មកដឹងឲ្យហើយ! ប្រឡងបាក់ឌុបឆ្នាំនេះ ចង់ចូលបន្ទប់ទឹក មានអនុរក្សទៅតាមទេ?

2018-07-02 09:41:11
ចំនួនមតិ 0 | ចំនួនចែករំលែក 0

ចន្លោះមិនឃើញ

អំឡុងសរសេរចម្លើយកិច្ចការ ក្នុងដំណើរការប្រឡងមធ្យមសិក្សាទុតិយភូមិ ស្រាប់តែបេក្ខជនចង់ទៅបន្ទប់ទឹក គឺត្រូវអមដំណើរដោយអនុរក្សផងដែរ ជៀសវាងករណីបេក្ខជនទៅបើកចាក់ក្នុងបន្ទប់ទឹក។ នេះបើតាមប្រសាសន៍របស់ឯកឧត្ដម ហង្សជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា ក្នុងសន្និសីទសារព័ត៌មានអំពីការរៀបចំការប្រឡងមធ្យមសិក្សាទុតិយភូមិ២០១៨។

រដ្ឋមន្ត្រីក្រសួងអប់រំយុវជន និងកីឡា ថ្លែងបន្តថា ទន្ទឹមនឹងមានការរឹតបន្តឹងខ្លាំង ក្រសួងក៏បានជួយសម្រួលយ៉ាងច្រើនដល់សិស្សានុសិស្ស ដើម្បីឲ្យការសិក្សារបស់ពួកគេទទួលបានលទ្ធផលល្អ។ ក្នុងរួមមានដូចជា៖ ការសង្ខេបមេរៀនគណិតវិទ្យា គីមីវិទ្យា រូបវិទ្យា ជីវទ្យាជាដើម។ ជាក់ស្ដែងកាលពីឆ្នាំ២០១៧ ក្រសួងបានសង្ខេបមុខវិជ្ជាប្រវត្តិវិទ្យា និងវិធីសាស្ត្រតែងសេចក្ដីអក្សរសាស្ត្រខ្មែរ ដល់សិស្សថ្នាក់ទី១២ តាមរយៈការផ្សព្វផ្សាយដ៏ទូលំទូលាយលើបណ្ដាញសង្គម។ ជាពិសេសនោះ ក្រសួងតែងបង្ហោះវិញ្ជាសាប្រឡងឆ្នាំចាស់ និងអត្រាកំណែរផ្សេង ដើម្បីឲ្យសិស្សយកទៅសិក្សារៀនសូត្រ និងរៀនដោះស្រាយ ដើម្បីត្រៀមខ្លួនឲ្យបានល្អក្នុងការប្រឡង។

ឯកឧត្ដម ហង់ជួន ណារ៉ុន ឲ្យដឹងទៀតថាកាលពីឆ្នាំ២០១៦ ក្រសួងបានរៀបចំកម្មវិធីធ្វើតេស្តសាកល្បង សមត្ថភាព នៅលើគេហទំព័ររបស់ក្រសួង។ ដូច្នេះសិស្សគ្រប់គ្នាអាចចូលសាកល្បងពីសមត្ថភាពរបស់ខ្លួនឯង ដើម្បីឲ្យដឹងថាខ្លួនឯងចេះអ្វីខ្លះ? ក៏ដូចជាវាស់ស្ទង់កម្រិតសមត្ថភាព។

ក្រៅពីនេះក្រសួងក៏បានបន្ថែមម៉ោងរៀនដល់សិស្ស បំប៉នសិស្ស និងពង្រឹងលើគុណភាពអប់រំ គុណភាពគ្រូបង្រៀនសព្វគ្រប់បែបយ៉ាងដែលជាហេតុធ្វើឲ្យចំនួនអ្នកជាប់បាក់ឌុបកាន់តែកើនឡើង ពីមួយឆ្នាំទៅមួយឆ្នាំ។ ចំណែកឯឆ្នាំ២០១៨នេះដែរ រដ្ឋមន្ត្រីហង់ជួន ណារ៉ុន ក៏រំពឹងថាចំនួនអ្នកជាប់និទ្ទេសA នឹងកាន់តែច្រើនឡើងថែមទៀត ព្រោះពួកគេបានត្រៀមខ្លួនរយៈពេលជិត៥ឆ្នាំមកហើយ ចាប់តាំងពីការរឹតបន្តឹងការប្រឡងពីឆ្នាំ២០១៤មក៕

ការប្រឡងមធ្យមសិក្សាទុតិយភូមិឆ្នាំ២០១៨ ដែលនឹងត្រូវប្រព្រឹត្តិទៅនៅថ្ងៃទី២០ ខែសីហាខាងមុខនេះ នឹងមានការចូលរួមទាំងសិស្សថ្នាក់វិទ្យាសាស្ត្រ និងសង្គម មានចំនួនសរុប ១១៧ ០៦១នាក់ និងមានមណ្ឌលប្រឡងចំនួន១៩៥មណ្ឌល ចែកចេញជា ៤ ៧១៦បន្ទប់ នៅរាជធានី-ខេត្តទូទាំង២៥ នៃព្រះរាជាណាចក្រកម្ពុជា។

អត្ថបទ៖ វឌ្ឍនៈ