទេក្រោយពេលសម្ដែងរួច"។

ទោះបីជាឈុតឆាកឱបថើបពិបាកខ្លះពេលសម្ដែងតែ ស្រីឡាង នៅតែអាចធ្វើទៅបាន គ្រាន់តែចាយពេលវេលាច្រើនបន្តិចទម្រាំសម្ដែងត្រូវដូចតួអង្គមានចរិតឬកពារកាចឆ្នាសឆ្នើម ក្រមិចក្រមើម។

ថ្លែងក្នុងពិធីសម្ពោធរឿងខាងលើលោក លៀក លីដា ចាងហ្វាងផលិតកម្ម LD Picture បានឲ្យដឹងថា រឿង"គូស្នេហ៍បម្រុង" មាន៥០ភាគ ជាប្រភេទរឿងបែបស្នេហាកាច់កុងរវាងតួឯកប្រុស និងតួឯកស្រីលាយឡំជាមួយឈុតឆាកកំប្លែង និងអត្ថន័យអប់រំប្រហែល ៣០ ភាគរយផងដែរ។

រឿងភាគថ្មីនេះប្រើពេលវេលាថតរយៈពេល ៥ខែ និងចាយដើមទុនអស់ច្រើនជាងរឿងមុនៗដែលធ្លាប់បញ្ចាំងកន្លងមក ដោយបានសម្រិតសម្រាំងផ្ដិតយកប្លង់ថតល្អៗជាងមុនឆ្ងាយ។ ដូច្នេះហើយទើបលោក សង្ឃឹមនឹងជឿជាក់ថា រឿង"គូស្នេហ៍បម្រុង" នឹងទទួលបានការគាំទ្រច្រើនពីទស្សនិកជនក្រោយដាក់បញ្ចាំងនៅទូរទស្សន៍CTN បានជាងមួយ អាទិត្យ។

លោកថា៖"លើកនេះយើងធ្វើខុសពីពេលមុនៗ លើកមុនដាក់បញ្ចាំងនៅថ្ងៃទី១ភ្លាមយើងសម្ពោធភ្លាម ដោយសារតែយើងចង់ដឹងថារឿងហ្នឹងមានអ្នកមើលច្រើនអត់។ តែក្រោយដាក់បញ្ចាំងនៅ CTN បាន១អាទិត្យ ២ថ្ងៃរឿងនេះទទួលបានការគាំទ្រច្រើនលើក្ដីរំពឹងទុកពីពុកម៉ែបងប្អូន"។

រឿង"គូស្នេហ៍បម្រុង" ចូលរួមសម្ដែងដោយលោក លឹម ជាឡាយ សាឡាត់ ស្រីឡាង ពុធ ស្រីខួច ណាត់ បូរី ប៉ុបពី ព្រមទាំងតារាសម្ដែងប្រុសស្រីជាច្រើនរូបទៀត៕