៤ចំណុចពីបរាជ័យដ៏អាក្រក់របស់អាហ្សង់ទីនក្រោមថ្វីជើងក្រូអាត

2018-06-22 02:37:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ជម្រើសជាតិអាហ្សង់ទីនបានបរាជ័យយ៉ាងគួរឲ្យភ្ញាក់ផ្អើលក្រោមថ្វីជើងរបស់ក្រូអាតក្នុងការប្រកួត World Cup វគ្គសន្សំពិន្ទុពូលD។

ជ័យជម្នះខាងលើធ្វើឲ្យក្រូអាតក្លាយជាក្រុមទី៤ដែលកក់កៅអីវគ្គ១៦ក្រុមទាំងសល់១ប្រកួតនៅក្នុងដៃក្រោមការស៊ុតបញ្ចូលទី៣គ្រាប់របស់កីឡាករ Ante Rebic, Luka Modric និង Rakitic។ ខាងក្រោមគឺជាចំណុចសំខាន់៤ក្នុងការប្រកួតយប់មិញដែលប្រិយមិត្តគួរដឹង។

#១ ក្រូអាតគ្មានបញ្ហាជាមួយខ្សែការពារ៣របស់អាហ្សង់ទីន ការផ្លាស់ប្ដូរដ៏សំខាន់បំផុតរបស់គ្រូអាហ្សង់ទីនគឺការប្រើទម្រង់លេង ៣-៤-២-១ ដាក់ខ្សែការពារ៣រូបប៉ុណ្ណោះមាន Nicolas Otamendi នៅកណ្ដាល Gabriel Mercado និង Nicolas Tagliafico នៅសងខាង។ ប្រព័ន្ធលេងនេះគឺបើកឲ្យ Messi ងាយស្រួលនៅតំបន់ប្រយុទ្ធដោយសារមានការគាំទ្រច្រើនពីមិត្តរួមក្រុម ប៉ុន្តែផ្ទុយទៅវិញអាហ្សង់ទីនបែរជារងគ្រោះដោយសារខ្សែការពារតិចពេករបស់ខ្លួន ពិបាកនឹងរារាំងពេលក្រូអាតវាយសម្រុកមកម្ដងៗ។

#២ អាហ្សង់ទីនពិបាកសម្របខ្លួនជាមួយស្ទីលលេងរបស់ Sampaoli Sampaoli បានប្ដូរទម្រង់លេងរហូត២លើកត្រឹម២ប្រកួតនៅ World Cup រួមទាំងសមាសភាពកីឡាករមួយចំនួនផងធ្វើឲ្យក្រុមហាក់មិនស៊ីសង្វាក់គ្នា។ ទម្រង់ ៣-៤-២-១ គឺប្រើក្នុងគោលបំណងជួយអាហ្សង់ទីនមានប្រសិទ្ធិភាពក្នុងការប្រយុទ្ធតែវាបែរជាទូលាយពេកនៅខាងក្រោម។ វគ្គទីមួយ អាហ្សង់ទីនមាន ឱកាសស៊ុត២ជើង ប៉ុន្តែគ្មានបាល់ណាមួយចំទីឡើយ។

#៣ ការបង្កកំហុសរបស់អ្នកចាំទី ទោះជាមិនអាចស៊ុតបញ្ចូលទីគូប្រកួតតែអាហ្សង់ទីននៅមិនទាន់មានបញ្ហាទេដោយបញ្ចប់លទ្ធផល ស្មើគ្នានៅវគ្គទីមួយ។ យ៉ាងណាគ្រប់យ៉ាងបានប្រែប្រួលនៅពេលអ្នកចាំទី Willy Caballero បានទាត់បាល់មិនផុត Ante Rebic ធ្វើឲ្យខ្សែបម្រើរូបនេះទាត់មួយជើងបំប៉ោងសំណាញ់ទីបានសម្រេច។ ក្រោយត្រូវគេនាំមុខអាហ្សង់ទីនកាន់តែបែកទម្រង់លេងរហូតរបូតគ្រាប់ ទី២ និងទី៣នៅចុងម៉ោង។

#៤ អាហ្សង់ទីនប្រឈមមុខនឹងការធ្លាក់ត្រឹមវគ្គចែកពូល បរាជ័យយប់មិញធ្វើឲ្យអាហ្សង់ទីនស្ថិតក្នុងភាពស្រពិចស្រពិលក្នុងការឡើងទៅវគ្គ១៦ក្រុមចុងក្រោយដោយសារពួកគេមានត្រឹម១ពិន្ទុប៉ុណ្ណោះ។ បើនីហ្សេរីយ៉ា ស្មើឬក៏ឈ្នះអ៊ីស្លង់នៅយប់នេះគឺល្អសម្រាប់អាហ្សង់ទីន តែបើអ៊ីស្លង់ឈ្នះវិញ អាហ្សង់ទីនអាចមានបញ្ហា ដោយសារអ៊ីស្លង់បាន៤ពិន្ទុ។ នៅប្រកួតចុងក្រោយបើអ៊ីស្លង់យកត្រឹមស្មើក្រូអាតពួកគេទាំងពីរនឹងដឹកដៃគ្នាទៅវគ្គ១៦ក្រោយដោយសារអ៊ីស្លង់នឹងបាន៥ពិន្ទុ ធ្វើឲ្យអាហ្សង់ទីនទោះឈ្នះនីហ្សេរីយ៉ាក៏គ្មានន័យអ្វីដែរ៕