ផ្សារទំនើបថ្មីចែសមួយទៀត ប្រកាសគិតគូរបរិស្ថាន ដោយគិតថ្លៃថង់ច្រកអីវ៉ាន់ពីអតិថិជន

2018-06-28 06:39:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្សារទំនើបនទើបសម្ពោធថ្មីចែសមួយទៀត បានដាក់គោលជំហរគិតគូរដល់បរិស្ថាន ស្របតាមអនុក្រឹត្យរបស់ប្រទេសកម្ពុជា ដោយប្រកាសដល់អតិថិជនដែលមកទិញទំនិញនៅផ្សារនេះថា ខ្លួននឹងគិតថ្លៃបន្ថែមលើថង់ប្លាស្ទិកមួយតម្លៃ ៤០០រៀល។

ដំណឹងនេះ ត្រូវបានប្រកាសដោយ លោក Chen Zhibin នាយកប្រតិបត្តិគ្រប់គ្រងផ្សារនៅពិធីសម្ពោធជាផ្លូវការផ្សារទំនើបនៅជាន់ទី៣នៃអគារខុនដូ Prince នៅថ្ងៃទី ២៨ មិថុនា ២០១៨ នៅក្បែរគល់ស្ពានព្រះមុនីវង្ស។

លោក Chen Zhibin

លោក Chen បញ្ជាក់ថា៖ «យើងធ្វើដូចនេះ មិនខុសពីផ្សារទំនើបដទៃនោះទេ...តាមច្បាប់រដ្ឋាភិបាលកម្ពុជាបានតម្រូវឲ្យគ្រប់ផ្សារទំនើបទាំងអស់ចូលរួមកាត់បន្ថយការប្រើប្រាស់ថង់ប្លាស្ទិក ហើយវាជាយុទ្ធសាស្ត្រដើម្បីផ្សព្វផ្សាយទៅដល់សាធារណជនឲ្យយល់ដឹងដើម្បីធ្វើឲ្យទីក្រុងស្អាត»។

ដោយឡែកច្បាប់នេះ មានជម្រើសឲ្យពលរដ្ឋ ប្រសិនបើគាត់ត្រូវការថង់ច្រកអីវ៉ាន់ គេនឹងគិតថ្លៃបន្ថែមពីលើទំនិញ។ យ៉ាងណាមិញប្រសិនបើពលរដ្ឋមិនត្រូវការថង់ គាត់អាចយកទំនិញទៅ ដោយមិនបាច់ច្រក ឬច្រកថង់របស់ខ្លួនឯងក៏បាន។

គួរជម្រាបថា ផ្សារទំនើបនៅរាជធានីភ្នំពេញផ្សេងៗទៀតដូចជា ផ្សារទំនើបអ៊ីអន ផ្សារទំនើបឡាក់គី ផ្សារថៃហួត ផ្សារទំនើប Giant ជាដើម បាននិងកំពុងអនុវត្តវិធានការកាត់បន្ថយការប្រើប្រាស់ថង់ប្លាស្ទិក ខណៈទីក្រុងភ្នំពេញមួយ មានចំនួនថង់ប្រើប្រាស់រហូតដល់ទៅ១០លានថង់ជារៀងរាល់ថ្ងៃ ហើយថង់ផ្លាស្ទិកដែលត្រូវគេប្រមូលបានតាមរយៈការបោសសំអាតតាមផ្លូវសាធារណៈ មានប្រមាណ១លាន៧សែនថង់៕

ចុចអានបន្ត៖

អត្ថបទ៖ ស៊ិន សាវ៉េត