ក្រោយឈ្មោះត្រូវចារជាប្រវត្តិសាស្ត្រ ឥឡូវបែកធ្លាយរឿង Kane និងមិត្តស្រី តាំងពីតូចក្រូចឆ្មារ!!!
- 2018-06-25 11:05:00
- ចំនួនមតិ 0 | ចំនួនចែករំលែក 0
ក្រោយឈ្មោះត្រូវចារជាប្រវត្តិសាស្ត្រ ឥឡូវបែកធ្លាយរឿង Kane និងមិត្តស្រី តាំងពីតូចក្រូចឆ្មារ!!!
ចន្លោះមិនឃើញ
ប្រវត្តិស្នេហាខ្សែប្រយុទ្ធ Harry Kane មានស្ថានភាពមិនខុសពីអាជីពបាល់ទាត់បច្ចុប្បន្នរបស់កីឡាករប៉ុន្មានទេ គឺមានភាពជោគជ័យគួរឲ្យកត់សម្គាល់។ កីឡាករមានមិត្តស្រីដែលស្គាល់រាប់អានគ្នាតាំងពីតូច រហូតឈានដល់បង្កាត់ភ្លើងស្នេហ៍នារយៈពេល ៦ ឆ្នាំចុងក្រោយនេះ។
ខ្សែប្រយុទ្ធ Kane មានមិត្តស្រីឈ្មោះ Kate Goodwin។ អ្នកទាំងពីរបានស្គាល់គ្នា កាលពីរៀនបឋមសិក្សាជាមួយគ្នា ហើយក៏ចាប់ផ្ដើមនិយាយ រាប់អានគ្នាពីពេលនោះមក។ អាជីពបាល់ទាត់របស់ Kane វិវត្តន៍យ៉ាងម៉េច ហើយឆ្លងកាត់អ្វីខ្លះ នាង Goodwin ដឹងទាំងអស់។
ទាក់ទងរឿងនេះ ក្នុងបទសម្ភាសន៍ជាមួយ The Sun កាលពីពេលកន្លងទៅ កីឡាករ Kane បាននិយាយ៖ "នៅពេលខ្ញុំនៅរៀននៅឡើយ ពួកយើងគឺជាមិត្តភក្ដិនឹងគ្នា។ ពួកយើងតែងនិយាយរកគ្នាជានិច្ច ហើយក៏មានទំនាក់ទំនងគ្នាកាន់តែជិតទៅៗ។ ទំនាក់ទំនងស្នេហាចាប់ផ្ដើមពីពេលនោះហើយ"។
ខ្សែប្រយុទ្ធបានបន្ត៖ "នាងគឺជាមនុស្សដែលមើលឃើញទាំងអស់ អំពីអាជីពបាល់ទាត់របស់ខ្ញុំ។"
បើទោះស្គាល់គ្នាតាំងពីតូចៗក្ដី អ្នកទាំងពីរទើបប្រកាសទាក់ទងគ្នាជាផ្លូវការកាលពីឆ្នាំ ២០១២ ប៉ុណ្ណោះ។ គិតមកទល់ពេលនេះ គឺមានរយៈពេល ៦ ឆ្នាំហើយ ដែលអ្នកទាំងពីរបានបង្កាត់ភ្លើងស្នេហ៍។ បច្ចុប្បន្នគូស្នេហ៍ទាំងពីរមានកូនស្រីមួយឈ្មោះ Ivy មានអាយុ ១ ខួប ខណៈម្នាក់ទៀតកំពុងស្ថិតនៅក្នុងផ្ទៃ។
Kane ចាប់ចូលហាត់បាល់នៅឆ្នាំ ១៩៩៩ ជាមួយក្លឹប Ridgeway Rovers មុនទៅចូលទៅហាត់នៅឈុតយុវជន Arsenal នាឆ្នាំ ២០០១។ ហាត់នៅក្លឹបកាំភ្លើងធំបានមួយឆ្នាំ ឈ្មោះរបស់កីឡាករត្រូវបានកាត់ចោល។ បន្ទាប់មក Kane ក៏បានត្រលប់ទៅចូលហាត់នៅក្លឹបចាស់ Ridgeway Rovers រហូតដល់ឆ្នាំ ២០០៤។ ក្រោយមក កីឡាករក៏ដូរទៅហាត់នៅក្លឹប Watford មុនពេលទៅ Tottenham Hotspur ។ កីឡាករបានដំឡើងពីឈុតយុវជន ទៅឈុតធំរបស់ក្លឹបនៅឆ្នាំ ២០០៩ ហើយបន្តលេងក្នុងនាមជាកីឡាកររបស់ក្លឹបដល់ពេលបច្ចុប្បន្ន។
ខ្សែប្រយុទ្ធ Kane ចាប់ផ្ដើមលេចធ្លោនៅ Spurs កាលពីរដូវកាល ២០១៤/១៥ ដោយកីឡាករបានស៊ុតចូលសរុបដល់ទៅ ៣១ គ្រាប់ ក្នុងការបង្ហាញខ្លួន ៥១ លើក។ តាំងពីពេលនោះមក កីឡាករអង់គ្លេសបានក្លាយជាកីឡាករបង្គោលប្រចាំក្លឹប។ គិតមកទល់ពេលនេះ ខ្សែប្រយុទ្ធវ័យ ២៤ ឆ្នាំ Kane ស៊ុតចូល ១៤០ គ្រាប់ ក្នុង ២១៣ប្រកួតលេងឲ្យក្លឹប។
កាលពីដើមខែនេះ កីឡាករទើបតែចុះកុងត្រាថ្មីជាមួយក្លឹប ដែលមានសុពលភាពរហូតដល់ឆ្នាំ ២០២៤។ ខ្សែប្រយុទ្ធត្រូវបានរាយការណ៍ថា មានប្រាក់នឿយហត់ប្រមាណ ២ សែនផោន (ជាង ២៦ ម៉ឺនដុល្លារសហរដ្ឋអាមេរិក) ក្នុងមួយសប្ដាហ៍៕