ពីមុនចង់បានប្រពន្ធគេរក ស ស្អាត ឆ្លាត មាន តែប្រុសសម័យឥឡូវគេមើល៦ចំណុច
- 2018-06-23 03:09:48
- ចំនួនមតិ 0 | ចំនួនចែករំលែក 0
ពីមុនចង់បានប្រពន្ធគេរក ស ស្អាត ឆ្លាត មាន តែប្រុសសម័យឥឡូវគេមើល៦ចំណុច
ចន្លោះមិនឃើញ
បុរសគ្រប់រូប តែងប្រាថ្នាចង់បាននារីដ៏ល្អម្នាក់ មករួមរស់កសាងគ្រួសារមួយដ៏មានសុភមង្គល។ នារីល្អ សក្ដិសម ពេលខ្លះមិនសំដៅតែលើរូបឆោមលោមពណ៌នោះទេ តែមានចំណុចជាច្រើនដែលមានតម្លៃជាងរូបសម្រស់ទៀត។ បើថ្ងៃណាមួយបានជួបនារី ដែលមានចរិតលក្ខណៈ៦យ៉ាងនេះ សូមកុំបណ្ដោយឲ្យនាងរបូតពីដៃឲ្យសោះ ព្រោះនាងជានារីដ៏ពិសេសកម្រមានណាស់។
១. មិនងាយនឹងស្រលាញ់អ្នកណាផ្ដេសផ្ដាស
ខុសពីយុវតីបច្ចុប្បន្នដែលងាយនឹង crush លើគេ ដោយមិនគិតច្រើនឲ្យតែឃើញសង្ហា មានលុយច្រើន។ តែចំពោះនារីប្រភេទនេះវិញ មុននាងដាក់ចិត្តស្រលាញ់នរណាម្នាក់ គឺនាងប្រុងប្រយ័ត្នបំផុត ព្រោះនាងមិនមែនគិតត្រឹមតែ១ឆាវ គឺគិតដល់អនាគត។ ដូច្នេះហើយទើបនារីបែបនេះ មិនងាយនឹងមានសង្សារ តែបើនាងមានហើយ បុរសម្នាក់នោះ គឺជាមនុស្សដែលសក្ដិសមនឹងនាង អាចមើលខុសត្រូវនាង ច្បាស់លាស់នឹងនាង ហើយកាន់ដៃនាងចូលរោងការ។
**២. នាងមានគោលដៅ និងផ្លូវដើររបស់នាងច្បាស់លាស់**
នាងជាមនុស្សម្នាក់ដែលតែងបារម្ភពីរឿងអនាគត ឯករាជ្យលើខ្លួនឯង មិនចង់ពឹងពាក់លើមនុស្សប្រុសទាំងស្រុង។ ដូច្នេះហើយ ទើបនាងតែងចាប់អ្វីជាសំខាន់ដើម្បីរកអនាគតដ៏ល្អសម្រាប់ខ្លួនឯង ហើយបានកំណត់គោលដៅច្បាស់លាស់ មិនថាតែការសិក្សា ឬការងារនោះទេ។ នាងតែងបង្ហាញភាពក្លៀវក្លា រឹងមាំ ជឿជាក់លើខ្លួនឯងជានិច្ច។ ប្រសិនបើបុរសណាបាននារីប្រភេទនេះ ជាប្រពន្ធ គឺសំណាងបំផុត ព្រោះក្រោយរៀបការថ្ងៃ នាងគឺជាចំណែកដ៏សំខាន់ ដើម្បីអភិវឌ្ឍគ្រួសារឲ្យរីកចម្រើន។
៣. ជាមនុស្សមានហេតុផលមិនធ្វើអ្វីតាមតែចិត្ត
ប្រសិនបើនាងមានស្នេហា គឺជាស្នេហាបែបចាស់ទុំ មិនមែនថ្ងៃនេះស្រលាញ់ ថ្ងៃស្អែកស្អប់ឡើយ។ ខុសពីយុវតីមួយចំនួន ដែលតែងងរង៉ក់ដូចកូនក្មេង ប្រចណ្ឌរករឿងគ្មានហេតុផល តែចំពោះនាងវិញ ប្រសិនបើមិនសប្បាយចិត្ត ឬសង្ស័យអ្វីមួយ គឺនាងតែងនិយាយត្រង់ទៅត្រង់មក ដើម្បីឲ្យច្បាស់តែម្ដង។ បុរសណាដែលមានសង្សារបែបនេះ គឺមិនសូវពិបាកលួងច្រើនឡើយ តែផ្ទុយមកវិញវត្តមាននាងគឺតែងធ្វើឲ្យបុរសដែលនាងស្រលាញ់មានភាពកក់ក្ដៅ និងមានកម្លាំងចិត្តជានិច្ច។
៤. នាងដឹងពីក្បួនចាយលុយ និងការសន្សំ
មិនមែនជានារីដែលចូលចិត្តសម្ភារៈនិយមហួសហេតុ មិនចេះតែចាយបង្ហូរដូចទឹកឡើយ។ នាងជាមនុស្សចេះទុកដាក់លុយកាក់បានល្អ ចេះបែងចែកលុយដែលរកបានប្រើការលើអ្វីដែលសំខាន់ មានលុយសម្រាប់ចាយវាយប្រចាំថ្ងៃ និងមានលុយទុកសន្សំទៀតផង។ នាងមិនមែនជាមនុស្សគម្រិះ តែនាងជាមនុស្សដែលផ្ដល់តម្លៃដល់លុយដែលរកបាន។ មនុស្សប្រុសបាននារីបែបនេះជាភរិយា នាំតែភាពរីកចម្រើនដល់គ្រួសារ សល់លុយកាក់ ទ្រព្យសម្បត្តិ មាសប្រាក់ គ្រួសាររុងរឿង។
៥. មិនមែនទុកវេលាចោលអង្គុយតែខូចចិត្តរឿងស្នេហា
ស្នេហាជាចំណែកសំខាន់ក្នុងជីវិត រហូតធ្វើឲ្យមនុស្សខ្លះត្រូវយកជីវិតរបស់ខ្លួន មកញាំញីតែជាមួយស្នេហា ខូចចិត្ត ស្រក់ទឹកភ្នែក រហូតលែងចង់ធ្វើអ្វី។ ដោយឡែកចំពោះនារីប្រភេទនេះវិញ នាងមិនចាត់ទុកស្នេហាជាចំណែកសំខាន់រហូតធ្វើឲ្យនាងចំណាយពេលវេលាខ្ជះខ្ជាយជាមួយនោះទេ។ នាងមិនផ្ដោតតែលើរឿងតម្រូវការបេះដូងឡើយ នាងមានកាតព្វកិច្ចជាច្រើនដែលត្រូវធ្វើជាប្រចាំ ដែលនាំឲ្យជីវិតនាងរីកចម្រើនជាលំដាប់។ បើនាងមានស្នេហាគេក៏មិនចេះហួងហែងខ្លាំងដែរ បើនាងសម្រេចចិត្តស្រលាញ់នរណាម្នាក់ គឺម្នាក់នោះត្រូវតែទទួលស្គាល់នាងជានាង ជានារីម្នាក់ដែលគិតរឿងអនាគត និងអ្វីៗដែលសំខាន់ជាងរឿងស្នេហា។
៦. នាងអាចមើលការខុសត្រូវខ្លួនឯងបាន
នៅត្រង់ចំណុចនេះ គឺមានន័យថា នាងជាមនុស្សដែលឯករាជ្យ ជឿជាក់លើខ្លួនឯង ជឿលើទង្វើដែលនាងធ្វើ មិនចាំបាច់ឲ្យឪពុកម្ដាយព្រួយបារម្ភខ្វល់ពីនាងច្រើនឡើយ។ ជាមនុស្សម្នាក់ដែលមានការគិតស៊ីជម្រៅ ចេះសម្រេចចិត្តដោយមានសុភវិនិច្ឆ័យច្បាស់លាស់។ នាងមិនដែលធ្វើឲ្យគ្រួសារអស់សង្ឃឹមឡើយ តែនាងតែងនាំរឿងល្អៗដល់គ្រួសារ។ ចំណែកមនុស្សប្រុសវិញ បើមានភរិយាចរិតលក្ខណៈដូចនាង គឺចាត់ទុកថាសំណាងបំផុតក្នុងជីវិត នាងនឹងក្លាយជាអ្នកដឹកនាំគ្រួសារ ដ៏សំខាន់ជាមួយអ្នក ក្លាយជានារីប្រឹក្សាសម្រាប់អ្នកដ៏ល្អ អាចនិយាយបានថានាងគឺជាឧត្ដមភរិយាសម្រាប់អ្នក៕