រយៈពេល ៣៧ ឆ្នាំ ទើបស្ត្រីជនជាតិអ៊ីរ៉ង់ មានឱកាសមើលបាល់ទាត់ជាលើកដំបូង
- 2018-06-23 10:22:16
- ចំនួនមតិ 0 | ចំនួនចែករំលែក 0
រយៈពេល ៣៧ ឆ្នាំ ទើបស្ត្រីជនជាតិអ៊ីរ៉ង់ មានឱកាសមើលបាល់ទាត់ជាលើកដំបូង
ចន្លោះមិនឃើញ
ស្ត្រីជនជាតិអ៊ីរ៉ង់ នឹងអាចទស្សនាការប្រកួតបាល់ទាត់ជាលើកដំបូងក្នុងរយៈពេល៣៧ឆ្នាំ នៅពេលដែលក្រុមជម្រើសជាតិរបស់ពួកគេ ត្រូវប្រកួតទល់នឹងអេស្ប៉ាញក្នុងវគ្គសន្សំពិន្ទុនាព្រឹត្តិការណ៍ World Cup នៅប្រទេសរុស្ស៊ី។
ត្បិតអ៊ីរ៉ង់ចាញ់អេស្ប៉ាញ ១-០ ប៉ុន្តែជាជ័យជម្នះដ៏ធំសម្រាប់ស្ត្រីអ៊ីរ៉ង់ ពីព្រោះជាលើកដំបូងដែលប្រទេសកាន់សាសនាមូស្លីមមួយនេះអនុញ្ញាតឲ្យមនុស្សស្រី បានចូលកីឡដ្ឋានមើលការប្រកួតបាល់ទាត់ក្នុងរយៈពេល៣៧ឆ្នាំចុងក្រោយ។
កន្លងមក តាមច្បាប់អ៊ីរ៉ង់ ស្ត្រីអាចប្រឈមនឹងការចាប់ខ្លួន ពិន័យជាប្រាក់ ឬ ដាក់ពន្ធនាគារ ប្រសិនបើរកឃើញថាពួកគេហ៊ានល្មើសបម្រាមចូលទៅមើលការប្រកួតដោយផ្ទាល់ នូវប្រភេទកីឡានានាផ្នែកបុរស។
ទិដ្ឋភាពពីកីឡដ្ឋាននៅប្រទេសរុស្ស៊ី បង្ហាញថាស្ត្រីជនជាតិអ៊ីរ៉ង់រីករាយនឹងសិទ្ធិសេរីភាពតាមរយៈការថត selfie ការលើកបង្ហាញទង់ជាតិអ៊ីរ៉ង់ និង ផ្លុំត្រែជាសំលេងដើម្បីអបអរដល់ក្រុមជម្រើសជាតិរបស់ខ្លួនជាដើម។
យោងតាម SBS News ក្រុមប្រឹក្សាក្រុងតេអេរ៉ង់ បានសម្រេចអនុម័តច្បាប់អនុញ្ញាតឲ្យស្រ្តីអាចចូលមើលការប្រកួតកីឡានៅកីឡដ្ឋាន Azadi និង Takhti ស្ថិតនៅទីក្រុងតេអេរ៉ង់ និង ក្រុង Mashhad ។
កាលពីឆ្នាំ ២០០៦ ភាពយន្តដែលមានចំណងជើងថា Offside របស់អ្នកនិពន្ធ សាហ្វា ប៉ាណាហ៊ី (Jafar Panahi) បង្ហាញថាអ្នកគាំទ្រជាស្រ្តីមួយក្រុមបានព្យាយាមសម្រុកចូលទៅក្នុងកីឡាដ្ឋានជាតិនាទីក្រុងតេអេរ៉ង់ ដើម្បីមើលការប្រកួតកីឡាបាល់ទាត់ បើទោះជាទង្វើនេះល្មើសនឹងច្បាប់ក្តី។
ខ្សែភាពយន្តនេះបានក្លាយទៅជាការពិតនៅ១២ឆ្នាំក្រោយ គឺនៅពេលនេះឯងដែលស្ត្រីជនជាតិអ៊ីរ៉ង់អាចទស្សនាកីឡាដោយផ្ទាល់ និង ស្របច្បាប់៕