គ្រូបឹងកេតនិយាយអ្វីខ្លះ ក្រោយក្រុមយកឈ្នះលើណាហ្គាយប់មិញនេះ?

2018-06-25 02:38:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបឹងកេត បានឡើងឈរកំពូលតារាងលីគកម្ពុជាហើយ បន្ទាប់ពីយកឈ្នះលើក្រុមណាហ្គាវើលក្នុងលទ្ធផល ៣-២ នាការប្រកួតកាលពីម្សិលមិញនេះ។

ការប្រកួតរវាងក្រុមទាំងពីរពិតជាស្វិតស្វាញ ដោយក្រុមបឹងកេតបាននាំមុខមុនដោយការទាត់យ៉ាងស្អាតពី ម៉ាត់ យ៉ាមីន ត្រឹមនាទី១៥ ដើមតង់ទី១។ យ៉ាងណាមិញ ការនាំមុខនោះ បានធ្វើឱ្យណាហ្គាវើលវាយសម្រុកវិញ រហូតរកគ្រាប់បាល់បានស្មើត្រឹមនាទី២៧ ដោយកីឡាករ គួច សុគុម្ភៈ។ ក្រោយពីចប់តង់ទី១ រក្សាលទ្ធផលស្មើគ្នា ឈានដល់តង់ទី២ ក្រុមទាំងសងខាងពិតជាមិនចង់រក្សាលទ្ធផលស្មើឡើយ។ បឹងកេត តែងតែវាយសម្រុកដើម្បីស្វែងរកគ្រាប់បាល់ជ័យជម្នះឡើងឈរកំពូលតារាងវិញ រហូតដល់នាទី៧៧ កីឡាករ Paul Omogba រកបានគ្រាប់បាល់នាំមុខជាថ្មីលើក្រុមណាហ្គាវើល។

ការនាំមុខនេះក៏មិនទាន់ឈ្នះលើណាហ្គាដែរ ស្របដែលត្រឹម១០នាទីក្រោយការនាំមុខ កីឡាករ Osa របស់ណាហ្គា រកបាន១គ្រាប់តាមស្មើទៀត មុនពេលដែល Maycon របស់បឹងកេត ថែមគ្រាប់ជ័យជម្នះដោយបាល់ប៉េណាល់ទីនៅនាទី៩០+។ ១គ្រាប់ជ័យជម្នះនេះហើយ បានធ្វើឱ្យអ្នកគាំទ្រជាច្រើនគិតថាមិនសមឱ្យនោះទេ។ គំនិតរបស់អ្នកគាំទ្រជាច្រើននោះ គិតថាកំហុសនេះ គឺកើតឡើងដោយកីឡាករ Maycon ខ្លួនឯងប៉ុណ្ណោះ។

ចប់ការប្រកួតទៅ លោក ហៅ សុជាតិ គ្រូបង្វឹកក្រុមបឹងកេតបាននិយាយថា៖ “ការប្រកួតនេះពិតជាតានតឹងមែនទេ ដូចដែលខ្ញុំនិយាយពីមុនការប្រកួតអីចឹង។ និយាយពីលទ្ធផលនេះ គឺយើងអាចទទួលយក ព្រោះថាយើងបានរៀបចំក្រុមយ៉ាងល្អ ទាំងការពារ បម្រើ និងប្រយុទ្ធ។ ដូច្នេះលទ្ធផលនេះគឺសក្ដិសមសម្រាប់បឹងកេត”។

ការឈ្នះប្រកួតជាមួយណាហ្គាវើលនេះ បានធ្វើឱ្យបឹងកេតឡើងឈរកំពូលតារាង និងទម្លាក់ណាហ្គាវើលមកលេខ២វិញ។ មួយវិញទៀត ចប់ជុំទី១នៃលីគកំពូលកម្ពុជា គឺក្រុមបឹងកេតបានរក្សាកំណត់ត្រាមិនចាញ់១ប្រកួតណាសោះរបស់ខ្លួនបានថែមទៀត៕