Yang Hyun Suk បង្ហោះសារបែបដៀមដាមគំរាមទៅ Dispatch តែក្រោយមកក៏លុបចោលវិញ
- 2018-07-02 07:50:00
- ចំនួនមតិ 0 | ចំនួនចែករំលែក 0
Yang Hyun Suk បង្ហោះសារបែបដៀមដាមគំរាមទៅ Dispatch តែក្រោយមកក៏លុបចោលវិញ
ចន្លោះមិនឃើញ
ម្ចាស់ផលិតកម្ម YG លោក Yang Hyun Suk បានបង្ហោះសារមួយលើគណនី Instagram របស់លោក បន្ទាប់មកមិនទាន់បានប៉ុន្មានលោកក៏បានលុបសារនោះចោលវិញ ដែលសារមួយនោះដែរ គ្រប់គ្នាអះអាងថា វាជាការគំរាមទៅកាន់សារព័ត៌មាន Dispatch សម្រាប់ការចោទប្រកាន់របស់ពួកគេជុំវិញរឿងរបស់តារាចម្រៀង G-Dragon។
ទោះបីជាម្ចាស់ផលិតកម្មរូបនេះបានលុបសារមួយនោះចោលទៅហើយក្ដី ប៉ុន្តែ អ្នកគាំទ្ររបស់លោកបានថតរូបសារនោះទុកបានជាមុនរួចទៅហើយ។ រូបដែលបានបង្ហោះនោះដែរ គឺជាសារធម្មតាដែលមិនមានពាក្យពេចន៍អសុរោះ ឬដៀមដាមចំៗនោះទេ គ្រាន់តែសារនោះដែរ មានលក្ខណៈដូចជាលោក YG កំពុងតែត្រៀមខ្លួននឹងធ្វើរឿងអ្វីមួយ។
ក្នុងរូបដែលបានបង្ហោះនោះដែរលោកបានសរសេរថា៖ "របៀបនៃការប្រមាញ់របស់តោ គឺវាតែងតែរង់ចាំឱកាសល្អមួយមកដល់។ ផ្នែកខាងក្រៅ ពួកវាមើលទៅដូចជាដាក់ខ្លួនបន្តិចមែន បើទោះបីជាវាមើលទៅដូចស្ងៀមស្ងាត់មែន តែបេះដូងពួកវាកំពុងតែពុះកញ្ជ្រោលខ្លាំង"។
តាមរយៈសារដែលមានន័យធៀបមួយនេះ អ្នកគាំទ្រប្រាកដច្បាស់ថា ប៉ាប៉ា YG គឺកំពុងតែដៀមដាម និងគំរាមទៅកាន់សារព័ត៌មាន Dispatch ចំពោះការចោទប្រកាន់របស់ពួកគេទៅលើតារាចម្រៀង G-Dragon ថាទទួលបានការព្យាបាលជាពិសេសពីមន្ទីរពេទ្យទាហាន។ មួយវិញទៀត តារាចម្រៀងរូបនេះ ត្រូវបានបង្ខំឲ្យចាកចេញពីបន្ទប់មន្ទីរពេទ្យ ខណៈមុខរបួសរបស់លោកមិនទាន់បានជាសះស្បើយនៅឡើយនោះ ក៏ដោយសារតែសារព័ត៌មាននេះដែរ។
បើទោះបីជា ម្ចាស់ផលិតកម្មរូបនេះ មិនបានបញ្ជាក់ឈ្មោះចំៗក្ដី ប៉ុន្តែបើតាមអ្វីដែលលោកបានសរសេរពីក្រោមរូបភាពដែលបានបង្ហោះនោះថា៖ "អារម្មណ៍របស់ខ្ញុំក៏ដូចអ្នកទាំងអស់គ្នាដែរ។ ពួកយើងមានបេះដូងតែមួយ V.I.P” អ្នកគាំទ្រជឿជាក់ថា ពាក្យតោដែលលោកបានសរសេរក្នុងរូបដែលបានបង្ហោះនោះ គឺសំដៅលើរូបលោក និងអ្នកគាំទ្រ (V.I.P) ដែលកំពុងតែចាំពេលវេលាស័ក្ដិសមណាមួយដើម្បីវាយប្រហារតបវិញ៕