ស្តាប់សាច់ញាតិក្មេងថៃជាប់ក្នុងរូងភ្នំ រៀបរាប់ប៉ុន្មានឃ្លា រំជួលចិត្តរកអ្វីផ្ទឹមពុំបាន
- 2018-07-05 07:48:59
- ចំនួនមតិ 0 | ចំនួនចែករំលែក 0
ស្តាប់សាច់ញាតិក្មេងថៃជាប់ក្នុងរូងភ្នំ រៀបរាប់ប៉ុន្មានឃ្លា រំជួលចិត្តរកអ្វីផ្ទឹមពុំបាន
ចន្លោះមិនឃើញ
ដើម្បីអបអរសាទរខួបកំណើតអាយុ១៦ឆ្នាំរបស់មិត្តរួមក្រុម ក្មេងប្រុសថៃទាំង១២នាក់មកពីក្រុមបាល់ទាត់ជ្រូកព្រៃ បានទិញអាហារសម្រន់មួយចំនួន មុនពេលចូលទៅក្នុងរូងភ្នំថាំហ្លួង នៃខេត្តឈៀងរ៉ាយ ប្រទេសថៃ ហើយក៏បានជាប់នៅក្នុងនោះអស់រយៈពេលជាច្រើនថ្ងៃ។
ប្រហែលជាអាហារសម្រន់ទាំងនោះហើយ ដែលជួយឲ្យពួកគេអាចនៅរស់រានមានជីវិត បន្ទាប់ពីមេឃធ្លាក់ភ្លៀងយ៉ាងខ្លាំង បង្ខំឲ្យពួកគេចូលទៅកាន់តែជ្រៅ និងជាប់ក្នុងរូងភ្នំនោះជាមួយគ្រូបង្វឹកតែម្ដង។
ក្មេងប្រុសអាយុចន្លោះពី ១១ ដល់ ១៦ឆ្នាំ រួមទាំងគ្រូបង្វឹកផងនោះ ត្រូវបានគេរកឃើញនៅយប់ថ្ងៃច័ន្ទ ទី១២ ខែកក្កដា ឆ្នាំ២០១៨ នៅលើទីទួលក្នុងរូងភ្នំដ៏ងងឹត ដែលកំពុងត្រូវទឹកភ្លៀងជន់លិចយ៉ាងខ្លាំង។
បងស្រីរបស់ក្មេងប្រុស Pheeraphat Sompiengjai (ឈ្មោះក្រៅហៅថា Night អាយុ១៦ឆ្នាំ ឬ ១៧ឆ្នាំបើគិតតាមប្រទេសថៃ) ដែលជាម្ចាស់ខួប បាននិយាយថា Night បានចូលរួមក្រុមបាល់ទាត់ជ្រូកព្រៃ អស់រយៈពេលជិត១ឆ្នាំមកហើយ និងលេងតំណែងជាអ្នកចាំទី។
នារីជាបងស្រីមានឈ្មោះថា Phunphatsa បានបន្ថែមថា ក្រុមគ្រួសារបានរៀបចំនំខួបកំណើត , សាច់ជ្រូកអាំង និង បង្អែមខ្លះៗសម្រាប់អបអរដល់រូបគេ នៅថ្ងៃទី២៣ ខែមិថុនា (ថ្ងៃដែលពួកគេបាត់ខ្លួន)។
«យើងបានត្រៀមអាហារពេលល្ងាចដើម្បីអបអរថ្ងៃខួបកំណើតគេ ហើយសាច់ញាតិមួយចំនួនក៏បានមកចូលរួមដែរ»។ នេះបើតាមសម្តីនាង Phunphatsa។ នាងបានបន្តថា «ខ្ញុំបានទុកនំខួបកំណើតនៅក្នុងទូរទឹកកកដើម្បី Surprise គេ»។
ការទន្ទឹងរង់ចាំអស់រយៈពេលច្រើនម៉ោងក៏បានរំលងផុតទៅ ហើយពួកគេក៏បានដឹងថា ច្បាស់ជាមានរឿងមិនស្រួល។ នាង Phunphatsa បានប្រាប់សារព័ត៌មាន AFP ថា «Night មិនដែលមកផ្ទះយឺតម៉ោងឡើយ»។
ទោះបីជាយ៉ាងណា បន្ទាប់ពីបានរកឃើញពួកគេ នារីជាបងស្រីបានប្រាប់ថា «ខ្ញុំមានអារម្មណ៍ថាត្រូវចាំរាងយូរបន្តិច (ការនាំយកពួកគេចេញពីរូងភ្នំ ត្រូវការពេលវេលាយូរ) ប៉ុន្តែវាមិនអីនោះទេ ឲ្យតែគេមានសុវត្ថិភាព... អត់មានគេនៅផ្ទះ ពិតជាស្ងាត់ណាស់»៕
ចុចអាន៖