៥ក្បាច់ ដើម្បីស្នើសុំស្លាកលេខឡានថ្មី មិនបាច់ចាំយូរ ក្រោយបាត់បង់

2018-07-04 09:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ករណីបាត់ស្លាកលេខឡាន កំពុងបន្តកើតមាន បើទោះជាករណីខ្លះអាជ្ញាធរធ្លាប់បង្ក្រាបបាន។ បញ្ហានេះបានធ្វើឲ្យប្រជាពលរដ្ឋ រស់នៅរាជធានីភ្នំពេញ និងតាមបណ្ដាខេត្តមួយចំនួន បានបង្ហាញនូវការបារម្ភពីរឿងអសន្តិសុខសង្គម។

តាមរយៈការចែករំលែកតាមបណ្ដាញសង្គមកន្លងទៅ ប្រជាពលរដ្ឋទាំងអ្នកជួបបញ្ហាផ្ទាល់ និងអ្នកគ្រាន់តែបានដឹងរឿង មានចម្ងល់ពីបែបបទស្នើសុំស្លាកលេខថ្មីពីអាជ្ញាធរ។ តើស្មុគស្មាញ ឬត្រូវចំណាយពេល និងថវិកាច្រើនទេ?

ប្រជាពលរដ្ឋរស់នៅសង្កាត់ស្ទឹងមានជ័យ២ បានប្រាប់ Sabayថាករណីបាត់ស្លាកលេខភាគច្រើន កើតមានចំពោះអ្នករស់នៅតាមបុរី ឬអ្នកមានផ្ទះរស់នៅជាប់ផ្លូវ ហើយឡានចតទុកមុខផ្ទះ។

ឆ្លើយតបនឹងបញ្ហានេះ Sabay មិនអាចសុំការបំភ្លឺ ពីមន្ត្រីប៉ុស្តិ៍នគរបាល សង្កាត់ស្ទឹងមានជ័យ២បានទេ។

ករណីបាត់ស្លាកឡាន អ្នកខ្លះទៀត អះអាងថា ទោះឡានចតក្នុងរបងហើយក៏ដោយ នៅតែមានចោរលួចបានដែរ។ ប្រជាពលរដ្ឋដដែល បានបញ្ជាក់ថា ធ្លាប់មានបាត់ក្នុងតំបន់តែមួយខ្លះ តែរយៈពេល១យប់ ចោរលួច និងប្រមូលម្ដង បាត់រហូតដល់ ៥ឬ១០ ស្លាកក៏មាន។

ជាក់ស្ដែង ប្រជាពលរដ្ឋមួយរូប សុំមិនបញ្ចេញឈ្មោះ បានប្រាប់ Sabay ថា អ្នកស្រីកំពុងរស់នៅក្នុងក្រុងភ្នំពេញ ក្នុងសង្កាត់ស្ទឹងមានជ័យ២។ នៅពាក់កណ្ដាលឆ្នាំ២០១៨នេះ អ្នកស្រី បាត់ស្លាកលេខរថយន្តស៊េរីទំនើបមួយគ្រឿង ដែលបានចតក្នុងរបងផ្ទះ នៅពេលយប់។ អ្នកស្រីចង់ឲ្យអាជ្ញាធររឹតបន្តឹងបញ្ហាអសន្តិសុខ ក្នុងតំបន់រស់នៅ។

ឡានគ្មានស្លាកលេខ រូបតំណាង

ក្រោយមក អ្នកស្រីបានទៅដាក់ពាក្យប្ដឹងនៅប៉ុស្តិ៍នគរបាល ខណ្ឌសង្កាត់ស្ទឹងមានជ័យ២។ ប្រហែល២ ទៅ៣ថ្ងៃ បន្ទាប់ពីបំពេញបែបបទ នៅកន្លែងពាក់ព័ន្ធផ្សេងទៀត ទើបអ្នកស្រីបានទទួលស្លាកលេខឡានថ្មី ដោយអ្នកស្រី លើកឡើងថា មិនមានបញ្ហាពិបាកទេ។

លោក ធូរ ផូយ មន្ត្រីការិយាល័យចុះបញ្ជី នៃនាយកដ្ឋានដឹកជញ្ជូន ក្រសួងសាធារណការ និងដឹកជញ្ជូន បានប្រាប់ Sabay ថាករណីបាត់ស្លាកលេខរថយន្ត បើតាមតួលេខលោកទទួលបាន មានប្រហែល ២ ទៅ៣ករណីក្នុង១ខែ។ លោកបន្តថា បែបបទស្នើសុំ មិនមានអីស្មុគស្មាញ ឬត្រូវចំណាយច្រើននោះទេ។

លោកបានបញ្ជាក់ថា ប្រសិនបើប្រជាពលរដ្ឋមានបញ្ហាបាត់ស្លាកលេខរថយន្ត អាចអនុវត្តដូចចំណុច ខាងក្រោម ដើម្បីទទួលបានស្លាកលេខឡានថ្មីឆាប់រហ័ស ក្នុងរយៈពេលតែ ៣ ទៅ៤ថ្ងៃ។

១.ដាក់ពាក្យបណ្ដឹង ទៅអធិការនគរបាលខណ្ឌ ឬស្រុក ដែលបានកើតហេតុ

២. ត្រៀមសំណៅដើម អត្តសញ្ញាណប័ណ្ណសញ្ជាតិខ្មែរ

៣. ឯកសារហ្វូតូកូពី លតាប័ត្រពន្ធនាំចូលរថយន្ត

៤. ឯកសារហ្វូតូកូពី ឆៀកឡាន

៥. មកមន្ទីរសាធារណការ ដែលមានអាសយដ្ឋានដូចក្នុងកាតគ្រីរថយន្ត ដើម្បីបំពេញឯកសារទុតិយតា ជាដើម។