ភស្តុតាងបង្ហាញច្បាស់ចែស ក្រូអាត ចាប់បានក្បួនលេងអាហ្សង់ទីនទាំងអស់ បិទមុំជិតឈឹង

2018-06-22 03:09:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តបានមើលការប្រកួតយប់មិញ ពិតជាបានឃើញច្បាស់ថា ក្រូអាត មានទម្រង់លេងល្អ ចង្វាក់នៃការកាត់ចរន្តលេងរបស់អាហ្សង់ទីន កាន់តែមានប្រសិទ្ធភាពថែមទៀត។

ការដឹងរបៀបលេងរបស់អាហ្សង់ទីន និងការចេះចាប់កីឡាករសំខាន់ឬកីឡាករនាំលេងក្នុងក្រុម បានធ្វើឱ្យក្រូអាត ទទួលបានលទ្ធផលជោគជ័យ រហូតយកជ័យជម្នះលើក្រុមអាហ្សង់ទីនបានដល់ ៣-០ ឯណោះ។ តើអ្វីជាយុទ្ធសាស្ត្រក្រូអាត ប្រើ ដើម្បីយកឈ្នះយប់មិញនេះ?

បើតាមការបញ្ជាក់របស់កីឡាករ Luka Modric ដែលជាប្រធានក្រុមជម្រើសជាតិក្រូអាត បានបញ្ជាក់ថាសមាជិកក្រុមទាំងមូលបានយល់ច្បាស់ពីក្បួនលេងរបស់អាហ្សង់ទីន ដែលតែងតែពឹងទៅលើកីឡាករម្នាក់។ Lionel Messi ជាស្នូលក្នុងក្រុមជម្រើសជាតិអាហ្សង់ទីន ចាប់តាំងពីលោក Jorge Sampaoli ចូលដឹកនាំនិងមុននេះទៅទៀត ក្រុមនៅអាមេរិកឡាទីនមួយនេះ តែងតែយកខ្សែប្រយុទ្ធរូបនេះជាកម្លាំងសំខាន់ដើម្បីលេងនៅតំបន់ប្រយុទ្ធ។

កីឡាករដែលជាប់ជា Man of The Match ក្នុងប្រកួតយប់មិញ បាននិយាយច្បាស់ៗបន្ថែមទៀតថា៖ “លទ្ធផលយប់មិញ និងការលេងមិនល្អរបស់អាហ្សង់ទីន គឺមកពីក្រូអាតបានកាត់ផ្ដាច់ចង្វាក់លេងរបស់ Messi ។ គាត់ជាកីឡាករគ្រោះថ្នាក់និងអស្ចារ្យជាងគេ ប៉ុន្តែគាត់មិនអាចធ្វើអ្វីគ្រប់យ៉ាងតែម្នាក់ឯងបានឡើយ។ បាល់ទាត់ អ្នកត្រូវការជំនួស ហើយវាមិនអាចធ្វើតែម្នាក់ឯងបានទេ។ បិទ Messi ១ និងបិទ Mascherano មិនឱ្យបានបាល់លេងមួយទៀត នោះអាហ្សង់ទីននឹងគ្មានចង្វាក់លេងឡើយ”។

ជាក់ស្ដែងកាលពីយប់មិញនេះ គឺដូចអ្វីដែល Modric និយាយមែន។ Messi ប្រកួតជាមួយអ៊ីស្លង់មានបាល់អូសចូលតំបន់គ្រោះថ្នាក់៩ដង តែមកប៉ះក្រូអាតនេះ រូបគេមានអូសបានតែ២ដងប៉ុណ្ណោះ។ ខណៈដែលការបញ្ជូនបាល់ចូលតំបន់គ្រោះថ្នាក់វិញ ប្រកួតមុន Messi ធ្វើបានសម្រេចដល់៤៥ដង ប៉ុន្តែប្រកួតយប់មិញនេះ កាត់បន្ថយមកត្រឹម១០ដងប៉ុណ្ណោះ។

ដោយឡែកការដឹងក្បួនលេងរបស់អាហ្សង់ទីនមុននេះហើយ ទើបបានជាធ្វើឱ្យគ្រូបង្វឹកក្រូអាតលោក Zlatko Dalic បាននិយាយតាំងពីមុនប្រកួតម្ល៉េះថា ប៉ះអាហ្សង់ទីននេះ ជាប្រកួតងាយស្រួលជាងគេសម្រាប់ក្រុមរបស់លោក៕

អត្ថបទ៖ មុន្នីរម្យ