៥ចំណុចពីជំនួបជក់ចិត្តរវាង ព័រទុយហ្គាល់ និងអ៊ីរ៉ង់
- 2018-06-26 01:22:39
- ចំនួនមតិ 0 | ចំនួនចែករំលែក 0
៥ចំណុចពីជំនួបជក់ចិត្តរវាង ព័រទុយហ្គាល់ និងអ៊ីរ៉ង់
ចន្លោះមិនឃើញ
ក្រុមបាល់ទាត់ជម្រើសជាតិព័រទុយហ្គាល់បានដឹកដៃគ្នាជាមួយអេស្ប៉ាញឡើងទៅវគ្គបន្តក្រោយស្មើជាមួយអ៊ីរ៉ង់ ១ទល់នឹង១នៅការប្រកួតចុងក្រោយក្នុងពូល B។
ទោះទទួលជ័យជម្នះតែម្ដងគត់ទល់ម៉ារ៉ុកនៅវគ្គសន្សំពិន្ទុតែលទ្ធផលស្មើអេស្ប៉ាញ និងអ៊ីរ៉ង់គ្រប់គ្រាន់សម្រាប់ក្រុមជើងឯកទ្វីបអឺរ៉ុបបន្តបេសកកម្មរបស់ខ្លួននៅ World Cup រុស្ស៊ីលើកនេះ។ ខាងក្រោមគឺជាចំណុចចាប់អារម្មណ៍៥ពីប្រកួតយប់មិញ។
#៥ ការប្រែប្រួលសមាសភាពកីឡាករ
គ្រូបង្វឹកព័រទុយហ្គាល់បានផ្លាស់ប្ដូរសមាសភាពកីឡាករមួយចំនួននៅជម្រើស១១នាក់ដំបូងទល់នឹងអ៊ីរ៉ង់ដែលជាក្រុមខ្លាំងមួយមកពីអាស៊ី ជាក់ស្ដែងលោកបានសម្រេចចិត្តត្រូវដែលដាក់ Ricardo Quaresma ជាជម្រើស១១នាក់ដំបូងជំនួស Bernardo Silva និងដាក់ Adrien Silva ជំនួស Joao Moutinho ហើយ Goncalo Guedes ត្រូវជំនួសដោយ Andre Silva។
#៤ ភាពលេចធ្លោរបស់ Quaresma
Quaresma ដែលត្រូវដាក់ជំនួសកីឡាករឆ្នើម Bernardo Silva របស់ Manchester City មិនបានធ្វើឲ្យលោក Fernando Santos ខកចិត្តនោះទេ។ ខ្សែបម្រើស្លាបដែលធ្លាប់លេងឲ្យ Chelsea កាលពីអតីតកាលរូបនេះបានបង្ហាញទម្រង់លេងយ៉ាងល្អកាលពីយប់មិញមិនខុសពីប្រកួតកន្លងទៅឲ្យព័រទុយហ្គាល់ ហើយថែមទាំងស៊ុតបញ្ចូលទីបាន១គ្រាប់នៅនាទី៤៥ជាគ្រាប់ជួយឲ្យព័រទុយហ្គាល់បាន១ពិន្ទុបន្ថែមមានកៅអីទៅវគ្គបន្ត។
#៣ កាលទាត់ប៉េណាល់ទីមិនចូលរបស់ Ronaldo
Cristiano Ronaldo បានចូលក្នុងបញ្ជីអ្នកទាត់បាល់ប៉េណាល់ទីមិនចូលនៅ World Cup ប្រទេសរុស្ស៊ីជាមួយ Lionel Messi ដែលទាត់មិនចូលកាលប៉ះអ៊ីស្លង់។ ខ្សែប្រយុទ្ធ Real Madrid ខកខានឱកាសនៅនាទី៥៣ក្រោយព្យាយាមទាត់ទៅខាងស្ដាំ តែត្រូវអ្នកចាំទី Beiranvand លោតត្រូវ និងសង្គ្រោះបាន។
#២ អ៊ីរ៉ង់ខ្វះតែបន្តិចអាចទម្លាក់ព័រទុយហ្គាល់បាន
លទ្ធផល១-១ មិនអាចឲ្យអ៊ីរ៉ង់ឡើងទៅវគ្គបន្តបានទេព្រោះពួកគេត្រូវការឈ្នះព័រទុយហ្គាល់ដាច់ខាតដើម្បីឡើងទៅជាមួយអេស្ប៉ាញ យ៉ាងណាក៏ដោយការសង្គ្រោះបាល់ប៉េណាល់ទីរបស់ Ronaldo និងលទ្ធផលស្មើនេះអ៊ីរ៉ង់បានធ្វើឲ្យព័រទុយហ្គាល់ខកខានឡើងកំពូលតារាង និងបានត្រឹមលេខ២ក្រោមអេស្ប៉ាញ។
#១ អ៊ីរ៉ង់គឺជាមោទនភាពមួយរបស់អាស៊ី
ក្នុងចំណោមក្រុម៥មកពីទ្វីបអាស៊ី អ៊ីរ៉ង់គឺជាក្រុមមួយដែលគេគិតថាស្ថិតនៅក្នុងពូលពិបាកបំផុតដោយត្រូវប្រឈមមុខជាមួយព័រទុយហ្គាល់ អេស្ប៉ាញ និងម៉ារ៉ុក។ យ៉ាងណា ក្រុមប្រទេសអ្នកមានអាស៊ីមួយនេះបានបើកឆាកយកឈ្នះម៉ារ៉ុក ចាញ់អេស្ប៉ាញត្រឹម១ ទល់០ និងចុងក្រោយស្មើគ្នាជាមួយព័រទុយហ្គាល់ ដែលលទ្ធផលនេះគ្មាននរណានឹកស្មានដល់៕