អបអរខួប៥ឆ្នាំរបស់ BTS អ្នកគាំទ្រកម្ពុជាធ្វើពិធីជួបជុំធំមិនធម្មតា និងបង្កើតមូលនិធិសប្បុរសធម៌

2018-06-25 09:28:13
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកគាំទ្រក្រុមចម្រៀង BTS ប្រចាំនៅកម្ពុជាបានប្រារព្ធកម្មវិធីជួបជុំអ្នកគាំទ្រទាំងអស់អបអរខួប ៥ឆ្នាំនៃការបង្កើតក្រុមសំណព្វចិត្តរបស់ពួកគេ។

ក្រុមយុវជន-យុវនារីដែលជា Army កម្ពុជា (អ្នកគាំទ្រ BTS) បានមូលមតិគ្នារៀបចំការជួបជុំជាលក្ខណៈមិត្តភាព។ អ្វីដែលកាន់តែពិសេសជាងនេះទៅទៀតនោះ ពួកគេបានរៀបចំជាមូលនិធិសប្បុរសធម៌ជួយដល់ជនដែលកំពុងត្រូវការជំនួយ។

បើតាមការឲ្យដឹងពីយុវជន Kim Kang Jin ដែលសមាជិកម្នាក់ក្នុងក្រុមអ្នកគាំទ្រ BTS នៅកម្ពុជាបានឲ្យដឹងថា Project របស់ពួកគេមានឈ្មោះ "BTS 5TH ANNIVERSARY CAMARMYs Fanmeeting THE LOVE” ត្រូវបានរៀបចំឡើងកាលពីថ្ងៃទី ១០ ខែមិថុនា ឆ្នាំ ២០១៨ វេលាម៉ោង ១ រសៀលដល់ ៥ល្ងាច នៅ Prime Cineplex។

Kang Jin បានបញ្ជាក់ទៀតថាក្រៅពីជុំគ្នាញ៉ាំអី ក្រុម Army កម្ពុជាក៏បានប្រមូលថវិកាគ្នាបាន ចំនួន ៣ គម្រោងហើយ ហើយក្នុង១គម្រោង ពួកគេក៏ប្រមូលបានច្រើនគួរសមដែរ។

ជាក់ស្ដែងកាលពីព្រឹកថ្ងៃទី ២៥ ខែមិថុនា ឆ្នាំ២០១៨នេះ ពួកគេក៏បានយកថវិកាដែលបានពីការរៃអង្គាសនោះ ទៅប្រគល់ជូនមន្ទីរពេទ្យគន្ធបុប្ផាចំនួន ៤០០ដុល្លារ។ ក្រៅពីថវិកា ក្រុមយុវជនទាំងអស់ក៏ធ្លាប់បានយកសម្ភារៈផ្សេងៗ ដូចជាសៀវភៅសិក្សាទៅឲ្យកុមារៗជាច្រើនកំពុងខ្វះខាតនៅសាលារៀនដែលក្រីក្រមួយចំនួនដែរ។

ចំណែក Prject មួយទៀតដែលអបអរខួប ៥ឆ្នាំរបស់ BTS ដូចគ្នាដែរនោះមានឈ្មោះថា "Love Yourself: The Utopian Dream”(ស្រលាញ់ខ្លួនឯង: ក្ដីស្រមៃដ៏ឥតខ្ចោះ) ក៏ត្រូវរៀបចំឡើងនៅអង្គការដើម្បីភាពញញឹមនៃកុមារ កាលពីថ្ងៃទី ២២ ខែមិថុនា ឆ្នាំ ២០១៨។ អំណោយដែលពួកគេនាំយកទៅចែករួមមានខោអាវ សម្ភារសិក្សា (សៀវភៅ ប៊ិច ខ្មៅដៃ ខ្មៅដៃពណ៌, ជ័រលុប បន្ទាត់ កាតាបជាដើម) ព្រមជាមួយទឹកប្រាក់ចំនួន ១៦០ដុល្លារ។

សូមបញ្ជាក់ផងដែរថា កម្មវិធីជួបជុំអ្នកគាំទ្ររបស់ក្រុម BTS នៅកម្ពុជាប្រារព្ធឡើងជារៀងរាល់ឆ្នាំ មានន័យថាតាំងពី BTS បង្កើតដំបូង ហើយមកទល់ពេលនេះជាលើកទី ៥ហើយ។ ប៉ុន្តែសម្រាប់មូលនិធិសប្បុរសធម៌ ក្រុមទាំងមូល ទើបតែចាប់ផ្ដើមធ្វើក្នុងឆ្នាំនេះទេ ហើយការជួបជុំនេះក៏ធ្វើឡើងមានលក្ខណៈធំពិសេសជាងមុន ស្របពេលចំនួនសមាជិកមានការកើនឡើង គឺប្រមាណជាង ៣០០នាក់ឯណោះ។មិនចប់ត្រឹមនេះទេ ពោលគឺក្រុមយុវជនទាំងនេះក៏នឹងបន្តការងារមនុស្សធម៌នេះ ដើម្បីជួយកុមារដែលនៅតាមអង្គការមួយចំនួនទៀតដែរ៕

ខាងក្រោមនេះជាទិដ្ឋភាពនៃពិធីជួបជុំក្រុមអ្នកគាំទ្រ BTS នៅកម្ពុជា៖