មានប្រវត្តិរស់តាមផ្លូវ កូនខ្មែ១រូប ប្រាប់គន្លឹះ មុនជាប់ទៅបណ្ឌិតសភា កងទ័ពអាមេរិក

2018-06-22 07:05:25
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនខ្មែរ១រូប មានសមត្ថភាពមិនធម្មតា បូករួមនឹងឆន្ទៈខ្ពស់ផង ទើបអាចជម្នះឧបសគ្គ រហូតទទួលជោគជ័យក្នុងការសិក្សា។ និស្សិតខ្មែររូបនេះ បានទទួលអាហារូបករណ៍ តាមរយៈស្ថានទូតអាមេរិក ប្រចាំព្រះរាជាណាចក្រកម្ពុជា។

ឆ្លៀតពេលសិក្សាដ៏រវល់ ប៉ុន្តែយុវជនរូបនេះ រីករាយចែករំលែកបទពិសោធន៍ និងលើកទឹកចិត្តនិស្សិតទូទៅ ពិសេសអ្នកក្រីក្រ មកកាន់ Sabay។

មានឈ្មោះ ពេជ្រ ចន្រ្ទា លោកជានិស្សិតអាហារូបករណ៍ ថ្នាក់បរិញ្ញាបត្រ នៅបណ្ឌិតសភាកងទ័ព ជើងទឹក The United States Naval Academy (USNA)។ ជាសាលាជាន់ខ្ពស់ មានវ័យចំណាស់ជាងគេទី២ និងមានឈ្មោះល្បី នៅសហរដ្ឋអាមេរិក USNA មានបណ្ដុះបណ្ដាល ជំនាញពិសេសដល់កងទ័ព សម្រាប់តែកម្រិតបរិញ្ញាបត្រតែប៉ុណ្ណោះ។

តាមសារអេឡិចត្រូនិក ពីសហរដ្ឋអាមេរិក និស្សិតខ្មែររូបនេះ បានប្រាប់ Sabay ថាបច្ចុប្បន្ននេះ លោកកំពុងស្នាក់នៅ និងសិក្សាក្នុងរដ្ឋ ម៉ារីឡែន។ លោក គឺជានិស្សិតខ្មែរទី៤ ដែលបានមកសិក្សានៅទីនេះ ព្រោះកន្លងទៅ ក៏ធ្លាប់មាននិស្សិតខ្មែរ ៣រូបផ្សេងទៀតដែរ។

លោកនឹងត្រូវសិក្សា ចាប់ពីឆ្នាំ២០១៨ ដល់ឆ្នាំ២០២២ ដោយចាប់ផ្ដើមពីការចូលរួមការវគ្គហ្វឹកហាត់ដ៏តឹងរ៉ឹង និងការបណ្ដុះបណ្ដាលជំនាញនានានៅទីនោះ ក្នុងរយៈពេល ៨សប្ដាហ៍ខាងមុខ។

រំលឹកពីប្រវត្តិជីវិតតស៊ូ

មុនមានថ្ងៃនេះ លោកពេជ្រ ចន្រ្ទា បានប្រាប់ Sabay ពីប្រវត្តិសំខាន់ៗថា លោកមានស្រុកកំណើត នៅខេត្តកំពង់ឆ្នាំង ក្នុងគ្រួសារក្រីក្រ។ មានម្ដាយជាកសិករ និងលោកឪពុកជាអតីតនាយទាហាន ធ្លាប់បានបញ្ចប់ការសិក្សាពីប្រទេសសូវៀត។ លោកជាអតីតនិស្សិតសាលាពេទ្យ ឬហៅថាសាលាក្រហម កាលពីឆ្នាំ២០១១។

២ចំណុច នៃការចងចាំក្នុងជីវិត ពេលរស់នៅតាមផ្លូវ

ក្នុងឆ្នាំ២០១១ ដែលត្រូវនឹងថ្ងៃទី១ នៃការចាប់ផ្ដើមសិក្សានៅសាលាពេទ្យ លោកថា និស្សិតដទៃក្រោយចេញពីរៀនគេទៅផ្ទះ និងកន្លែងត្រូវទៅ ខុសពីលោកគឺគ្មានផ្ទះ និងគោលដៅ។ លោកបានទៅស្នាក់នៅ និងដេកលើកៅអីថ្មសាធារណតាមផ្លូវ មូសខាំ ហាលខ្យល់ ហាលក្ដៅ គ្មានបាយទឹកត្រឹមត្រូវ ម្ដុំមាត់ទន្លេក្រុងភ្នំពេញ អស់រយៈពេលជាង ៣សប្តាហ៍។

ទោះធ្លាក់ខ្លួន វេទនាកម្រិតណា តែលោកតែងតែដាស់តឿន លើកទឹកចិត្តខ្លួនឯង ថាវាគ្មានអីពិបាកទេ ដែលនេះជាចំណែកបន្តឆន្ទៈមោះមុត និងជាការចងចាំល្អក្នុងជីវិត។

ទី១ លោកបានជួបជនជាតិបរទេសម្នាក់ ជាសមាជិកក្រុមកីឡាករបាល់ទាត់ព្រះខណ្ឌរាជ ដែលអាណិត និងបានឲ្យលោកស្នាក់នៅជាមួយជាង ១សប្តាហ៍។

ទី២ គឺនៅចុងសប្ដាហ៍ទី៣ លោកបានដើរតាមសួននាគបាញ់ទឹក ជិតវិមានឯករាជ្យ ដោយភាពស្រេកឃ្លាន ហេវហត់ លោកបានសម្រាកអង្គុយ នឹងរើសបានក្រដាសកាសែតខ្ចប់នំប៉័ង ដែលគេចោលតាមផ្លូវ។

រឿងភ្ញាក់ផ្អើល គឺលោកបានឃើញដំណឹងរើសអាហារូបករណ៍លើកាសែត ដែលសឹងតែរលុបទៅហើយ។ លោកបញ្ជាក់ដោយអួលដើម កថា ពេលនោះ ឆន្ទៈបានផ្ទុះឡើងខ្ពស់ បាត់អស់ភាពស្រេកឃ្លាន ហេវហត់ គឺដឹងតែម្យ៉ាងធ្វើយ៉ាងម៉េច យកអាហារូបករណ៍ ដែលបានស្រលាញ់ជាង១០ឆ្នាំ ទៅបណ្ឌិតសភាយោធាអាមេរិកឲ្យបាន។

ក្រោយមក លោកបានព្យាយាមទាក់ទង មិត្តភក្តិ និងសាច់ញាតិ អ្នកខេត្តកំពង់ឆ្នាំង ដែលមានចិត្តល្អ ទម្រាំបានជម្រកស្នាក់នៅ។

ពាក្យស្លោកប្រចាំជីវិត

ផ្លូវទៅកាន់ជ័យជម្នះ គ្មានដានជើងជនខ្ជិលច្រអូសឡើយ។

លើលោកយើងនេះ គ្មានពាក្យថាមិនអាចទេ។

ពាក្យស្លោកបានសរសេរនៅផ្ទះកម្សត់ នៅឯខេត្ត

សារចែករំលែក

រាល់ពេលជួបរឿងលំបាក សូមកុំគិតថាវាជាឧបសគ្គ សូមគិតថាវាមានបង្កប់ឱកាស និងអរគុណភាពក្រ និងប្រឹងប្រែងអស់ពីលទ្ធភាព។ មុនជោគជ័យជាប់អាហារូបករណ៍នេះ លោកក៏ធ្លាប់បរាជ័យធ្លាក់ម្ដងដែរ តែលោកនៅតែព្យាយាម និងប្រឹងបន្ថែមទើបអាចរកជ័យជម្នះឃើញ។

ចំណេះដឹងពីការដាក់អាហារូបករណ៍

លោក ពេជ្រ ចន្រ្ទា និស្សិតអាហារូបករណ៍ រៀននៅបណ្ឌិតសភាកងទ័ព ជើងទឹក សហរដ្ឋអាមេរិកបានប្រាប់ថា មានចំណុចសំខាន់ចង់ចែករំលែក។

១. តាមដានរាល់កម្មវិធីព័ត៌មានអាហារូបករណ៍របស់ស្ថានទូត

២. ចំណាយពេល និងត្រៀមខ្លួន ជិត១០ឆ្នាំ មុនបានជាប់អាហារូបករណ៍

មានដំបូន្មានល្អពីសាស្ត្រាចារ្យ លោកថា កាលរៀនវិទ្យាល័យ នៅថ្នាក់ទី១១ ធ្លាប់មានគ្រូបង្រៀន១រូប បានប្រាប់លោក ពីដំណឹងអាហារូបករណ៍នេះ ដែលជាហេតុផល១ ឲ្យលោកបានត្រៀមខ្លួនជាស្រេច លើជំនាញដែលខ្លួនស្រលាញ់។ ក្រៅពីនេះក៏មានការចូលរួមជួយផ្តល់យោបល់ និងទំនុកម្រុងគ្រប់បែបយ៉ាង ពីមិត្តភ័ក្ដិ និងសាស្រ្តាចារ្យជាច្រើន នៅថ្នាក់សកលវិទ្យាល័យ ពិសេស គឺសកលវិទ្យាល័យបញ្ញាសាស្រ្ត កម្ពុជា

៣. អានសៀវភៅពាក់ព័ន្ធ ដូចបទពិសោធន៍របស់លោក បានអានសៀវភៅ១ ស្តីពីសង្គ្រាមលោកលើកទី២ តាំងពីមុនបានជាប់អាហារូបករណ៍

ដើមឈើ លោក ពេជ្រ ចន្រ្ទា តែងអង្គុយអានសៀវភៅ នៅស្រុកកំណើត

៤.ត្រូវមានពិន្ទុគណិតវិទ្យាល្អ (SAT) Scholastic Aptitude Test

៥. ត្រូវប្រលងយក TOEFLសម្រាប់ផ្នែកភាសាអង់គ្លេស

៦. ត្រៀមខ្លួនសម្រាប់ការតេស្តកាយសម្បទា (CFA)

ទិសដៅអនាគត

ក្រោយរៀនចប់ពីសហរដ្ឋអាមេរិក លោកនឹងវិលមកប្រទេសកម្ពុជា ដើម្បីបំពេញការងារជួយសង្គម។ លោក ពេជ្រ ចន្រ្ទា បញ្ជាក់ថា បន្ថែមពីចិត្តស្រលាញ់ និងឆន្ទៈលើជំនាញនេះ លោកក៏ចង់បន្តឆន្ទៈរបស់លោកឪពុកដែលជានាយទាហានស្រាប់ និងធ្លាប់បានបម្រើជាតិ។