ចប់ប្រកួតទីពីរ World Cup មកដឹងលទ្ធភាពឡើងវគ្គបន្តរបស់ក្រុមទាំង៨ពូល
- 2018-06-25 02:12:56
- ចំនួនមតិ 0 | ចំនួនចែករំលែក 0
ចប់ប្រកួតទីពីរ World Cup មកដឹងលទ្ធភាពឡើងវគ្គបន្តរបស់ក្រុមទាំង៨ពូល
ចន្លោះមិនឃើញ
ការប្រកួត World Cup បានបញ្ចប់ប្រកួតទីពីរនៅតាមពូលនីមួយៗត្រឹមយប់មិញនេះ បន្ទាប់ពីការប្រកួតពូល H លេងបិទវគ្គក្រោយគេ។ មិនឲ្យខាតពេលច្រើនការប្រកួតទីបី ឬប្រកួតចុងក្រោយនឹងបន្តនៅយប់នេះ ពោលគឺមិនសម្រាកនោះឡើយ។
ប្រកួតលើកទី៣តាមពូលខ្លះគ្រាន់ជាប្រកួតបង្គ្រប់កិច្ចប៉ុណ្ណោះដោយសាររកឃើញក្រុម២ឡើងរួចហើយ ដោយឡែកនៅពូលខ្លះវិញគឺជាប្រកួតដ៏សំខាន់ដើម្បីកាត់សេចក្ដីដឹងថាក្រុមណាឡើងទៅវគ្គ១៦ក្រុមចុងក្រោយ។
ពូល A
ម្ចាស់ផ្ទះរុស្ស៊ីបានកក់កៅអីវគ្គ១៦ក្រុមរួចស្រេច ហើយនឹងបញ្ចប់ពូលនៅចំណាត់ថ្នាក់លេខ១បើសិនស្មើឬឈ្នះអ៊ុយរ៉ាហ្គាយ។
អ៊ុយរ៉ាហ្គាយក៏បានកក់កៅអីវគ្គ១៦ក្រុមដែរ ហើយនឹងបញ្ចប់ពូលលេខ១បើអាចឈ្នះរុស្ស៊ី។
អេហ្ស៊ីប និងអារ៉ាប៊ី សាអូឌីតគ្មានឱកាសឡើងទេ តែបើនរណាឈ្នះរវាងគូនេះនឹងឈរលេខ៣ក្នុងពូល។
ពូល B
អេស្ប៉ាញនឹងឡើងទៅវគ្គបន្តហើយឈ្នះ ស្មើ ម៉ារ៉ុក តែបើចាញ់វិញគឺមិនឲ្យលើសពី១គ្រាប់ ត្រូវពឹងលើអ៊ីរ៉ង់យកឈ្នះលើព័រទុយហ្គាល់ចាប់ពី១គ្រាប់ឡើង។
ព័រទុយហ្គាល់ ត្រូវការឈ្នះ ឬយ៉ាងហោចណាស់ស្មើទល់នឹងអ៊ីរ៉ង់ដើម្បីឡើងទៅវគ្គបន្ត តែអ៊ីរ៉ង់វិញទាមទារជ័យជម្នះដាច់ខាតលើព័រទុយហ្គាល់ដើម្បីឡើង។
ម៉ារ៉ុក ទោះបីលទ្ធផលទល់នឹងអេស្ប៉ាញយ៉ាងណាក៏មិនអាចឡើងដែរ ព្រោះពួកគេអស់ឱកាសទៅហើយ។
ពូល C
បារាំងបានកក់កៅអីរួចហើយ និងត្រូវការត្រឹមស្មើប៉ុណ្ណោះទល់ដាណឺម៉ាកដើម្បីឈរកំពូលតារាង។
ដាណឺម៉ាក ត្រូវការយ៉ាងហោចណាស់ស្មើដើម្បីឡើងវគ្គបន្ត ឬបើចាញ់បារាំងពួកគេនឹងឡើងដូចគ្នាបើអូស្ត្រាលីមិនអាចយកឈ្នះប៉េរូបាន។
អូស្ត្រាលីនឹងឡើងវគ្គ១៦ក្រុមដរាបណា ពួកគេឈ្នះប៉េរូ ហើយបារាំងឈ្នះដាណាម៉ាក។
ប៉េរូ ធ្លាក់ក៏ពិតមែនប៉ុន្តែនឹងបានលេខ៣ក្នុងពូលបើអាចយកឈ្នះអូស្ត្រាលី។
ពូល D
ក្រូអាតឡើងវគ្គវគ្គ១៦ក្រុមហើយ ហើយត្រូវការឈ្នះ ស្មើ ឬក៏ចាញ់តិចគ្រាប់ដើម្បីឈរលេខ១ក្នុងពូល។
នីហ្សេរីយ៉ា ត្រូវការឈ្នះ ឬត្រឹមស្មើអាហ្សង់ទីនដើម្បីឡើង។
អ៊ីស្លង់នឹងឡើងបើអាចយកឈ្នះក្រូអាត ហើយអាហ្សង់ទីនយកឈ្នះនីហ្សេរីយ៉ាដោយមានគ្រាប់សំណល់តិចជាងពួកគេ។
អាហ្សង់ទីន នឹងឡើងបើអាចយកឈ្នះនីហ្សេរីយ៉ា ហើយអ៊ីស្លង់ចាញ់ ឬស្មើក្រូអាត។
ពូលE
ប្រេស៊ីលឡើងបើពួកគេស្មើឬឈ្នះស៊ែប។
ស្វីស នឹងឡើងបើស្មើឬឈ្នះកូស្តារីកា ឬក៏ស៊ែបមិនអាចយកឈ្នះប្រេស៊ីលបាន។
ស៊ែបនឹងឡើងបើពួកគេឈ្នះ ឬស្មើប្រេស៊ីល ហើយកូស្តារីកាយកឈ្នះស្វីស។
កូស្តារីកា ធ្លាក់ហើយតែនឹងបានលេខ៣បើអាចយកឈ្នះស្វីស ហើយប្រេស៊ីលឈ្នះស៊ែប។
ពូល F
ម៉ិកស៊ិកនឹងឡើង ហើយឈរកំពូលតារាងបើគេចផុតពីការចាញ់ស៊ុយអែត។
អាល្លឺម៉ង់នឹងឡើងបើអាចយកឈ្នះកូរ៉េខាងត្បូង ឬបើស្មើត្រូវពឹងលើម៉ិកស៊ិកយកឈ្នះស៊ុយអែត។
ស៊ុយអែតនឹងឡើងបើឈ្នះម៉ិកស៊ិក ហើយបើស្មើត្រូវពឹងលើកូរ៉េយកឈ្នះម៉ិកស៊ិក។
កូរ៉េ នឹងឡើងបើពួកគេយកឈ្នះអាល្លឺម៉ង់ ហើយម៉ិកស៊ិកយកឈ្នះស៊ុយអែត។
ពូល G អង់គ្លេស កក់កៅអីវគ្គ១៦ក្រុម ហើយនឹងឈរលេខ១បើឈ្នះបែលហ្សិក។
បែលហ្សិក ក៏កក់កៅអីដូចគ្នា ហើយនឹងឈរលេខ១បើឈ្នះអង់គ្លេស។
ទុយនីស៊ី និងប៉ាណាម៉ាធ្លាក់ដូចគ្នា តែមួយគូនេះនរណាឈ្នះនឹងឈរលេខ៣ក្នុងពូល។
ពូលH
ជប៉ុននឹងឡើងបើឈ្នះឬស្មើប៉ូឡូញ បើចាញ់ត្រូវចាញ់តិចគ្រាប់ហើយពឹងលើកូឡុំប៊ីយកឈ្នះសេណេហ្គាល់ច្រើនគ្រាប់។
រវាងកូឡុំប៊ី និងសេណេហ្គាល់នរណាឈ្នះនឹងឡើងវគ្គ១៦ក្រុម។
ប៉ូឡូញអស់ឱកាសហើយ តែនឹងឈរលេខ៣បើអាចឈ្នះជប៉ុន ហើយសេណេហ្គាល់ឈ្នះកូឡុំប៊ីច្រើនគ្រាប់៕