ក្រសួងការងារគ្រោងសហការជាមួយចិនបណ្តុះបណ្តាលជំនាញផ្កាយរណបនៅវិទ្យាស្ថានមួយក្នុងក្រុងភ្នំពេញ
- 2018-06-21 08:59:22
- ចំនួនមតិ 0 | ចំនួនចែករំលែក 0
ក្រសួងការងារគ្រោងសហការជាមួយចិនបណ្តុះបណ្តាលជំនាញផ្កាយរណបនៅវិទ្យាស្ថានមួយក្នុងក្រុងភ្នំពេញ
ចន្លោះមិនឃើញ
ក្រសួងការងារមានគម្រោងបណ្តុះបណ្តាលជំនាញផ្កាយរណបនៅវិទ្យាស្ថានរបស់ខ្លួនមួយនៅទីក្រុងភ្នំពេញដោយត្រៀមសហការជាមួយសាកលវិទ្យាល័យវ័យចំណាស់ជាង១០០ឆ្នាំមួយរបស់ចិន និងថាមុខជំនាញនេះនឹងមានតម្រូវការខ្ពស់នៅពេលខាងមុខ។
នៅលើទំព័តហ្វេសប៊ុករបស់ក្រសួងការងារនារសៀលនេះ បានសរសេរថាឯកឧត្តម អ៊ិត សំហេង រដ្ឋមន្ត្រីក្រសួងការងារ បានអនុញ្ញាតឲ្យលោកជំទាវ Chen Xu ប្រធានក្រុមប្រឹក្សាភិបាល នៃសាកលវិទ្យាល័យ Tsinghua ចូលជួបសម្តែងការគួរសម។ ក្នុងជំនួបនោះភាគីទាំងពីរបានពិភាក្សាការងារ ស្តីពី កិច្ចសហប្រតិបត្តិការ លើវិស័យអប់រំ បណ្តុះបណ្តាល បច្ចេកទេស និងវិជ្ជាជីវៈ។
បន្ទាប់ពីជំនួបនេះ ឯកឧត្តម ឡៅ ហ៊ីម ប្រតិភូរាជរដ្ឋាភិបាល ទទួលបន្ទុកជា អគ្គនាយកអប់រំ បណ្តុះបណ្តាល បច្ចេកទេស និងវិជ្ជាជីវៈ បានឲ្យដឹងថាក្រសួងបានស្នើដល់ភាគីសាកលវិទ្យាល័យជួយផ្តល់បន្ថែមទៀតនូវអាហារូបករណ៍លើការបណ្តុះបណ្តាលធនធានមនុស្ស ដោយថាសាកលវិទ្យាល័យនេះមានជំនាញវិស័យកសិកម្ម សុខាភិបាល បច្ចេកវិទ្យាទំនើបៗ ជាពិសេសខាងផ្នែកផ្កាយរណប។ នេះបើតាមប្រភពដដែល។
ត្រង់ជំនាញផ្កាយរណបនេះ ឯកឧត្តម បន្តថាបច្ចុប្បន្ននិស្សិតកម្ពុជាពុំទាន់មានជំនាញនេះនៅឡើយ ហើយថាកម្ពុជានឹងត្រូវការជំនាញនេះច្រើននៅថ្ងៃអនាគត។ ឯកឧត្តមបន្តថា៖ «យើងនឹងត្រៀមបណ្តុះបណ្តាលលើជំនាញនេះ នៅវិទ្យាស្ថានពហុបច្ចេកវិទ្យាកម្ពុជា(NPIC) ។ នៅពេលយើងមានកិច្ចសហប្រតិបត្តិការជាមួយភាគីចិនហើយ យើងនឹងរៀបចំកិច្ចការនេះ ឥឡូវនេះយើងនៅខ្វះទាំងធនធានមនុស្ស និងទាំងសំភារៈ។ ជាផែនការក្រសួងនឹងរៀបចំ នាពេលឆាប់ៗនេះ យើងត្រូវត្រៀមជាមុនជាមួយដៃគូសហប្រតិបត្តិការ ហើយផ្នែកនេះវាជាតម្រូវការរបស់ប្រទេសកម្ពុជាយើងនាពេលអនាគត»។ នេះបើតាមព័ត៌មានពីហ្វេសប៊ុកក្រសួងដដែល។
ឯកឧត្តមឲ្យដឹងថាបច្ចុប្បន្នកម្ពុជាប្រើប្រាស់ទូស័ព្ទដៃតាមប្រព័ន្ធខ្សែកាបអុបទិច ខណៈប្រទេសជឿនលឿនប្រើប្រាស់តាមប្រព័ន្ធផ្កាយរណប។ ឯកឧត្តមបន្តថា៖ «យើងនឹងជជែកគ្នាជាមួយខាងភាគីចិនសិន ថាតើយើងត្រូវរៀបចំធ្វើអីខ្លះ ដែលជាតម្រូវការធនធានមនុស្សរបស់កម្ពុជានាពេលអនាគត និងយើងត្រូវ ផ្សព្វផ្សាយ ថាផ្នែកនេះជាតម្រូវការខ្ពស់របស់កម្ពុជាយ៉ាងម៉េច»៕
ចុចអាន៖