លោកឧកញ៉ា គួច ម៉េងលី ៖ “កូនអ្នកមាន និងកូនអ្នកក្រ រៀនមានទិសដៅខុសគ្នា”

2018-06-27 03:55:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ននេះការរៀនសូត្រត្រូវបានបើកទូលាយ មានការលើកទឹកចិត្ត និងផ្ដល់តម្លៃខ្ពស់ពីមនុស្សទូទៅ ក៏ដូចសង្គមទាំងមូល។ ប៉ុន្តែដើម្បីឈានទៅសម្រេចគោលដៅរៀងៗខ្លួនអ្នករៀនសូត្ររមែងមានទិសដៅ និងការខិតខំប្រឹងប្រែងផ្សេងៗគ្នា។

លោកឧកញ៉ា គួច ម៉េងលី ស្ថាបនិក និងជាអគ្គនាយកនៃក្រុមហ៊ុន Mengly J. Quach Holding Co, Ltd បានលើកឡើងថា កូនអ្នកមាន និងកូនអ្នកក្ររៀនសូត្រមានទិសដៅខុសគ្នា ពិសេសការសិក្សានៅមហាវិទ្យាល័យ ត្រូវបានកំណត់ និងបែងចែកជា ៤ប្រភេទ។

ថ្លែងក្នុងឱកាសអញ្ជើញជាវាគ្មិនក្នុងអង្គសិក្ខាសាលាស្ដីពី “យុទ្ធសាស្ត្រជ្រើសរើសមុខជំនាញ និងឱកាស បានអាហារូបករណ៍ទៅសិក្សានៅបរទេស” នៅវិទ្យាស្ថានបច្ចេកវិទ្យាកម្ពុជា (តិចណូ) កាលពីពេលកន្លងមកលោកឧកញ៉ា គួច ម៉េងលី បានឱ្យដឹងដូចខាងក្រោម៖

ទី១ គឺកូនអ្នកក្រីក្រ ពេលមានឱកាសចូលរៀននៅមហាវិទ្យាល័យ ពិតជារីករាយ និងមោទនភាពណាស់សម្រាប់ ខ្លួនឯង និងក្រុមគ្រួសារ ហើយអ្នកទាំងនោះរមែងចាប់យកជំនាញវិជ្ជាជីវៈណាមួយដែលខ្លួនពេញចិត្ត។ ពួកគេភាគច្រើនខិតខំរៀនសូត្រ ដើម្បីអាចឆាប់រកបានប្រាក់កម្រៃផ្គត់ផ្គង់ការសិក្សា និងទទួលជោគជ័យទៅថ្ងៃក្រោយ។
ទី២ កូនអ្នករកស៊ីសាមញ្ញ ភាគច្រើនពួកគេគ្រាន់តែចង់សិក្សារៀនសូត្រ និងធ្វើការងារឱ្យជោគជ័យ។ ចុង ក្រោយគឺឈានទៅបង្កើតមុខរបរណាមួយដោយខ្លួនឯង ដូចឪពុកម្ដាយពួកគេតែប៉ុណ្ណោះ។
ទី៣ កូនអ្នកមាន គឺគេរៀនដើម្បីតែក្រេបជញ្ជក់យកចំណេះដឹង និងដឹងពីតម្រូវការក្នុងសង្គម និងយល់ស៊ីជម្រៅនូវផ្នត់គំនិតរបស់មនុស្សតែប៉ុណ្ណោះ។ ដូច្នេះពេលទៅគ្រប់គ្រងក្រុមហ៊ុនមិនប្រឈមទៅនឹងការក្ស័យធន ហើយអាច បន្តនិរន្តរភាពរបស់គ្រួសារបាន។
ទី៤ កូនអ្នកធ្វើការងាររាជ្យការ គឺគេមានគោលបំណង និងមានប្លង់អស់ហើយ។ គេរៀនមកដើម្បីបម្រើកិច្ចការងារសង្គម។ “ដូច្នេះយើងត្រូវដឹងគោលដៅផ្ទាល់ខ្លួន តើយើងរៀនដើម្បីមកធ្វើការងារ…ដើម្បីការងាររកស៊ី ឬដើម្បីមកគ្រប់គ្រងក្រុមហ៊ុន យើងត្រូវកំណត់ឱ្យបានច្បាស់លាស់”។

លោកឧកញ៉ាបន្ថែមថា បច្ចុប្បន្ននេះឱកាសមានដូចៗគ្នាមិនថា កូនអ្នកក្រ ឬកូនអ្នមាននោះទេ ព្រោះសង្គមទាំងមូលបានបើកចំហ ឱ្យតែមានការខិតខំប្រឹងប្រែងគឺអាចក្លាយជាអ្នកមានដូចគ្នា។ ដូច្នេះមនុស្សម្នាក់ៗកុំមើលស្រាលសមត្ថភាព និងអនាគតខ្លួនឯង ត្រូវមានការខិតខំ ប្រឹងប្រែងព្រោះថា កាលៈទេសៈមាន ការប្រែប្រួលជានិច្ច។ បើយើងមិនសូវតស៊ូក៏មិនសូវ បានផលបើមិនសូវតស៊ូក៏មិនសូវមាន បើយើងមិនសូវមានទំនុកខ្លួនចិត្តឯងខ្ពស់ ឱកាសក៏មានតិចតាមហ្នឹងដែរ៕