ផលិតករឥណ្ឌា ចំណាយលុយផលិតភាពយន្តនិយាយពីគ្រួសារកីឡា ព្យាយាមស្វែងរកមេដាយមាសជូនជាតិខ្មែរ

2018-07-04 09:34:50
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងពិតនៅពីក្រោយម្ចាស់មេដាយមាសកីឡាបោកចំបាប់ នឹងត្រូវបានលាតត្រដាងក្នុងខ្សែភាពយន្ត «បោកចំបាប់ ក្តីសង្ឃឹមចុងក្រោយ» ជាការផលិតរបស់ផលិតករឥណ្ឌាម្នាក់ដែលរស់នៅក្នុងប្រទេសកម្ពុជាជាច្រើនឆ្នាំ និងស្រលាញ់ពេញចិត្តវិស័យកីឡាផង និងភាពយន្តផង។

លោក Manish Sharma ផលិតកររឿង «បោកចំបាប់» ប្រាប់ Sabay ឱ្យដឹងថា ក្រោយពីបានដឹងព័ត៌មានអំពីការតស៊ូរបស់គ្រួសារកីឡាកញ្ញា នី សំណាង ជម្រើសជាតិកីឡាចំបាប់កម្ពុជា លោកក៏តាំងចិត្តភ្លាមថាត្រូវតែផលិតភាពយន្តនេះដើម្បីគ្រួសារនេះផង និងដើម្បីលើកម្ពស់វិស័យកីឡាផង។ ផលិតកររូបនេះបន្តថា ភាពយន្តមួយនេះនឹងក្លាយជាប្រវត្តិសាស្ត្រភាពយន្តកីឡារបស់កម្ពុជា ហើយក៏ជាមោទកភាពមួយរបស់ជនជាតិខ្មែរ និងកីឡាករខ្មែរទាំងអស់។

ឯកឧត្តម វ៉ាត់ ចំរើន អគ្គលេខាធិការ NOCC និង លោក Manish Sharma

ភាពយន្ត «បោកចំបាប់» ជាប្រភេទរឿងលើកទឹកចិត្ត និងការបង្ហាញពីប្រវត្តិរបស់កីឡាករបោកចំបាប់ម្នាក់ដែលបានឆ្លងកាត់ពេលវេលាយ៉ាងលំបាកក្នុងជីវិត តែគាត់នៅតែមិនបោះបង់ក្តីស្រមៃដើម្បីយកមេដាយមាសជូនជាតិមាតុភូមិរបស់ខ្លួនរយៈពេល ៥០ឆ្នាំ។ រហូតដល់ដំណាក់កាលចុងក្រោយនៃជីវិតចាស់ជរារបស់កីឡាករបោកចំបាប់ម្នាក់នេះ កូនស្រីតែម្នាក់របស់លោកបានសម្រេចគោលបំណងជូនលោក គឺកញ្ញា នី សំណាង ផ្ទាល់តែម្តង។

តួសម្តែងជា ឪពុក កញ្ញា នី សំណាងកាលនៅក្មេង

ផលិតករភាពយន្ត រឿង «បោកចំបាប់» បានប្រាប់ឱ្យដឹងថា រូបលោកមានការរំភើបដែលភាពយន្តនេះចេញជារូបរាងឡើងក្នុងឆ្នាំ ២០១៨ នេះ ក្រោយព្យាយាមរៀបចំផលិតជាង១ ឆ្នាំមក។ ពិសេសវាមានការលំបាកខ្លាំងក្នុងការរើសតួសម្ដែងឱ្យសមនឹងបុគ្គលិកលក្ខណៈរបស់តួអង្គក្នុងភាពយន្តខ្នាតធំមួយនេះ។ ក្រោយពេលភាពយន្ត «បោកចំបាប់» ថតចប់មានរឿងមួយដែលផលិតកររូបនេះមានការសោកស្ដាយ ព្រោះភាពយន្តនេះមិនអាចកាត់តហើយមុនពេលកីឡាករដែលជាឪពុករបស់ កញ្ញា នី សំណាងទទួលមរណភាព កាលពីប៉ុន្មានខែមុននេះបន្តិច។

ផលិតកររូបនេះ បន្តថា រូបលោកមិនរំពឹងការចំណេញពីការផលិតភាពយន្តនេះទេ ហើយក៏បានសិក្សារួចមកហើយដែរ ថាមិនអាចចំណេញលើការផលិតភាពយន្តក្នុងទុនដល់ច្រើនបែបនេះទេក្នុងប្រទេសកម្ពុជា។ លោក Manish Sharma គ្រាន់តែសង្ឃឹមថាភាពយន្តនេះនឹងទទួលស្វាគមន៍ពីសំណាក់ប្រជាជនខ្មែរដោយការពេញចិត្ត ហើយចំពោះរូបលោកផ្ទាល់ ទុនជាង ២៥ ម៉ឺនដុល្លារសម្រាប់ផលិតភាពយន្តនេះ គឺគ្រាន់តែជាការចូលរួមផលិត និងជួយដល់វប្បធម៌ខ្មែរ ពិសេសផ្សាភ្ជាប់ទំនាក់ទំនងរវាងកម្ពុជា និងឥណ្ឌាឱ្យកាន់តែប្រសើរ។

សន្និសីទកាសែតរឿង "បោកចំបាប់"

លោក Manish Sharma ក៏បានត្រៀមយកភាពយន្តថ្មីនេះបញ្ចាំងនៅកម្ពុជាមុនគេ ក្នុងកំឡុងខែ សីហា ឆ្នាំ ២០១៨ នេះ ឬយូរជាងនេះបន្តិច មុននឹងយកទៅចាក់ផ្សាយក្នុងរោងភាពយន្ត៤ប្រទេសទៀតដែលមានទំនាក់ទំនងនឹងប្រទេសឥណ្ឌា និងក្នុងរោងភាពយន្តប្រទេស ឥណ្ឌាតែម្ដង៕

ទស្សនាវីដេអូខ្លីរឿង "បោកចំបាប់" ខាងក្រោមនេះ៖

អត្ថបទ៖ Sunny

រូបភាពផ្តល់សិទ្ធិដោយលោក Manish Sharma