សម្ពោធរឿង «បាតដៃខ្មៅ» មានទាំងរដ្ឋមន្រ្តី និងតំណាងរាស្រ្តចូលរួមទស្សនា (វីដេអូ)

2018-06-27 04:27:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តខ្នាតធំ រឿង «បាតដៃខ្មៅ» បង្ហាញវត្តមានចាប់ពីថ្ងៃទី ២៨ នេះទៅហើយគ្រប់រោងភាពយន្តទំនើបនៅភ្នំពេញ និងរោងភាពយន្ត Major Cineplex by Smart ខេត្តសៀមរាប។ ដោយសារ ភាពយន្តមានការផលិតយ៉ាងយកចិត្តទុកដាក់លើគុណភាពទើបបណ្តាលឱ្យក្រុមការងារផលិត Studio ៤ គ្រាន់តែចំណាយពេលលើការរៀបចំអត្ថបទកុន ឬ Script ៣ ខែ ដោយដក់ស្រង់ចេញពីរឿងប្រលោមលោកខ្មែរ របស់ ពេជ្រ បណ្ឌិត។

លោកស្រី ម៉ីសន សុធារី ប្រើនាម ពេជ្រ បណ្ឌិត អ្នកនិពន្ធរឿង «បាតដៃខ្មៅ»

បន្ទាប់មកទៀត ក្រុមការងារផលិតត្រូវដើរស្វែងរកទីតាំងថតឱ្យដូចនឹងសាច់រឿង ដែលកើតឡើងដូចក្នុងសៀវភៅរឿង ដូចជាខេត្តស្ទឹងត្រែងជាដើម។ ថែមទាំងទៅជួបផ្ទាល់ជនជាតិខ្មែរដែលប្រើភាសាឡាវ និងជនជាតិឡាវដែលរស់នៅក្នុងតំបន់ដាច់ស្រយាលមួយនេះ និងជ្រើសរើសអ្នកភូមិពិតប្រាកដមកសម្តែងក្នុងរឿងតែម្តង។ លោក រស្មី បន្តថា ការថតត្រូវបានរៀបចំយ៉ាងល្អិតល្អន់ដោយប្រើពេលវេលាថតក្នុងខេត្តអស់ ១០ ថ្ងៃ និងក្របី មួយក្បាល ក្នុងពេលថតរឿង។

រូបភាពក្រៅឆាក

រឿង «បាតដៃខ្មៅ» ជាខ្សែភាពយន្តមនោសញ្ចេតនាលាយឡំ និងមិត្តភាព ក្រុមចម្រៀងវ័យក្មេងដែលកំពុងពេញនិយម។ ភាពយន្តនេះក៏ត្រូវបានអ្នកដឹកនាំរឿង លោក មាស រស្មី អះអាងថាជាខ្សែរឿងបត់បែន សាច់រឿងត្រូវទាំងយុវវ័យ និងមនុស្សវ័យកណ្ដាល ព្រោះពីមួយវគ្គទៅមួយវគ្គ នឹងមានភាពផ្លាស់ប្ដូរសាច់រឿង។ ហើយសាច់រឿងនេះទៀតសោតក៏បង្កប់អត្ថន័យអប់រំ មិត្តភាព ស្នេហា ពិសេសឈុតឆាកប្លែកភ្នែក ភ័យរន្ធត់មួយចំនួនដែលទស្សនិកជននឹកស្មានមិនដល់។

ចែ ឡេង តួ ភាដា ឈុតមួយក្នុងរឿង «បាតដៃខ្មៅ»

អ្នកគាំទ្រភាពយន្ត និងទស្សនិកជនដែលបានចូលរួមក្នុងការទស្សនាលើកដំបូងរបស់រឿង «បាតដៃខ្មៅ» ក៏បានបង្ហាញមតិពេញចិត្តលើសាច់រឿង ហើយថែមទាំងស្រលាញ់លើការសម្តែងរបស់តួអង្គវ័យក្មេងទាំងអស់ពិសេស តារាចម្រៀង Original Sai ខាំចេន ម៉ានិត ចែឡេង រតនៈ និងកម្លោះ ដេវិត ជាដើម។ រស់ជាតិនៃសាច់រឿងថ្មីនេះ ជាការតែងនិពន្ធរបស់អ្នកនិពន្ធ ពេជ្រ បណ្ឌិត ដែលជាសាច់រឿងប្រលោមរបស់ Sabay Novel ដ៏មានភាពល្បីល្បាញកាលពីឆ្នាំ ២០១៣ ហើយយកមកផលិតជាភាពយន្ត ដោយ ផលិតកម្ម Studio 4 ក្នុងឆ្នាំ ២០១៨នេះ៕