៣ចំណុច ធ្វើឱ្យអាស៊ីអឺរ៉ុប ចាញ់បឹងកេតដល់ ៤-០

2018-07-02 07:09:48
ចំនួនមតិ 0 | ចំនួនចែករំលែក 0

ចន្លោះមិនឃើញ

បឹងកេតបានឈរកំពូលតារាងលីគកំពូលកម្ពុជាដដែល បន្ទាប់ពីពួកគេបានយកឈ្នះលើក្រុមអាស៊ីអឺរ៉ុប ក្នុងលទ្ធផល ៤-០ នៃការប្រកួតជុំទី២។

ក្រុមអាស៊ីអឺរ៉ុប

៤គ្រាប់របស់បឹងកេតធ្វើបានសម្រេចដោយសមាជិកបរទេសគឺកីឡាករប្រេស៊ីល Maycon រកបាន២គ្រាប់ និងកីឡាករនីហ្សេរីយ៉ា Julius រកបាន២គ្រាប់។ នេះជាជ័យជម្នះធំមួយសម្រាប់បឹងកេត ត្បិតអីកាលពីជើងទី១កន្លងទៅ ក្រុមរបស់លោក ហៅ សុជាតិ បានឈ្នះអាស៊ីអឺរ៉ុបក្នុងលទ្ធផលតឹងតែងបំផុត ៤-៣។

លោក សុខ វាសនា

ចំពោះការប្រកួតនេះដែរ លោក សុខ វាសនា គ្រូបង្វឹករបស់ក្រុមអាស៊ីអឺរ៉ុបបានលើក៣ចំណុចដែលធ្វើឱ្យក្រុមខ្លួនឯងមិនល្អទាល់តែសោះ។ ទី១ ការបញ្ជូនបាល់ឱ្យគ្នារបស់អាស៊ីអឺរ៉ុបនៅមិនទាន់ល្អនៅឡើយ កីឡាករចំណូលថ្មីលេងមិនទាន់យល់ចិត្តគ្នាជាមួយកីឡាករក្នុងក្រុមចាស់។ ចំណែកហេតុផលទី២ គឺពេលប្រកួតកីឡាករមួយចំនួនលេងដោយគ្មានទំនុកចិត្ត ( ភ័យ) អីចឹងហើយធ្វើអោយការសហការរួមនិងការពារ មានបញ្ហាដោយឱ្យគេទាត់ចូលងាយៗ។

ចំណុចទី៣ គឺក្រុមទាំងមូលត្រូវការពេលវេលាហ្វឹកហាត់ជាមួយកីឡាករថ្មីឱ្យបានច្រើន ដើម្បីយល់ពីអ្វីដែលគ្រូបង្វឹកចង់បាន។ ការដោះដូរកីឡាករ ដោយមិនឱ្យលីគសម្រាក គឺជារឿងមួយធ្វើឱ្យការរៀបចំក្រុមមិនទាន់ស្រួលនៅឡើយទេ។ លោក សុខ វាសនា បានបញ្ជាក់ទៀតថា ចំពោះបឹងកេត ក្រុមគេមិនមានបញ្ហាដូចអាស៊ីអឺរ៉ុបឡើយ ព្រោះសមាជិក១១នាក់ដំបូងដែលត្រូវលេងមិនផ្លាស់ប្ដូរច្រើនទេ ខណៈដែលក្រុមនេះលេងដោយទំនុកចិត្តខ្ពស់ថែមទៀត៕

អត្ថបទ៖ មុន្នីរម្យ