សហព័ន្ធបាល់ទាត់អេហ្ស៊ីបបកស្រាយជុំវិញរឿង Salah ចេញពី World Cup មុនពេលកំណត់
- 2018-06-22 11:53:35
- ចំនួនមតិ 0 | ចំនួនចែករំលែក 0
សហព័ន្ធបាល់ទាត់អេហ្ស៊ីបបកស្រាយជុំវិញរឿង Salah ចេញពី World Cup មុនពេលកំណត់
ចន្លោះមិនឃើញ
ប្រធានសហព័ន្ធបាល់ទាត់អេហ្ស៊ីបក្នុងថ្ងៃនេះ បានចេញមុខទាត់ចោល ពាក្យចចាមអារ៉ាមដែលថា Mohamed Salah នឹងចាកចេញពី World Cup មុនពេលកំណត់ ដោយមិននៅជួយក្រុមជម្រើសជាតិ ក្នុងប្រកួតប៉ះជាមួយអារ៉ាប៊ីសាអ៊ូឌីតឡើយ។
ក្រោយពីបានចាញ់អ៊ុយរុយហ្គាយ ១-០ និង រុស្ស៊ី ៣-១ អេហ្ស៊ីបត្រូវបានគេដឹងយ៉ាងច្បាស់គឺស្ថិតក្នុងចំណោមក្រុមដែលនឹងត្រូវហាលអាវក្នុង World Cup លើកនេះ។ ការចាញ់ ២ ប្រកួតដំបូងនេះ ត្រូវបានសារព័ត៌មានជាច្រើនចុះផ្សាយថា ធ្វើឲ្យកីឡាករបង្គោលប្រចាំក្រុម Salah មិនសប្បាយចិត្តនឹងក្រុមជម្រើសជាតិ ហើយត្រៀមចាកចេញពីកម្មវិធី World Cup មុនកាលកំណត់ ដោយមិននៅជួយក្រុមក្នុងប្រកួតបង្គ្រប់កិច្ចប៉ះអារ៉ាប៊ីសាអ៊ូឌីតឡើយ។
យ៉ាងនេះក្ដី ក្នុងថ្ងៃនេះ លោក Hany Abo Rida ប្រធានសហព័ន្ធបាល់ទាត់អេហ្ស៊ីបបានចេញមុខបដិសេធពាក្យចចាមអារ៉ាម និងរបាយការណ៍ទាំងអស់នេះ។ លោកថា Salah កំពុង "សប្បាយរីករាយ" ជាមួយមិត្តរួមក្រុមខ្លួន ហើយគ្មានចេតនាចាកចេញពី World Cup មុនគេមុនឯងនោះឡើយ។
លោក Abo Rida និយាយ៖ "ប្រធានក្រុមជម្រើសជាតិយើង Mohamed Salah នឹងបន្តនៅជាមួយក្រុមជម្រើសជាតិរហូតដល់ចប់ចុងចប់ដើម។ ច្បាប់ FIFA បានចែងដូច្នេះ។ ពេលនេះគេកំពុងតែសប្បាយរីករាយជាមួយមិត្តរួមក្រុមរបស់គេ ហើយគេមានការភ្ញាក់ផ្អើលយ៉ាងខ្លាំង ពេលដែលគេឃើញពីអ្វីដែលប្រព័ន្ធផ្សព្វផ្សាយបានសរសេរ។ Salah បដិសេធទាំងស្រុងនូវពាក្យចចាមអារ៉ាមទាំងអស់នេះ"។
សូមបញ្ជាក់ផងដែរថា Salah បានបង្ហាញទម្រង់លេងបានយ៉ាងល្អ ក្នុងរដូវកាល ២០១៧/១៨ ឲ្យ Liverpool ដោយស៊ុតចូលជាង ៤០ គ្រាប់ និងបញ្ជូនឲ្យមិត្តរួមក្រុមស៊ុតបានជិត ២០ គ្រាប់។ កីឡាករក៏បានរួមចំណែកយ៉ាងសំខាន់ក្នុងការជួយឲ្យអេហ្ស៊ីបឡើងលេង World Cup ជាលើកដំបូងក្នុងរយៈពេល ២៨ ឆ្នាំ។
យ៉ាងនេះក្ដី កាលពីប្រកួតវគ្គផ្ដាច់ព្រ័ត្រ Champions League ប៉ះជាមួយ Real Madrid កាលពីចុងខែឧសភាកន្លងទៅ កីឡាករបានរងរបួសស្មាធ្ងន់ធ្ងរ។
ដំណើរព្យាបាលរបួសបានប្រព្រឹត្តទៅបានយ៉ាងល្អ ហើយកីឡាករត្រូវបានសហព័ន្ធបាល់ទាត់អេហ្ស៊ីបប្រកាសថានឹងមានវត្តមានជួយក្រុមជម្រើសជាតិក្នុង World Cup លើកនេះ។ យ៉ាងនេះក្ដី ក្នុងប្រកួតជុំទីមួយប៉ះអ៊ុយរុយហ្គាយ កីឡាករបានត្រឹមអង្គុយលើបង់។ នៅប្រកួតជុំទីពីរជួបរុស្ស៊ី ខ្សែស្លាបបានស៊ុតចូលចំនួន ១ គ្រាប់ តែនៅមិនគ្រប់គ្រាន់ក្នុងការជួយអេហ្ស៊ីបឲ្យបន្តលេងដល់វគ្គបន្ទាប់ ដោយក្រុមម្ចាស់ផ្ទះបានយកឈ្នះក្នុងលទ្ធផល ៣ ទល់នឹង ១។
អេហ្ស៊ីប នឹងត្រូវប្រកួតបង្គ្រប់កិច្ចជាមួយអារ៉ាប៊ីសាអ៊ូឌីត នៅថ្ងៃចន្ទខាងមុខ វេលាម៉ោង ៩ យប់ (ម៉ោងនៅកម្ពុជា)៕