ជីវិតថ្លៃមែន! មុនរកឃើញក្មេងថៃទាំង១៣ រឿងចៃដន្យមួយបានកើតឡើងក្នុងរូងភ្នំថាំហ្លួង

2018-07-05 02:12:19
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកជ្រមុជទឹកជនជាតិអង់គ្លេស លោក John Volanthen ដែលបានរកឃើញគ្រូបង្វឹកបាល់ទាត់ និងកូនក្រុមទាំង១៣នាក់ នៅក្នុងរូងភ្នំថាំហ្លួង នៃខេត្តឈៀងរ៉ាយ ប្រទេសថៃ បានប្រាប់ឲ្យដឹងថា មានរឿងហេតុចៃដន្យមួយកើតឡើង មុនពេលលោករកឃើញពួកគេទាំងនោះ។

លោក John Volanthen (ស្តាំ-អាវទឹកក្រូច)

អ្នកជំនាញជ្រមុជទឹកខាងលើនិយាយថា នៅពេលនោះលោកកំពុងជ្រមុជទឹករាយខ្សែបន្ទាត់នាំផ្លូវ នៅក្នុងរូងភ្នំថាំហ្លួង ខណៈពេលនោះស្រាប់តែអស់ខ្សែ បង្ខំឲ្យលោកងើបចេញពីទឹកតែម្ដង។ ជារឿងហេតុដ៏ចៃដន្យ និងអស្ចារ្យបំផុតមួយ ពួកគេទាំង១៣នាក់ដែលបាត់ខ្លួនអស់រយៈពេល៩ថ្ងៃ កំពុងផ្ដុំគ្នានៅលើទីទួលមួយកន្លែង ក្បែរលោក John នោះ ដោយនាំគ្នាសម្លឹងនិងស្រែកហៅលោក បន្ទាប់ពីបានឃើញភ្លើងអំពូល។

ចុចអាន៖ គ្រូបង្វឹកបាល់ទាត់ នាំក្មេងថៃទាំង១២ចូលរូងភ្នំ អាចត្រូវជាប់ទោសដែរឬទេ?

លោក John បានបន្ថែមថា ប្រសិនបើខ្សែនោះខ្លីជាងនេះត្រឹមតែ ៤-៥ម៉ែត្រ លោកនឹងត្រូវត្រលប់ទៅក្រោយវិញ ហើយក៏មិនបានរកឃើញពួកគេ នៅយប់ថ្ងៃច័ន្ទនោះដែរ ខណៈពួកគេនឹងត្រូវចំណាយពេលយ៉ាងហោចណាស់មួយយប់ទៀត នៅក្នុងទីងងឹត និងមិនដឹងថា អ្នកជួយសង្គ្រោះអាចរកពួកគេឃើញឬយ៉ាងណាឡើយ។

យ៉ាងណាមិញ ឥឡូវនេះក្មេងប្រុសថៃ និងគ្រូបង្វឹកបាល់ទាត់ទាំង១៣នាក់ ត្រូវបានគេរកឃើញ និងកំពុងមានសុវត្ថិភាពហើយ ខណៈជំហានបន្ទាប់នោះគឺ ត្រូវនាំយកពួកគេចេញពីរូងភ្នំថាំហ្លួង ដែលត្រូវទឹកភ្លៀងជន់លិចដោយសុវត្ថិភាព ស្របពេលដែលគេអះអាងថា ការនាំយកពួកគេចេញអាចត្រូវចំណាយពេលយូរបន្ថែមទៀត៕